ދެ ކްރޫޒްލައިނާއިން ރާއްޖެއަށް 1056 ފަތުރުވެރިން!
-
ދެވަނަ ކްރޫޒްލައިނާ ރާއްޖެ އައީ ސްރީލަންކާގެ ކޮލަންބޯއިން
-
577 ފަތުރުވެރިންނާއި 496 ފަޅުވެރިން ރާއްޖެ އައި
މިއަހަރުގެ މިހާތަނަށް ރާއްޖެ އައި ދެ ކްރޫޒްލައިނާއިން 1056 ފަތުރުވެރިން އައިސްފައިވާކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.
ރާއްޖެއަށް އެންމެ ފަހުން އައިސްފައިވަނީ ސްރީލަންކާގެ ކޮލަންބޯއިން އައި ކްރޫޒްލައިނާއެކެވެ. މި ކްރޫޒްލައިނާ ރާއްޖެ އައިސްފައިވަނީ ހުކުރު ދުވަހުއެވެ.
މޯލްޑިވްސް އިމިގްރޭޝަނުން ވިދާޅުވީ، އެމްއެސް ކްރިސްޓަލް ސިމްޕަނީ ނަމަކަށް ކިޔާ މި ކްރޫޒްލައިނާއިން ރާއްޖެއަށް 577 ފަތުރުވެރިންނާއި، 496 ފަޅުވެރިން އައިސްފައިވާކަމަށެވެ. އިމިގްރޭޝަނުން ވަނީ މި އެންމެންނަށް ކްލިއަރެންސް ދީފައެވެ.
މި ކްރޫޒްލައިނާ ރާއްޖޭގައި އެއް ދުވަހަށް މަޑުކުރާނެއެވެ. ކްރޫޒްލައިނާއިން އައި ފަތުރުވެރިން ވަނީ މާލެއަށް ފައިބާފައެވެ. މިއީ މިއަހަރު ރާއްޖެ އައި 2 ވަނަ ކްރޫޒްލައިނާއެވެ. ފުރަތަމަ ރާއްޖެއައި ކްރޫޒްލައިނާ ރާއްޖެ އައީ ސޭޝެލްސްއިންނެވެ. މި ކްރޫޒްލައިނާއިން ރާއްޖެއަށް 479 ފަތުރުވެރިންނާއި 491 ފަޅުވެރިން ވަނީ އައިސްފައެވެ.
The Seaport Division officers successfully provided en-route immigration clearance services for 577 passengers and 496 crew members aboard MS Crystal Symphony, which arrived this morning from Colombo, Sri Lanka. pic.twitter.com/pAPUBsbvyq
— Maldives Immigration (@ImmigrationMV) January 23, 2026
ރާއްޖެއަށް ދޭތެރެ ދޭތެރެއިން ކްރޫޒްލައިނާތައް އާދެއެވެ. އަދި މި ކްރޫޒްލައިނާތައް މާލެއާއި އަދި އަތޮޅުތެރޭގެ ރަށްރަށަށް މަޑުކޮށް ފަތުރުވެރިންވެސް އެ ރަށްރަށަށް ފައިބައެވެ.
ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން މިއަހަރުގެ 20 ވަނަ ދުވަހުގެ ނިޔަލަށް ރާއްޖެއަށް 143،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރާ އަޅާބަލާއިރު %8.3 އިތުރު އަދަދެކެވެ.
ރާއްޖެއަށް މިހާރު އެންމެ ގިނައިން ފަތުރުވެރިން އަންނަނީ ރަޝިއާއިންނެވެ. އެ ޤައުމުން ރާއްޖެއަށް 21،000 އަށްވުރެ ގިނަ ފަތުރުވެރިން ވަނީ އައިސްފައެވެ. 2ވަނައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އިޓަލީވިލާތުންނެވެ. އެ ޤައުމުން ރާއްޖެއަށް 16،000 އަށްވުރެ ގިނަ ފަތުރުވެރިން ވަނީ އައިސްފައެވެ.