މޮރޮކޯ 6 ލައްކަ ޑޮލަރުން، ސެނެގާލަށް 7 ލައްކަ ޑޮލަރުން ޖޫރިމަނާ، ކޯޗު ފަސް މެޗަށް ސަސްޕެންޑް

އެފްރިކާ ކަޕް ފުޓްބޯޅަ މުބާރުގެ ފައިނަލް މެޗުގައި ހިނގައިދިޔަ ކުޅިވަރުގެ ރޫހާ ހިލާފު އަމަލުތަކުގެ ސަބަބުން މޮރޮކޯ އާއި ސެނަގާލް ޖޫރިމަނާކޮށް ސެންގާލްގެ ކޯޗު ޕާޕާ ފިއޯ 5 މެޗަށް ސަސްޕެންޑްކޮށްފި އެވެ.

ސެނަގާލްގެ ކޯޗު ފަސް މެޗަށް ސަސްޕެންޑް ކުރުމުގެ އިތުރަށް އެއްލައްކަ ޑޮލަރުން އޭނާ ޖޫރިމަނާ ކުރަން ވަނީ ނިންމާފަ އެވެ. އޭނާ ސަސްޕެންޑްކޮށް ޖޫރިމަނާ ކުރީ ޓީމު ދަނޑުން ބޭލި މައްސަލާގަ އެވެ. ކޯޗު ވަނީ ފައިނަލް މެޗަށް ފަހު މިކަމަށް މައާފަށް ވެސް އެދިފަ އެވެ.

މީގެ އިތުރުން ސެނަގާލްގެ ދެ ކުޅުންތެރިން ކަމަށްވާ އެންޑިއާއޭ އާއި އިސްމާއީލާ ސަރް ވަނީ ދެ މެޗަށް ވަނީ ސަސްޕެންޑްކޮށްފަ އެވެ. އެއީ ކުޅިވަރުގެ ރޫހާ ހިލާފު އަމަލުތައް ކުރުމުގެ ސަބަބުންނެވެ.

މީގެ އިތުރުން ސެނަގާލް ފުޓްބޯޅަ ފެޑަރޭޝަން ވަނީ 615000 ޑޮލަރުން ޖޫރިމަނާކޮށްފަ އެވެ. އެއީ ސަޕޯޓަރުންގެ ހިންގި ބައެއް ހަމަނުޖެހުންތަކާ ގުޅިގެން 3 ލައްކަ ޑޮލަރު، އަދި ބައެއް ކުޅުންތެރިންނާއި އޮފިޝަލުންގެ ނޭދެވޭ އަމަލުތަކުގެ ސަބަބުން ތިން ލައްކަ ޑޮލަރު އަދި ފަސް ކުޅުންތެރިއަކު ފައިނަލް މެޗުގައި ރީނދޫ ކާޑު ހޯދާފައިވާތީވެ 15000 ޑޮލަރުގެ ޖޫރިމަނާއެކެވެ.

ސެނަގާލަށް ދިން އަދަބުތައް:

1. ކޯޗު ފަސް މެޗަށް ސަސްޕެންޑްކޮށް އެއް ލައްކަ ޑޮލަރުން ޖޫރިމަނާ
2. ދެ ކުޅުންތެރިއަކު ދެ މެޗަކަށް ސަސްޕެންޑްކުރި
3. ސަޕޯޓަރުން ހަމަނުޖެހުން ހިންގުމުން ތިން ލައްކަ ޑޮލަރުން ޖޫރިމަނާ
4. އޮފިޝަލުންނާއި ކުޅުންތެރިންގެ ބޭއަދަބީކޮށް އުޅުމުން ތިން ލައްކަ ޑޮލަރުން ޖޫރިމަނާ
5. ފަސް ކުޅުންތެރިއަކު ރީނދޫ ކާޑު ހޯދުމުން ފަނަރަ ހާސް ޑޮލަރުން ޖޫރިމަނާ

މޮރޮކޯގެ ކެޕްޓަން އަޝްރަފް ހަކީމީ ވަނީ އެފްރިކާގެ ފެޑަރޭޝަނުން އިންތިޒާމް ކުރާ ދެ މެޗަކަށް ސަސްޕެންޑްކޮށްފަ އެވެ. ނަމަވެސް މީގެ ތެރެއިން އެއް މެޗުގެ އަދަބު ތަންފީޒު ކުރުން ވަނީ އެއް އަހަރަށް ފަސްކޮށްދީފަ އެވެ. މީގެ އިތުރުން މިޑްފީލްޑަރު އިސްމާއީލް ސައިބާރީ ވަނި ތިން މެޗަށް ސަސްޕެންޑްކޮށް، އެއްލައްކަ ޑޮލަރުން ޖޫރިމަނާ ކޮށްފަ އެވެ. އެއީ ފައިނަލް މެޗުގައި ސެނަގާލްގެ ކީޕަރުގެ ތުވާލި އަތުލަން އުޅުމުގެ ތެރޭގައި އޭނާގެ އަމަލުތައް ނޭދެވޭ ގޮތުގެ ސަބަބުންނެވެ.

