ފޮނަދޫގައި ރަސްމީކޮށް ޢީދު ފާހަގަކުރުމުގެ ހަރަކާތްތައް ފަށައިފި

ހައްދުންމަތީ ފޮނަދޫ ކައުންސިލާއި ޕީއެސްއެމް ގުޅިގެން ބާއްވާ ޕީއެސްއެމް ޢީދު އުފާ 1437 ރަސްމީކޮށް ފަށައިފިއެވެ.

ޢީދުގެ ހަރަކާތްތައް ފޮނަދޫގައި ރަސްމީކޮށް ފެށިގެން ދިޔައީ ޒަމާނުއްސުރެ އެރަށުގައި ޢީދު ފާހަގަކުރަމުން އަންނަ ގޮތަށެވެ. އީދު އުފާގެ ހަރަކާތްތަކުގެ ތެރެއިން ފޮނަދޫ ބަނދަރު ސަރަޙައްދުގައި ބޮޑު ޖަމާއަތުގައި ޢީދު ނަމާދުކުރުމާއި، ޢީދު ސަލާންކުރުން އަދި ޢީދު ސައިގެ ކަންތައް މިއަދުވަނީ ބާއްވާފައެވެ.

img:http://s1.psmnews.mv/images/660x400/14736626306101.jpg|ފޮނަދޫގައި ޢީދު ފާހަގަކުރުމަށް ބޭއްވި ކެއުމުގެ ތެރެއިން- ފޮޓޯ: ޕީއެސްއެމް

ޢީދު އުފާގެ ހަރަކާތްތައް ފެށިގެން ދިޔައީ "ބޮޑުބެ ރޯކުރުމާ" އެކުގައެވެ. މިއީ ޒަމާނުއްސުރެ ފޮނަދޫގައި ޢީދު އައިސްފިކަން އަންގައިދިނިމުގެ ގޮތުން ހިންގަމުން އަންނަ ކަމެކެވެ. "ބޮޑުބެ ރޯކުރުމަށް" ފަހު "ޢީދު ގެންގުރުމުގެ" ހަރަކާތް ކުރިޔަށް ގެންދިޔައެވެ. ބޮޑުބެރާއެކު ކުރިޔަސްގެންދިޔަ މިހަރަކާތަކީ ވަށްބުރަކަށް މީހުން އެތުރިގެން ތިބެ މެދުގައި ހުދު ފޮތިން ބަނދެފައި އިންނަ އެއްޗެއް ބަހައްޓައިގެން ނަށަމުންގޮސް އެ ނަގަންދެން ކުރިޔަށްގެންދާ ހަރަކާތެކެވެ. ޢީދު ގެންގުރުމަށްފަހު ހަތްކޮޅުގައި ރަށުގައި އެއިރެއްގައި އެންމެ އިސްކޮށް ހުންނަވާ ބޭފުޅަކު ޢީދު ހުއްދަ ދިންކަމުގެ ފަތްކޮޅު އަޑުއިއްވާ ޢީދު ފެށުމުގެ ހަރަކާތްތައް ކުރިޔަށް ގެންދިޔުމަށް ހުއްދަ ދެއްވަވާނެއެވެ. އެގޮތުން ފޮނަދޫ ކައުންސިލްގެ ރައިސް އަހުމަދު ރިޔާޒު ހަތްކޮޅުގައި ބޮޑުބެރުގެ ލަވަޔާއެކު ވަޑައިގެން ޢީދު ކުޅިވަރު ހަރަކާތްތައް ފެއްޓެވުމުގެ ހުއްދަ އިއްވަވައިދެއްވިއެވެ. ރިޔާޒާއިއެކު މި ހަތްކޮޅުގައި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވެސް ބައިވެރިވެ ވަޑައިގެންނެވިއެވެ.

img:http://s1.psmnews.mv/images/660x400/14736626671942.jpg|ފޮނަދޫގައި ޢީދު ފާހަގަކުރުމަށް ބޭއްވި ކެއުމުގެ ތެރެއިން- ފޮޓޯ: ޕީއެސްއެމް

ފޮނަދޫގެ 3 އަވަށުން ރޭ ވަނީ ސަގާފީ ނެށުންތައްވެސް ހުށަހަޅައިދީފައިވެއެވެ. އެގޮތުން ދަނޑި ޖެހުމާއި މާފަތި ނެށުމާއި ޢީދު ލަވައިގެ ހަރަކާތެއް ދައްކާލާފައިވެއެވެ. މީގެ އިތުރުން ބައިކް މޯލްޑިވްސް އިން މާދަމާ ބާއްވާ ފައިން އަބުރާ އަބުރާ 17 ކިލޯމީޓަރުގެ ހަރަކާތުގެ ޕްރޮމޯއެއް ދައްކާލާފައިވެއެވެ.

ޢީދު އުފާގެ ހަރަކާތްތަކުގެ ތެރެއިން މިއަދު ފޮނަދޫ ބަނދަރު ސަރަޙައްދުގައި ބޮޑު ޖަމާއަތުގައި ޢީދު ނަމާދުކުރުމާއި، ޢީދު ސަލާންކުރުން އަދި އީދު ސައިގެ ކަންތައް ބޭއްވިގެންދިޔައެވެ.