ލަންކާގައި ބިންގަނޑު ކަނޑައިގެން ދިޔަ ސަރަޙައްދެއްގައި ތިބި 2 ދިވެއްސަކަށް އެހީތެރިކަން ދީފި

ސްރީލަންކާގައި ބިންގަނޑު ކަނޑައިގެން ދިޔަ ޙާދިސާއެއް ހިންގާފައިވާ ސަރަޙައްދެއްގައި ތިބި 2 ދިވެހިންނަށް އެހީތެރިކަންދީ ރައްކާތެރިކަން ފޯރުކޮށްދީފައިވާ ކަމަށް ލަންކާގައި ހުންނަ ދިވެހިރާއްޖޭގެ ހައިކޮމިޝަނުން ވިދާޅުވެއްޖެއެވެ.

ތޫފާނުގެ ސަބަބުން ލައްކާއަށް ދިމާވެފައިވާ ކާރިސާއާއި ގުޅިގެން އެޤައުމުގައި ތިބި ދިވެހި ރައްޔިތުންގެ ޙާލަތު ގާތުން ބަލާ އެހީތެރިކަން ދިނުމުގެ މަސައްކަތް މެދުކެނޑުމެއް ނެތި ދަނީ ކުރިއަށް ގެންދަމުންނެވެ.

ޕީއެސްއެމް ނިއުސްއަށް މަޢުލޫމާތު ޙިއްސާކުރައްވަމުން ދިވެހި ހައިކޮމިޝަނުން ވިދާޅުވީ، ރައްކާތެރިކަން ދީފައިވަނީ މާލަބެ ޑިސްޓްރިކްޓުގައި ދިރިއުޅޭ ދިވެހި މަންމައަކާއި، ދަރިފުޅަކަށް ކަމަށެވެ. އެ ސަރަޙައްދަށް ވަރަށް ބޮޑަށް މޫސުން ގޯސްވެ، ބިންގަނޑު ކަނޑައިގެން ގޮސް ފެންބޮޑުވުމުގެ ޙާލަތު ވަނީ ކުރިމަތިވެފައެވެ. މިއީ، ކޯރެއްގެ އައްސޭރިފަށުގެ ސަރަޙައްދެކެވެ.

މައުލޫމާތު ލިބޭ ގޮތުގައި އެއާއިލާ މިހާރުވަނީ، ހައިކޮމިޝަންގެ ބެލުމުގެ ދަށަށް ގެންގޮސްފައެވެ. އަދި މިމީހުންނަށް ބޭނުންވާ އެންމެހައި އެހީތެރިކަން އަންނަނީ، ފޯރުކޮށްދެމުންނެވެ.

މީގެއިތުރުންވެސް އެހީތެރިކަން ބޭނުންވާ މީހުން ވީހާވެސް އަވަހަކަށް ކޮމިޝަނަށް ގުޅައިގެން އެހީތެރިކަން ހޯދުމަށް، ކޮމިޝަންގެ ހޮޓްލައިން 6666 9476881+ އަށް ގުޅުމަށް ވަނީ ޢިލްތިމާސްކޮށްފައެވެ.

އަދި ލަންކާ ސަރުކާރާއި ކަމާއި ގުޅޭ އިދާރާތަކުގެ ޢިލްތިމާސްތަކަށް ދިވެހިން ޢަމަލު ކުރުމަށްވެސް ވަނީ އެދިފައެވެ.

މީގެއިތުރުން ފްލައިޓްތައް ކެންސަލްވުމާއި ޝެޑިއުލަށް އައިސްފައިވާ ބަދަލުތަކުގެ ސަބަބުން ނުފުރި އެއަރޕޯޓުތަކުގައި ތާށިވެފައި ތިބި ދިވެހިންވެސް، ދަތުރާއި ގުޅޭ މަޢުލޫމާތުތައް އޮޅުންފިލުވާ އިރުޝާދުތަކަށް ސަމާލުވުމަށް ވަނީ އެދިފައެވެ.