ޔޫއެފާ ޗެމްޕިއަންސް ލީގުގައި ރޭ ސްޕެއިންގެ ރެއާލް މެޑްރިޑް އާއި ދެކޮޅަށް ބެންފީކާ ކުޅޫނު މެޗު 4-2 ގެ ނަތީޖާއަކުން ރެއާލް މެޑްރިޑް ބަލިކޮށް ބެންފީކާ އިން ޕްލޭއޮފްގެ ޖާގައެއް ހޯދައިފި އެވެ.
މި ނަތީޖާ އާއިއެކު ރެއާލް މެޑްރިޑަށް ވަނީ ގަދަ އަށެއްގައި ހިމެނި ދެވަނަ ބުރުގެ ސީދާ ޖާގައެއް ހޯދުމުގެ ފުރުސަތު ގެއްލި ޕްލޭއޮފް މެޗެއް ކުޅެން ޖެހިފަ އެވެ. ފުރަތަމަ ބުރުގައި ރެއާލް މެޑްރިޑް ކުޅުނު 8 މެޗުން އެ ޓީމަށް ލިބިފައިވާ 15 ޕޮއިންޓާއެކު އޮތީ ތާވަލުގެ 9 ވަނައިގަ އެވެ. އަދި ބެންފީކާ އަށް 8 މެޗުން ލިބިފައިވާ 9 ޕޮއިންޓާއެކު ވަނީ 24 ވަނަ މަގާމް ހޯދާފަ އެވެ.
ޗެމްޕިއަންސް ލީގުގެ ފުރަތަމަ ބުރުގެ ގަދަ އަށް ޓީމަށް ދެވަނަ ބުރުގެ ސީދާ ޖާގައެއް ލިބިގެންދާއިރު ނުވަ އަކުން 24 ވަނަ އަށް ދާ ޓީމުތަކަށް ޖެހޭނީ ޕްލޭއޮފް އިތުރު މެޗެއް ކުޅުމަށެވެ.
ރެއާލް މެޑްރިޑަށް ކުރިން އެތަކެއް ކާމިޔާބީތަކެއް ހޯދަދީފައިވާ ހޯސޭ މޮރީނިއޯގެ އިރުޝާދުގެ ދަށުން އަމިއްލަ ދަނޑުގައި ބެންފީކާ ކުޅުނު މި މެޗުގެ 30 ވަނަ މިނިޓުގައި ކިލިއަން އެމްބާޕޭ ވަނީ ލަނޑެއް ޖަހާ ރެއާލް އަށް ކުރި ހޯދަދީފަ އެވެ.
ނަމަވެސް އޭގެ ހަ މިނިޓު ފަހުން ބެންފީކާގެ އެންޑްރިއަސް ޝެލްޑްރަޕް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. އަދި ފުރަތަމަ ހާފުގެ އިންޖަރީ ވަގުތުގައި ވެންގެލިސް ޕަވްލިޑިސް ވަނީ ލަނޑެއް ޖަހާ ބެންފީކާ އަށް ކުރި ހޯދަދީފަ އެވެ.
މެޗުގެ ދެވަނަ ހާފުގެ ކުޅުން ފެށުނުތާ ނުވަވަނަ މިނިޓުގައި ޝެލްޑްރަޕް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
ރެއާލް މެޑްރިޑް އިން މި މެޗުގައި ޖެޖި ދެވަނަ ލަނޑަކީ މެޗުގެ 58 ވަނަ މިނިޓުގައި ކިލިއަން އެމްބާޕޭ ކާމިޔާބުކޮށްދިން ލަނޑެކެވެ. މި ލަނޑާއެކު އޭނާ ވަނީ ޗެމްޕިއަންސް ލީގުގެ ފުރަތަމަ ބުރުގައި 13 ލަނޑު ޖަހާފަ އެވެ.
ވާދަވެރި ކުޅުމެއް ފެނިގެން ގޮސްފައިވާ މި މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގެ ކުޅުމުގައި ރެއާލް މެޑްރިޑްގެ ރައުލް އަސެންސިއޯ އާއި ރޮޑްރިގޯ އަށް ދެވަނަ ރީނދޫ ކާޑަކާއިއެކު ރެފްރީ ވަނީ ރަތް ކާޑު ދައްކާ ދަނޑުން ފޮނުވާލާފަ އެވެ.
އަދި މެޗުގެ ފުރިހަމަ ވަގުތު ހަމަމުވުމުގެ ކުރިން ބެންފީކާ އިން ވަނީ ތާރީޚީ ލަނޑެއް ޖަހާފަ އެވެ. އެއީ ބެންފީކާގެ ގޯލުކީޕަރު އެނެޓޮލީ ޓްރުބިން މެޗުގެ 98 ވަނަ މިނިޓުގައި އެ ޓީމަށް ލިބުނު ހިލޭ ޖެހުމެއް ބޮލުން ޖަހާ ގޯލުގެ ތެރެއަށް ފޮނުވާލައިގެން ކާމިޔާބުކޮށްދިން ލަނޑެވެ.