އީރާނަށް ޙަމަލާ ދޭން ޖެހިދާނެ ކަމުގައި ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އެންމެ ފަހުން ދެއްވި އިންޒާރަށް އީރާނުން ރައްދު ދީފިއެވެ. އިރާންގެ ޚާރިޖީ ވަޒީރު ޢައްބާސް ޢަރާޤިޖީ ވިދާޅުވީ، އެމެރިކާއިން އެ ޤައުމާ ދެކޮޅަށް އެއްވެސް ޙަމަލާއެއް ދީފި ނަމަ، ބަދަލުގައި ބާރާ އެކު ވަގުތުން ރައްދު ޙަމަލާ ދިނުމަށް އެ ޤައުމުގެ އަސްކަރިއްޔާއިން ފުރިހަމައަށް ތައްޔާރަށް އޮތް ކަމުގައެވެ.
ޓްރަމްޕަށް ޢަރާޤިޖީ ރައްދު ދެއްވާފައި މި ވަނީ، އީރާންގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމާ ގުޅޭ ގޮތުން އެމެރިކާއާ އެކު އެއްބަސްވުމެއް އެކުލަވައިލުމަށް އީރާނުން އިންކާރު ކުރަމުންދާ ނަމަ އެ ޤައުމާ ދެކޮޅަށް އަސްކަރީ ބާރުގެ ބޭނުން ކުރަން ޖެހިދާނެ ކަމުގައި ވިދާޅުވެ ޓްރަމްޕް އިންޒާރު ދެއްވުމާ ގުޅިގެންނެވެ. އަދި، އީރާނަށް ދެން ދޭ ޙަމަލާއެއް، މީގެ ކުރިން ދީފައިވާ ޙަމަލާތަކަށް ވުރެ، ވަރުގަދަ ވާނެ ކަމުގައި ވެސް ޓްރަމްޕް ވިދާޅުވެފައިވެއެވެ.
"އަޅުގަނޑުމެންގެ (އީރާންގެ) ލޮބުވެތި ފަސްގަނޑާއި، ވަޔާއި ކަނޑުގެ ސަރަޙައްދާ ދެކޮޅަށް ދޭ އެއްވެސް ޙަމަލާއަކަށް ގަދަފަދަ ކަމާ އެކު ރައްދު ދިނުމަށް އަޅުގަނޑުމެންގެ ހިތްވަރު ގަދަ އަސްކަރިއްޔާއިން އޮތީ ތައްޔާރަށް،" މީސްމީޑިޔާގައި ޝާއިޢު ކުރެއްވި ޕޯސްޓެއްގައި ޓްރަމްޕަށް ރައްދު ދެއްވަމުން ޢަރާޤިޖީ ލިޔުއްވިއެވެ.
އޭނާ ވިދާޅުވީ، ހުސްވި އަހަރުގެ ޖޫން މަހު ޔަހޫދީ ދަޢުލަތް، އިސްރާއީލުން އީރާނާ ދެކޮޅަށް ހިންގި ޢުދުވާނީ ޙަމަލާތަކުގެ ތެރެއިން އެ ޤައުމަށް އަގުބޮޑު ފިލާވަޅެއް ދަސްވެފައިވާ ކަމުގައެވެ. ޔަހޫދީންގެ ޙަމަލާތަކުގައި އެ މީހުންގެ އެންމެ ބޮޑު މަދަދުގާރު ކަމުގައިވާ އެމެރިކާއިން ވެސް ބައިވެރިވިއެވެ. އަދި، އީރާންގެ ނިއުކްލިޔަރ މަޝްރޫޢުތަކަށް ހިންގާ މައި މަރުކަޒުތަކަށް އެމެރިކާގެ އަސްކަރިއްޔާއިން ވަނީ ޙަމަލާތަކެއް ދީފައެވެ.
"ބިޔަ ލަޝްކަރެއް އެ ދަނީ އީރާނާ ދިމާއަށް ދަތުރު ކުރަމުން،" މީސްމީޑިޔާގައި އީރާނަށް އިންޒާރު ދެއްވައި ކުރެއްވި ޕޯސްޓުގައި ޓްރަމްޕް ލިޔުއްވާފައިވެއެވެ. އަދި އުންމީދަކީ، އެމެރިކާއާއި އީރާނާ ދެމެދު އެއްބަސްވުމެއް އެކުލަވައިލުމަށް މަޝްވަރާގެ މޭޒު ދޮށަށް އީރާނުން އައުން ކަމުގައި ވެސް ޓްރަމްޕް ވިދާޅުވިއެވެ. ދެ ޤައުމުގެ ދެމެދުގައި އެކުލަވައިލެވޭ އެއްވެސް އެއްބަސްވުމެއްގެ ދަށުން ނިއުކްލިޔަރ ހަތިޔާރު އުފެއްދުމުގެ ފުރުޞަތު އީރާނަށް ނޯންނާނެ ކަމުގައި ވެސް ޓްރަމްޕް ލިޔުއްވިއެވެ.
ޓްރަމްޕްގެ އަމުރަށް އެމެރިކާގެ އަސްކަރީ މަތިންދާބޯޓު އުފުލާ މަނަވަރު، ޔޫއެސްއެސް އެބްރަހަމް ލިންކަން އަދި އެ މަނަވަރާ އެކު ދަތުރު ކުރާ އިތުރު މަނަވަރުތައް ވަނީ މެދުއިރުމައްޗަށް ދަތުރު ކޮށްފައެވެ. މަސްރަޙު ދިރާސާ ކުރައްވާ ބޭފުޅެއް ކަމުގައިވާ ޤަޠަރު ޔުނިވަރސިޓީގެ ބައިނަލްއަޤްވާމީ ގުޅުންތަކާ ބެހޭ ޕްރޮފެސަރ އަދްނާން ޙަޔާޖިނާ ވިދާޅުވީ، އީރާން ކައިރިއަށް ބިޔަ ލަޝްކަރެއް ޓްރަމްޕް ފޮނުއްވާފައި މި ވަނީ އެމެރިކާގެ އަސްކަރީ ބާރުވެރިކަން ދައްކައިލުމަށް ކަމުގައެވެ. އަދި، ބޭނުމަކީ އެމެރިކާއާ އެކު މަޝްވަރާތައް އަލުން ފެށުމަށް އީރަނަށް ބާރުއެޅުން ކަމުގައެވެ.