މުހިންމު ސަރަހައްދަކުން ބިމެއްދެއްވި ދެއްވުމުން ދޭހަކޮށްދެނީ ސްކޭޓިންއަށް ރައީސް ދެއްވާ އަހަންމިއްޔަތުކަން: ހާނިމް
މާލޭގައި އަލަށް ތަރައްޤީކުރަމުން އަންނަ ސްކޭޓިން އެރީނާ ހެދުމަށް އުސްފަސްގަނޑު ފަދަ މާލޭގެ މުހިންމު ސަރަހައްދަކުން ބިމެއްދެއްވި ދެއްވުމުން ދޭހަކޮށްދެނީ ސްކޭޓިންއަށް ރައީސުލްޖުމްހޫރިއްޔާ ޑރ. މުހަންމަދު މުޢިއްޒު ދެއްވާ އަހަންމިއްޔަތުކަންކަމަށް ސްކޭޓް މޯލްޑިްވްސް ރައީސް މުޙައްމަދު ހާނިމް ވިދާޅުވެއްޖެއެވެ.
މަސައްކަތް ހިނގަމުންދާ ސައިޓްގައި ހުންނަވާ ޕީއެސްއެމް ނިއުސްއާ ވާހަކަދައްކަވަމުން ހާނިމް ވިދާޅުވީ މާލޭގެ މިފަދަ މުހިންމު ސަރަހައްދެއްގައި ސްކޭޓް އެރީނާގެ މަސައްކަތް ކުރިއަށްގެންގޮސްފާނެކަމާމެދު ގިނަ ބަޔެއްގެ ހިތުގައި ޝައްކު އޮތްކަމަށެވެ. އެހެންނަމަވެސް އެ ސަރަހައްދުގައި ސްކޭޓް އެރީނާ އަޅުއްވަައިދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ދެއްވި ޔަގީންކަމާއެކު މިމަޝްރޫޢުގެ މަސައްކަތް ޢަމަލީގޮތުން ފެށިގެން ދިޔަ ދިއުމުން ދައްކުވައިދެނީ މި ކުޅިވަރަށް އެމަނިކުފާނު ދެއްވާ ޚާއްޞަ އަހަންމިއްޔަތުކަންކަމަށެވެ.
"މީހަކު ގަބޫލުވެސް ނުކުރާނެ، ހާއްސަކޮން އިންލައިން ސްކޭޓިންގެ އަޅުގަނޑުމެންގެ ބެލެނިވެރިންވެސް ތަކުރާރުކޮށް އަޅުގަނޑާ ދިމާއަށް ބުނަމުންވެސް ދިޔަ ހާނިމްއޭ ތިއީ ވަރށް ޕްރައިމް ލޮކޭޝަންއެކޭ. ޕްރައިމް ލޮކޭޝަނެއްގަ މިވަރުގެ ފެސިލިޓީއެއް ކުޅިވަރަށް ދިނުން އެއީ އެކުޅިވަރުގެ މުސްތަގުބަލަށް ލިބިގެން ދިޔަ ވަރަށް ބޮޑު ކުރިއެރުމެއް" ހާނިމް ވިދާޅުވިއެވެ.
ހާނިމް ވިދާޅުވީ މި ފެސިލިޓީގެ ފައިދާ މުޅި ދިވެހި މުޖުތަޢަށާއި މިކުޅިވަރު ކުޅޭ ކުދިންނަށް ލިބިގެންދާނެކަމަށެވެ. މި ސްކޭޓް އެރީނާއަކީ ރާއްޖޭގެ ވަރަށް ގިނަ އަދަދެއްގެ ތުއްތުކުދިންތަކެއް ކުަރަމުންދާ މަސައްކަތަކަށް ހުޅުވައިދިން މުހިންމު ދޮރެއްކަމަށް ގަބޫލުކުރައްވާކަމަށް ހާނިމް ވިދާޅުވިއެވެ.
ރައީސުލްޖުމްހޫރިއްޔާގެ އިސްނެންގެވުމުގެ ދަށުން ތަރައްގީކުރަމުންދާ ސްކޭޓް އެރީނާގެ ސަބަބުން މިހާރު މިކުޅިވަރުގައި ހަރަކާތްތެރިވަމުންދާ ތުއްތުކުދިން ތައްޔާރުވެގެންދާނީ ސްކޭޓިންގެ ތަފާތު ޖީލަކަށްކަމަށް ހާނިމް ވިދާޅުވިއެވެ.
މިފަދަ މުހިންމު ސަރަހައްދަކުން މި ކުޅިވަރަށް ބިމެއް ދެއްވުމުން ދޭހަކޮށްދެނީ ސަރުކާރުން މިކުޅިވަރު ކުރިއެރުވުމަށް ދެއްވާ އަހަންމިއްޔަތުކަންކަމަށްވާއިރު މިކަމަކީ އަގުނުކުރެވޭނެފަދަ މުހިންމު މަސައްކަތެއްކަމަށް ހާނިމް ސިފަކުރައްވާފަވެއެވެ.