މި ތުވާލި އަތުލަން އުޅުމުގައި ދަނޑުގައި ތިބި ބޯޅަ ހޮވާ ކުދިން ބައިވެރިވެ، ސެނަގާލްގެ ބަދަލު ކީޕަރު ބިމާ ހަމަކޮށްލުމާ ގުޅިގެން މޮރޮކޯގެ ފުޓްބޯޅަ ފެޑަރޭޝަން ވަނީ ދެ ލައްކަ ޑޮލަރުން ޖޫރިމަނާ ކޮށްފަ އެވެ. މީގެ އިތުރުން ރެފްރީ ވީއޭއާރު ބަލަން އުޅުނު ވަގުތު އޭނާ ވަށާލައިގެން މޮރޮކޯގެ އޮފިޝަލުންނާއި ކުޅުންތެރިން ރެފްރީގެ ނިންމުންތަކަށް ނުފޫޒު ފޯރުވަން އުޅުނު ކަމަށް ބަލައި ވަނީ އެއް ލައްކަ ޑޮލަރުން ޖޫރިމަނާކޮށްފަ އެވެ. އަދި މޮރޮކޯގެ ސަޕޯޓަރުން ދަނޑުތެރޭގައި ލޭޒާ ބޭނުންކޮށްފައިވާތީވެ 15000 ޑޮލަރުން ވަނީ ޖޫރިމަނާކޮށްފަ އެވެ.

މޮރޮކޯއަށް ދިން އަދަބުތައް:

1. ކެޕްޓަން އަޝްރަފް ހަކީމީ ދެ މެޗަށް ސަސްޕެންޑް
2. އިސްމާއީލް ސައިބާރީ ތިން މެޗަށް ސަސްޕެންޑްކޮށް، ތިން ލައްކަ ޑޮލަރުން ޖޫރިމަނާ
3. ބޯޅަ ހޮވާ ކުދިންގެ ނޭދެވޭ އަމަލުތަކުގެ ސަބަބުން ދެ ލައްކަ ޑޮލަރުން ޖޫރިމަނާ
4. އޮފިޝަލުންނާއި ކުޅުންތެރިން ރެފްރީ އަށް ނުފޫޒު ފޯރުވަން އުޅުމުން އެއް ލައްކަ ޑޮލަރުން ޖޫރިމަނާ
5. ސަޕޯޓަރުން ލޭޒާ އަލި އެޅުވުމުން ފަނަރަ ހާސް ޑޮލަރުން ޖޫރިމަނާ

އެފްރިކާގެ ފުޓްބޯޅަ ޖަމިއްޔާގެ ޑިސިޕްލިނަރީ ބޯޑުން ނިންމުންތައް ނިންމާފައިވަނީ ދެ ގައުމުގެ ކުޅުންތެރިންނާއި އޮފިޝަލުންނާއި ސަޕޯޓަރުން ވެސް ކުޅިވަރުގެ ރޫހާ ހިލާފުވުމާއި، ކަރާމާތް ނަގާލުމާއި، އިހްތިރާމް ގެއްލުވާލާފައިވާކަން ފާހަގަ ކުރެވުމުން ކަމަށެވެ. ނަމަވެސް މޮރޮކޯއިން މި މެޗުގެ ނަތީޖާ ބަދަލުކޮށްދޭން އެދިފައިވީ ނަމަވެސް އެ މައްސަލަ ވަނީ ބޭރުކޮށްލައިފަ އެވެ.

އަމިއްލަ ގައުމުގައި ތަށި ހޯދަން ނުކުތް މޮރޮކޯ ބަލިކޮށް ސެނަގާލް ތަށި ހޯދީ ފައިނަލް މެޗުގެ އިތުރު ވަގުތު މެޗު ނުކުޅެން ދަނޑުން ބޭރުމަށްފަހު 20 މިނިޓް ފަހުން އަލުން ކުޅެން ނުކުމެ ޖެހި ގޯލާއެކު 1-0އިންނެވެ. އެ ގައުމުން ދަނޑުން ފޭބީ ސެނަގާލް ޖެހި ގޯލެއް ގަބޫލުނުކޮށް މެޗުގެ ފަހު މިނިޓްގައި ރެފްރީ މޮރޮކޯ އަށް ޕެނަލްޓީ އެއް ދިނުމުންނެވެ