އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑް އަތުން 2-1 ގެ ނަތީޖާއަކުން މެންޗެސްޓަރ ސިޓީ ބަލިވެއްޖެ އެވެ.
ނިއު ކާސަލްގެ ސެއިންޓް ޖޭމްސް ޕާކްގައި ފަންސާސް ދެ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުން ނިއުކާސަލް މޮޅުވިއިރު އެ ޓީމު ވަނީ އިންޓަރނޭޝަނަލް ބްރޭކަށް ދިއުމުގެ ކުރިން ބްރެންޓްފޯޑް އަތުން 3-1 ގެ ނަތީޖާއަކުން ބަލިވެފައެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައިނުވާއިރު ދެ ޓީމަށްވެސް ވަނީ ލަނޑު ޖަހަން ރަގަޅު ފުރުސަތުތަކެއް ލިބިފައެވެ.
މި މެޗުގެ ފުރަތަމަ ހާފުގައި މެންޗެސްޓަރ ސިޓީގެ ފިލް ފޯޑެން އަށް ޝާރ ކުރި ފައުލަކާއި ގުޅިގެން އެ ޓީމަށް ޕެނަލްޓީއެއް ދީފައިނުވާތީ ސިޓީގެ ކުޅުންތެރިންގެ އިތުރުން ކޯޗު ޕެޕް ގަޑިއޯލާ ވަނީ ހިތްހަމަނުޖެހުން ފާޅުކޮށްފައެވެ.
މެންޗެސްޓަރ ސިޓީގެ ފޯވަޑް އާލިން ހާލަންޑް ގޯލަށް އަމާޒުކޮށް ފޮނުވާލި ނުރައްކާތެރި ހަމަލާ ނިއުކާސަލްގެ ގޯލުކީޕަރު ނިކް ޕޯޕް ވަނީ މަތަކޮށްފައެވެ. ޕްރިމިއާ ލީގުގައި މިހާތަނަށް 99 ލަނޑު ޖަހާފައިވާ ހާލަންޑް މި މެޗަށް ނިކުމެފައިވަނީ 100 ލަނޑު ޖަހާ ޕްރިމިއާ ލީގުގައި އެންމެ އަވަހަށް 100 ލަނޑު ޖެހި ކުޅުންތެރިޔާގެ ރެކޯޑް ހެދުމަށެވެ.
މި މެޗުގައި ފުރަތަމަ ލަނޑު ޖަހާ ނިއުކާސަލް އިން ކުރި ހޯދާފައިވަނީ މެޗުގެ 63 ވަނަ މިނިޓުގައި ހާވޭ ބާރންސް ކާމިޔާބުކޮށްދިން ލަނޑުންނެވެ.
ނަމަވެސް އޭގެ ފަސް މިނިޓު ފަހުން މެންޗެސްޓަރ ސިޓީގެ ރުބެން ޑިއާސް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ.
ނިއުކާސަލް ޔުނައިޓެޑް އިން ދެވަނަ ފަހަރަށް ކުރި ހޯދާފައިވަނީ ސިޓީ އިން މެޗުގެ ނަތީޖާ އެއްވަރުކުރިތާ ދެ މިނިޓު ފަހުން ހާވޭ ބާރންސް ކާމިޔާބުކޮށްދިން ލަނޑުންނެވެ. މި ލަނޑު ޖެހިއިރު ބާރންސް އޮފްސައިޑް ވެފައިވާކަމަށް ގިނައިރުތަކެއް ވަންދެން ވީޑިއޯ އެސިސްޓެންޓް ރެފްރީން ވަނީ ވީޑިއޯތައް ބަލައިފައެވެ.
މި ނަތީޖާ އާއިއެކު ނިއުކާސަލް ޔުނައިޓެޑަށް ވަނީ ލީގުގައި މިޙާތަނަށް ކުޅުނު 12 މެޗުން ލިބިފައިވާ 15 ޕޮއިންޓާއެކު ތާވަލުގެ 14 ވަނަ އަށް އަރާފަ އެވެ. މެންޗެސްޓަރ ސިޓީ އޮތީ 22 ޕޮއިންޓާއެކު ތާވަލުގެ ތިންވަނައިގައެވެ.