ފަހުވަގުތު ގްރީން ހިފަހައްޓައިފި

ދިވެހި ޕްރިމިއަރ ލީގުގައި ކުލަބް އީގަލްސް ފަހު ވަގުތު ޖެހި ލަނޑާއެކު ކުލަބު ގްރީން ސްޓްރީޓްސް އަށް ޝޮކެއްލިބިއްޖެއެވެ. މި ދެޓީމް ވާދކުރި މެޗު ނިމުނީ 1-1 އެއްވަރުވެގެންނެވެ.

މިމެޗުން ގްރީން މޮޅުވާން ދަނިކޮށް އީގަލްސް އިން އެއްވަރު ކުރި އިރު ގްރީން މޮޅުވި ނަމަ އަންނަ ސީޒަންގެ ލީގު ޕްލޭއޮފް އަށް އެޓީމު ކޮލިފައިވެފަ ޔުނައިޓެޑް ވިކްޓަރީ ރެލިގޭޓް ވާނެއެވެ.
ދިވެހި ޕްރިމިއަރ ލީގުގައި ދެމިއޮތުމަށް ތިން ޓީމެއްގެ މެދުގައި ވާދަވެރިކަން ބޮޑު ވެފަވާ އިރު ކުލަބު ވެލެންސިއާ އާއި ގްރީންގެ އިތުރުން ޔޫވީ އަށް ވެސް އަދި ފުރުސަތު އެބައޮތެވެ. އެހެން ނަމަވެސް އެއީ ކުރިއަށް އޮތް މެޗު ކާމިޔާބު ކޮށްގެންނެވެ.

މި ނަތީޖާ އެކު ގްރީން އަށް ވަނީ 17 މެޗުން 12 ޕޮއިންޓު ލިބިފައެވެ. ގްރީން މިވަގުތު އޮތީ ތާވަލުގެ 7 ވަނައިގައެވެ.

ރަސްމީ ބޯޅަދަނޑުގައި ކުޅުނު މެޗުގެ ފުރަތަމަ ހާފުގައި މާބޮޑު ފޯރިއެއް ނެތްއިރު، ލަނޑުޖަހަން ފުރުސަތު ތަކެއް ހޯދިފައެއް ނުވެއެވެ. މެޗުގެ 6 ވަނަ މިނިޓުގެ ތެރޭގައި އިބްރާހިމް މަހުދީ ފޮނުވާލި ބޯޅައެއް ދަނޑިމަތިން ދިޔައިރު، ގްރީންގެ ރިލްވާން ވަހީދު ދިން ބޯޅައެއް އެޓީމުގެ މިސްރު ފޯވާޑް އެލް ސައީދު އަށް ވަނީ ބޭނުން ހިފޭގޮތް ނުވެފައެވެ.

މެޗުގެ ފުރަތަމަ ހާފުގެ އިތުރު ވަގުތުތެރޭގައި ގްރީންގެ ރިލްވާން އޭރިއާ ތެރެއިން ފޮނުވާލި ބޯޅަ ސަލާމަތް ކުރީ އީގަލްސްގެ ބިދޭސީ ޑިފެންޑަރ އަބްދުލް މަލިކްއެވެ.

ދެވަނަ ހާފު ފަށައިގެން ތިންވަނަ މިނިޓުގައި އީގަލްސްގެ ޒައިން ޒަފަރް އޭރިއާ ބޭރުން ފޮނުވާލި ބޯޅަ ކީޕަރު ވަނީ އަތުލާފައެވެ. ގްރީން އިން ލަނޑުޖެހީ މެޗުގެ އެންމެ ފަހު މިނިޓުގައި ރިލްވާން ނަގައިދިން ކޯނަރެއްގައި ބިދޭސީ ޑިފެންޑަރ ޝުހުރު އަލީ ވަނީ ބޮލުން ގޯލުގެ ތެރެއަށް ވައްދާލައިގެންނެވެ.

އީގަލްސް އިން ނަތީޖާ ހަމަހަމަ ކުރީ އިތުރުވަގުތުގެ އެންމެ ފަހު މިނިޓުގައި އޭރިއާ ތެރެއިން ޝަމްވީލް ގާސިމް އަށް ލބުނު ބޯޅައެއް އެޓީމުގި ހިސާމް ސަލީމަށް ޖައްސާލުމުން އޭރިއާތެރެއިން އަރިމަތިން ގޯލަށް ވައްދާލި ބޯޅައެކެވެ.

މިއީ މި ލީގުގައި އީގަލްސް އެއްވަރުވި ފަސްވަނަ މެޗެވެ.