ފޭދޫ ބަނދަރުގެ މަސައްކަތް މިއަހަރު ނިންމަނީ

އައްޑޫ ސިޓީ ފޭދޫ ބަނދަރު ތަރައްޤީ ކުރުމުގެ މަސައްކަތް މިއަހަރުގެ ފަހުކޮޅު ނިންމުމަށް މަސައްކަތް ކުރަމުންދާ ކަމަށް މަސައްކަތުގެ ކޮންޓްރެކްޓަރ، އެމްޓީސީސީން ވިދާޅުވެއްޖެއެވެ.

މިމަޝްރޫޢުގެ އަމަލީ މަސައްކަތް ފަށާފައިވަނީ، މިދިޔަ ނޮވެންބަރުމަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޑޫ ސިޓީއަށް ކުރެއްވި ދަތުރުފުޅުގެ ތެރެއިން ފޭދޫއަށް ވަޑައިގެންނެވެ.

އައްޑޫ ސިޓީގެ ގުޅިފައިވާ ރަށްރަށުގެ ތެރެއިން ފޭދޫއަކީ އާބާދީ ގޮތުން ބެލިނަމަވެސް މީހުން ގިނަ ރަށެއްކަން ފާހަގަކޮށްލެވެއެވެ. ފޭދޫ އޮންނަ ސަރަހައްދުގެ ގޮތުން އެރަށުގެ ބަނދަރަށް މުދާ އުފުލާ އެތައް ދޯނި ފަހަރެއް ވަދެ ނުކުމެ ހަދައެވެ. ބަނދަރުގެ ޖާގައިގެ މައްސަލައަކީ އެރަށުގެ ރައްޔިތުން އަބަދުވެސް ކުރަމުން އައި އެއްޝަކުވާއެވެ. ފޭދޫގައި މިހާރު އޮތް ބަނދަރަކީ، 771 މީޓަރު ދިގު 157 މީޓަރު ފުޅާ ބަނދަރެކެވެ. ބަނދަރުގެ ޖާގަ ކުޑަވުމުގެ ސަބަބުން ޖާގަ އިތުރު ކުރުމުގެ މަސައްކަތް ސަރުކާރުން އެމްޓީސީސީން ހަވާލުކުރައްވައިގެން އަންނަނީ ކުރަމުންނެވެ.

މި މަސައްކަތުގެ ދަށުން މިހާރު އޮތް ފަޅަށް 177 މީޓަރު އިތުރުކޮށް، 50 މީޓަރަށް ފުޅާ ކުރުމަަށް ވަނީ ހަމަޖެހިފައެވެ. އަދި 177 ސަރަޙައްދެއްގައި ކީވޯލް ޖަހައި، 516 މީޓަރު ސަރަޙައްދެއްގައި ހިލައިގެ ރިވެންޓްމަންޓު ޖެހުމުގެ އިތުރުން 2460 އަކަމީޓަރު ސަރަހައްދެއްގައި ޕޭމަންޓު ހަދައި، މަގުބައްތި ހަރުކޮށް، 83000 އަކަމީޓަރު ފުން ކުރުމަށްވެސް ހަމަޖެހިފައިވާ ކަމަށް އެމްޓީސީސީން ވިދާޅުވިއެވެ. އެމްޓީސީސީން ވިދާޅުވީ، އަމާޒަކީ މިއަހަރުގެ ފަހުކޮޅު މި މަސައްކަތް ނިންމާ ބަނދަރު ބޭނުންކުރަން ފެށުން ކަމަށެވެ.

" އެގްރިމަންޓު އޮތީ 680 ދުވަހުން ނިންމާ ގޮތަށް. އެހެންނަމަވެސް އަޅުގަނޑުމެން އެމްޓީސީސީން ޓާގެޓް ކުރަނީ 300 ދުވަސް ތެރޭގައި މަސައްކަތް ނިންމުމަށް. ޑިސެންބަރުގެ ތެރޭގައި މަސައްކަތް ނިންމާ ރައްޔިތުންނަށް ދޫކުރުން އަމާޒަކީ" ފޭދޫ އެމްޓީސީސީ ސައިޓް މެނޭޖަރ ޖަވާދު ޢަލީ ވިދާޅުވިއެވެ.

އުމްރާނީ ގޮތުން ރަށެއްގައި މަސައްކަތެއް ކުރާއިރު، އެމަސައްކަތް ނިމި ބޭނުން ކުރަން ފެށުމުން އޭގެ އެންމެ ބޮޑު ފައިދާއެއް ކުރާނީ އެރަށެއްގައި ދިރިއުޅޭ ރައްޔިތުންނަށެވެ. ޕީއެސްއެމް ނިއުސްއާ ވާހަކަދެއްކި އެރަށުގެ ރައްޔިތުން ބުނީ މިބަނދަރުގެ މަސައްކަތް ނިމުމުން ވަރަށްބޮޑު ލުއިފަސޭހަތައް ލިބޭނެ ކަމަށެވެ.

" މި ބަނދަރުގެ މަސައްކަތް ނިމިގެން ދިޔުމުން ވަރަށް ފަސޭހަވެގެންދާނެ. ޚާއްސަކޮށް މި ސަރަހައްދުގެ ރައްޔިތުންނަށް މި ބަނދަރުގެ ސަބަބުން ލުއިފަސޭހަތައް ވެގެންދާނެ ކަމަށް އުންމީދުކުރެވޭ" ފޭދޫ ރައްޔިތަކު ވިދާޅުވިއެވެ.

އަތޮޅުތެރޭގެ ރައްޔިތުންގެ ކަންބޮޑުވުންތައް އަޑުއަހައި އެކަންކަން ޙައްލު ކޮށްދެއްވުމަކީ، އަދުގެ ސަރުކާރުގެ އެންމެ ބޮޑު އެއް އަމާޒެވެ. އެގޮތުން ސަރުކާރުން ދަނީ، އެކި ރަށްރަށުގައި އުމްރާނީ ތަފާތު މަޝްރޫއުތައް ހިނގަމުންނެވެ.