ދެވަނަ ބުރު އުނދަގޫވީ ޑިފެންސިވް ސްޓައިލުގެ ތަޖުރިބާ ނެތުމުން:ދީމާ
-
ކޯޗާއި، ޓީމުގެ އެހީތެރިކަމާއެކު އެ މެޗު ރަނގަޅު މިސްރާބަކަށް ގެންދެވުނު
-
މިކަހަލަ ބައިނަލްއަގްވާމީ މެޗެއް ނުކުޅޭތާ 2 އަހަރެއްހާ ދުވަސްވެއްޖެ
ޑިފެންސިވް ސްޓައިލުގެ ކުޅުންތެރިއަކާ އެއްކޮށް ނުކުޅޭތާ ވަރަށް ގިނަ ދުވަސްތަކެއް ވެއްޖެކަމަށާއި، އެހެންކަމުން ދެވަނަ ބުރުގައި ތުރުކީގެ ޗެމްޕިއަން އެޗޭ ހަރާކްއާއި ވާދަކުރި މެޗަކީ އުނދަގޫ މެޗެއް ކަމަށް އިސްލާމިކް ސޮލިޑާރިޓީ ގޭމްސްގައި ވާދަކުރަމުން އަންނަ ފާތިމަތު ދީމާ ޢަލީ ބުނެފިއެވެ.
ސަޢޫދީ ޢަރަބިއްޔާގެ ރިޔާޟުގައި ކުރިޔަށްދާ ހަ ވަނަ އިސްލާމިކް ސޮލިޑާރިޓީ ގޭމްސްގެ ޓޭބަލް ޓެނިހުގެ ސިންގަލްސް އިވެންޓުން ދެވަނަ ބުރުގައި ދީމާ ވަނީ ވަރަށް ރަނގަޅަށް ކުޅެފައެވެ. ގަދަ ހަތަކަށް ކުޅުނު ދެވަނަ ބުރުގެ މެޗުގައި ދީމާ ވަނީ ތުރުކީ ކުޅުންތެރިޔާ ބަލިކުރުމާއި ވަރަށް ގާތަށް ނަތީޖާ ގެންގޮސްފައެވެ.
އެހެންނަމަވެސް ވާދަވެރި ކުޅުމަކަށްފަހު 6 ސެޓަށް ކުޅެގެން އެ މެޗު ތުރުކީގެ ކުޅުންތެރިޔާ ކާމިޔާބު ކުރިނަމަވެސް މެޗު ރަނގަޅު މިސްރާބަކަށް ގެންދެވުނު ކަމަށް ދީމާ ބުންޏެވެ.
އީރާނުގެ ތަޖުރިބާކާރު ކޯޗު މަހްދީ ޚޯޝްމަރަމްގެ އިރުޝާދާއި ދިވެހި ޓީމުގެ އެކުވެރިންގެ އެހީތެރިކަމާއެކު ދެވަނަ ބުރުގައި ރަނގަޅު ކުޅުމެއް ދެއްކުނު ކަމަށް ދީމާ ފާހަގަކުރިއެވެ. ދީމާ ބުނީ އޭނާ މިކަހަލަ ބައިނަލްއަގްވާމީ މެޗެއް ނުކުޅޭތާ 2 އަހަރެއްހާ ދުވަސް ވެދާނެކަމަށާއި، އެ މެޗު އުނދަގޫވީ އެހެންވެ ކަމަށެވެ. އެހެންނަމަވެސް ދެއްކުނު ކުޅުމާމެދު ހިތްހަމަޖެހޭ ކަމަށާއި، ނެރެވުނީ ރަނގަޅު ނަތީޖާއެއް ކަމަށް އޭނާ ބުންޏެވެ.
ދީމާ އާއި ދެކޮޅަށް ކުޅުނު މެޗުގައި ތުރުކީގެ ހަރާކް ވަނީ ވަރަށް ވަރުގަދަ އެޓޭކްތަކެއް ކޮށްފައެވެ. ޑިފެންސިވް ސްޓްރޯކްތައް ގިނަ މި މެޗަށް ނިކުތްއިރު ދީމާއަކީ މިސްޓައިލުގެ ކުޅުމުގެ ތަޖްރިބާ ހުރި ކުޅުންތެރިއެއް ނޫނެވެ.
ރާއްޖޭގެ ކުޅުންތެރިންގެ ކިބައިގައި ޑިފެންސިވް އަދި ޗޮޕީ ސްޓައިލްގެ ކުޅުމުގެ ވައްޓަފާޅިނެތް ކަމަށް ޓީމުގެ ކޯޗު ޚޯޝްމަރަމްވެސް ވަނީ ފާހަގަކޮށްފައެވެ. އެހެންނަމަވެސް ދީމާ ދެވަނަ ބުރުގައި ދެއްކި ކުޅުމާމެދު ފަޚުރުވެރިވާކަމަށާއި، ކުރިޔަށް އޮތްތަނުގައި ދީމާއަށް ކާމިޔާބީ ހޯދޭނެ ކަމުގެ އުންމީދު ބޮޑުކަމަށް ކޯޗު ބުންޏެވެ.