"ރައީސުލްޖުމްހޫރިއްޔާ ޑރ. މުހަންމަދު މުޢިއްޒު އެ ނެންގެވި ޑެޒިޝަނަކީ މިކަހަލަ ކުޅިވަރެއް، އެކްސްޓްރީމް ސްޕޯޓެއް އަދި އޮލިމްޕިކް ސްޕޯޓެއް މިކުޅިވަރު ކުޅޭކުދިންނަށް މި ކުޅިވަރު ކުޅޭ ޢާއިލާއަށް އެއްކޮށް، އަޅުގަނޑުމެންނަށް އަގުނުކުރެވޭވަރުގެ ބޮޑު ޑެޒިޝަނެއް ނަންގަވާފަ މިވަރުގެ ބޮޑު ޕްރައިމް ލޮކޭޝަނަކުން ބިމެއް މިދެއްވީ" ހާނިމް ވިދާޅުވެފަވެއެވެ.
ރައީސުލްޖުމްހޫރިއްޔާ މި އެޅުއްވި މުހިންމު ފިޔަވަޅާއެކު ދިވެހި ސްކޭޓަރުންގެ ފެންވަރު އެތައް ގުނައަކަށް މައްޗަށް ޖެހިގެންދާނެކަމަށް ހާނިމް ފާހަގަކުރެއްވިއެވެ. މި ސްކޭޓް އެރީނާގެ ބޭނުން އެންމެ ހެޔޮގޮތުގައި ހިފާނެކަމަށާ އެތަނުން ތަމްރީނުވެގެން ނުކުންނަ ހުނަރުވެރި އެތައް ކުއްޖަކު ބައިނަލްއަޤްވާމީ މައިދާނުގައި ވާދަކޮށް ރާއްޖެއަށް ރީތި ނަން ހޯދާދޭނެކަމުގެ ޔަގީންކަން އެބައޮތްކަމަށް އޭނާ ހާމަކުރެއްވިއެވެ.
"އޭގެ ރިޓާން ގައިމުވެސް ގައުމެއްގެ ޕާސްޕެކްޓިވްއިން ބަލައިފިކަމަށް ވެއްޖިއްޔާމު މިކުދިން މިކުރާ މަސައްކަތުން ނަތީޖާ ނެރެގެން އައީމަ އެއީ ގައުމަށް ލިބިދޭ ރީތި ނަމެއް" ހާނިމް ވިދާޅުވިއެވެ.
ސްކޭޓިން އެރީނާ ފަރުމާކޮށްފަވަނީ އިންލައިން ސްކޭޓިންއަށް ޚާއްސަ ޖާގައަކާއި ސްކޭޓް ބޯޑް ދުއްވުމަށްވެސް ވަކިން ސަރަހައްދެއް ހިމެނޭގޮތަށްކަމަށްވާއިރު މިތަނުގެ ސަބަބުން މި ދެ ކުޅިވަރަށްވެސް އެތައް ގޮތަކުން ކުރިއެރުން އަންނާނެކަމަށް ހާނިމް ފާހަގަކުަރައްވާފަވެއެވެ.
އިންލައިން ސްކޭޓިންގައިވެސް 250 ވަރަކަށް ކުދިން މިހާރު ހަރަކާތްތެރިވަމުން އަންނައިރު އަލަށް ބިނާކުރަމުންދާ ސްކޭޓިން އެރީނާ ވެގެންދާނީ އެކުދިންގެ ކާމިޔާބީތަކާއި ގުޅިފައިވާ މުސްތަޤުބަލަށްކަމަށް ހާނިމް ވިދާޅުވިއެވެ.
"ސްކޭޓް ބޯޑް ހަދާ ކުދިންގެ ތެރެއިން އެތަނުގަ ސްޓަންޓުވެސް ބޭނުންކުރާ ކުދިން އުޅޭނެ. އެހެންވީމަ މީގަ މިހިމެނޭ ޑިސިޕްލިންތަކަށް އާދަޔާ ޚިލާފު ބޮޑު ކުރިއެރުމެއް އަންނާނެ. މީ ވަރަށް ގިނަ ދުވަހުގެ މުޅި ސްކޭޓް ކޮމިއުނިޓީގެ އިންތިޒާރެއް" ހާނިމް ވިދާޅުވެފަވެއެވެ.
ސްކޭޓިން އެރީނާގެ ބިންގާ އަޅައިފައިވަނީ މިއަހަރުގެ އޮކްޓޯބަރު މަހުގެ 2 ވަނަ ދުވަހުއެވެ. މި މަސައްކަތަކީ އާރްސީސީގެ ސީއެސްއާރުގެ ދަށުން ކުރިއަށްގެންދާ މަސައްކަތަކަށްވާއިރު އެފަރާތުން އަމާޒު ހިފާފަވަނީ މިއަހަރު ނިމުމުގެ ކުރިން މިމަޝްރޫޢުގެ މަސައްކަތް ނިންމާ ހަވާލުކުރުމަށެވެ.