ޖީ20ގެ ޤަރާރަށް އެމެރިކާއިން ދެކޮޅުހަދަމުން ދަނިކޮށް ދެކުނު އެފްރިކާއިން އެ ޤަރާރު ފާސްކޮށްފި
ދެކުނު އެފްރިކާގައި ކުރިއަށްދާ ޖީ20 ބައްދަލުވުމުގައި މޫސުމީ ކާރިޘާއާއި ދުނިޔެއަށް ކުރިމަތިވެފައިވާ ބޮޑެތި ގޮންޖެހުންތަކާ ގުޅޭގޮތުން ހުށަހަޅާފައިވާ ޤަރާރު ފާސްކޮށްފިއެވެ. ޖީ20ގައި އެ ޤަރާރު ފާސްކޮށްފައި ވަނީ އެމެރިކާއިން އެ ހުށަހެޅުމަށް ދެކޮޅުހަދަމުން ދަނިކޮށެވެ.
ދެކުނު އެފްރިކާއިން އެ ޤައުމުގައި އުޅޭ މީސްމަދު ދޮން މީހުންނާމެދު އިހާނެތިކޮށް ޢަމަލު ކުރާ ކަމަށް ތުހުމަތުކޮށް އެމެރިކާއިން ވަނީ ދެކުނު އެފްރިކާގައި މި އަހަރުގެ ޖީ20 ބައްދަލުވުން ބާއްވާތީ އެ ބައްދަލުވުމުގައި ބައިވެރިވުމަށް ދެކޮޅުހަދައިފައެވެ. އެމެރިކާގެ ޙިއްޞާއެއް ނެތި އެކުލަވާލި މި ޤަރާރަށް އެ ޤައުމުން ދެކޮޅު ހަދަމުންދަނިކޮށް ފާސްކުރުމާ ގުޅިގެން އެމެރިކާއިން ވަނީ ދެކުނު އެފްރިކާގައި މި އަހަރުގެ ޖީ20 ބައްދަލުވުން ބާއްވާތީ އެ ޤައުމުން އެ ކަމުގެ ނާޖާއިޒު ފައިދާ ނަގައި، ރިޔާސަތު “ހަތިޔާރަކަށް” ހަދާފައިވާ ކަމަށް ތުހުމަތުކޮށްފައެވެ.
ޖީ20ގެ ވެރިންގެ ޤަރާރު ޢާންމު ގޮތެއްގައި ފާސް ކުރަނީ ހުރިހާ ޤައުމެއްގެ އެއްބަސްވުމާ އެކުގައެވެ. އެމެރިކާއިން ބުނީ ޒަމާނުއްސުރެ ޢަމަލުކުރަމުންދިޔަ ގޮތަށް ދެކުުނު އެފްރިކާއިން ގޮން ޖަހާފައިވާ ކަމަށެވެ. މި އަހަރުގެ ޤަރާރުގައި މޫސުމީ ބަދަލުތަކުގެ ނުރައްކާތެރިކަން ފާހަގަކޮށް، އިއާދަކުރަނިވި ހަކަތައާ ގުޅޭ މުހިންމު އަމާޒުތަކަށް ހިތްވަރު ދީފައިވެއެވެ. އަދި ދަރަނީގެ ސަބަބުން ފަޤީރު ޤައުމުތަކަށް ކުރާ ބޮޑެތި އަސަރުތަކަށް އަލިއަޅުވާލާފައިވެއެވެ.
ދެކުނު އެފްރިކާގެ ރައީސް ސިރިލް ރަމަފޯސާގެ ތަރުޖަމާނުން ވިދާޅުވީ އެ ޤަރާރަށް ދެން ބަދަލު ނުގެނެވޭނެ ކަމަށެވެ. އެ ޤަރާރު އެކުލަވައިލުމަށް މުޅި އަހަރު މަސައްަކަތްކޮށްފައިވާ ކަމަށާއި، ފާއިތުވި ހަފްތާ ތެރޭގައި ވެސް ގިނަ އަދި އުނދަގޫ މަސައްކަތްތަކެއް ކޮށްފައިވާ ކަމަށް ރަމަފޯސާގެ ތަރުޖަމާނުން ވިދާޅުވިއެވެ.
އަންނަ އަހަރުގެ ޖީ20 ރިޔާސަތާ ޙަވާލުވަނީ އެމެރިކާއިންނެވެ. ޤަރާރު ފާސްކުރިތާ ގަޑިއިރުކޮޅެއް ފަހުަން އެމެރިކާއިން ވަނީ ޖީ20ގެ ރިޔާސަތު އޮމާންކަމާއެކު ޙަވާލުކުރުމަށް ދެކުނު އެފްރިކާއިން ދެކޮޅު ހަދަމުންދާ ކަމަށް ބުނެފައެވެ. އެމެރިކާއިން ދެކޮޅު ހަދަމުން ދަނިކޮށް ޤަރާރު ފާސްކުރުމާއި، ރިޔާސަތު ޙަވާލުކުރުމުގައި ޢަމަލުކުރަމުންދާ ގޮތުން ދޭހަކޮށްދެނީ ދެކުނު އެފްރިކާއިން ޖީ20ގެ ރިޔާސަތު ހަތިޔާރަކަށް ހަދާފައިވާ ކަން ކަމަށް ވައިޓް ހައުސްގެ ތަރުޖަމާނު އަނާ ކެލީ ވަނީ ވިދާޅުވެފައެވެ.