ސްޕެނިޝް ލަލީގާގައި ރޭ އޮވިއޭޑޯ އާއި ދެކޮޅަށް ބާސެލޯނާ ކުޅުނު މެޗު 3-0 ގެ ނަތީޖާއަކުން ބާސެލޯނާ މޮޅުވެ ތާވަލުގެ އެއްވަނަ މަގާމް އަލުން ހޯދައިފި އެވެ.
މި މެޗުން ބާސެލޯނާ މޮޅުވުމާއިއެކު އެ ޓީމަށް ވަނީ މިހާތަނަށް ކުޅުނު 21 މެޗުން ޖުމްލަ 52 ޕޮއިންޓާއެކު ތާވަލުގެ އެއްވަނަ މަގާމް ލިބިފަ އެވެ. ދެވަނައިގައި އޮތް ވާދަވެރި ރެއާލް މެޑްރިޑަށް ލިބިފައިވަނީ 51 ޕޮއިންޓެވެ.
ބާސެލޯނާގެ ސްޕޮޓިފައި ކޭމްޕް ނޫ ގައި ސާޅީސް ހަތަރު ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގައި ލަނޑެއް ކާމިޔާބު ކުރެވިފައިނުވި ނަމަވެސް ދެވަނަ ހަފުގެ ކުޅުން ފެށުނުތާ ހަތްވަނަ މިނިޓުގައި ޑެނީ އޮލްމޯ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
އަދި އޭގެ ފަސް މިނިޓު ފަހުން މެޗުގެ 57 ވަނަ މިނިޓުގައި ރަފީނިއާ ވަނީ އިތުރު ލަނޑެއް ޖަހާފަ އެވެ.
މި މެޗުގައި ބާސެލޯނާ އިން ޖެހި ތިންވަނަ ލަނޑަކީ ޑެނީ އޮލްމޯ ދިން ޕާހަކުން ލަމީން ޔަމާލް ކާމިޔާބުކޮށްދީފައިވާ ލަނޑެކެވެ.
ބާސެލޯނާ މި މެޗުން މޮޅުވިއިރު މިއީ ހެންސީ ފްލިކްގެ އިރުޝާދުގެ ދަށުން އެ ޓީމު އަމިއްލަ ދަނޑުގައި މޮޅުވި ދިހަވަނަ މެޗެވެ. މީގެ ކުރިން އެ ޓީމު އަމިއްލަ ދަނޑުގައި މި އަދަދަށް މޮޅުވެފައިވަނީ 2019 ވަނަ އަހަރު އެވެ.