ޔޫއެފާ ޗެމްޕިއަންސް ލީގުގެ ފުރަތަމަ ބުރުގައި ކުޅުނު އެންމެ ފަހު މެޗުގައި ކައިރަޓް އަތުން ވެސް މޮޅުވެ، އިނގިރޭސި ޕްރިމިއަރ ލީގުގެ އާސެނަލް އިން ތާވަލުގެ އެއްވަނައިގެ ގޮތުގައި މުބާރާތުގެ ނޮކްއައުޓް ބުރުން ޖާގަ ހޯދައިފިއެވެ.
ކަޒަކިސްތާނުގެ ކައިރަޓްއާ ދެކޮޅަށް އަމިއްލަ ދަނޑުގައި ކުޅެ އާސެނަލް މި މެޗުން މޮޅުވީ 2-3 ގެ ނަތީޖާއަކުންނެވެ.ވާދަވެރި ކުޅުމެއް ދެ ޓީމުގެ ފަރާތުން ވެސް ފެނިގެންދިޔަ މި މެޗުގެ ވަރަށް ކުރީކޮޅު ދެ ލަނޑެއް ފެނިގެންދިޔައެވެ. މެޗުގެ ދެވަނަ މިނެޓުގައި، ފުރަތަމަ ލަނޑު ޖަހައި ލީޑުނެގީ އާސެނަލް އިންނެވެ. މި ލަނޑު އެޓީމަށް ކާމިޔާބުކޮށްދިނީ ވިކްޓޯ ގްޔޮކޮރެސްއެވެ.
އޭގެ ފަސް މިނެޓުފަހުން، ލިބުނު ޕެނަލްޓީއެއްގައި ކައިރަޓް ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޖޯޖީނިއޯ އެވެ.
ރަނގަޅު ފޯމެއްގައި އޮތް އާސެނަލް އިން ވަނީ އޭގެ އަށް މިނެޓުފަހުން، މެޗުގެ 15 ވަނަ މިނެޓުގައި ދެވަނަ ފަހަރަށް ލީޑުނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކައި ހަވާޓްސްއެވެ. މިއީ ފާއިތުވީ އަހަރެއްހައި ދުވަހުގެ ތެރޭގައި، އާސެނަލްގެ ފުރަތަމަ 11 ގައި ހިމެނިގެން ކައި ހަވާޓްސް ކުޅުނު ފުރަތަމަ މެޗެވެ.
އާސެނަލް އިން ވަނީ މި ހާފުގައި، ގެބްރިއެލް މާޓިނެލީ ޖަހައިދިން ލަނޑާއެކު މެޗުގައި ލީޑުފުޅާކޮށްފައެވެ.
ދެ ލަނޑުގެ ލީޑެއްގައި އޮވެ އާސެނަލް އިން ދެވަނަ ހާފު ފެށިއިރު، މި ހާފުގެ ބޮޑުބައެއްގައި ލަނޑެއް ފެނިގެން ނުދެއެވެ. މި ހާފުގައި ފެނިގެންދިޔަ ހަމައެކަނި ލަނޑު އަދި ކައިރަޓްއިން މެޗުގައި ފަރަގުކުޑަކުރި ލަނޑު، މެޗުގެ ފުރިހަމަވަގުތު ހަމަވެ ދެއްކި އިތުރުވަގުތުގެ ހަތަރުވަނަ މިނެޓުގައި ކާމިޔާބުކޮށްދިނީ ރިކާޑީނިއޯއެވެ.
މި މޮޅާއެކު އާސެނަލްއިން އެއްވަނައިގެ ގޮތުގައި ދެވަނަ ބުރުގެ ޖާގައެއް ހޯދާފައި ވަނީ ސައްތައިންސައްތަ މޮޅުވުމުގެ ރެކޯޑަކާއެކުގައިކަން ފާހަގަކޮށްލެވެއެވެ. އާސެނަލްއިން ވަނީ މި ބުރުގައި ކުޅުނު އަށް މެޗުންވެސް މޮޅުވެފައެވެ.