ދެކުނު ކަނެކްޓިވިޓީ: އިފްތިތާޙީ ދަތުރު އައްޑުއިން ފުވައްމުލަކަށް

ދެކުނުގެ 4 އަތޮޅު ވައިގެ ދަތުރުން ގުޅާލައި، އައްޑޫން ފުވައްމުލަކަށް މިއަދު އިފްތިތާޙީ ދަތުރު ކޮށްފިއެވެ.

ރާއްޖޭގެ އެންމެ ދެކުނުން އައްޑޫ އަތޮޅާއި، ފުވައްމުލަކާއި، ގއ.އަތޮޅު އަދި ގދ. އަތޮޅު ގުޅުވާލުމުގެ އިފްތިތާޙީ ދަތުރުތައް މޯލްޑިވިއަނުން މިވަނީ ފަށާފައެވެ. މިއާއިއެކު މި ހަތަރު އަތޮޅުގެ 4 އެއާޕޯޓު ވައިގެ މަގުން އެއް އެއާޕޯޓު އަނެއް އެއާޕޯޓާއި ގުޅުވާލާނެއެވެ. ރަސްމީކޮށް މި ދަތުރުތައް ފެށުމަށް ހަމަޖެހިފައިވަނީ ފެބްރުއަރީ މަހުގެ 1 ވަނަ ދުވަހުއެވެ. މިދަތުރުތަކުގެ ތެރެއިން އައްޑޫން ފުވައްމުލަކަށް މިއަދު ވަނީ އިފްތިތާޙީ ދަތުރު ކޮށްފައެވެ.

މިކަމަށްޓަކައި ބޭއްވި ރަސްމިއްޔާތުގައި ވާހަކަ ދައްކަވަމުން މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ، ރައީސްގެ ކޮންމެ ވައުދުފުޅެއް ގުޅިފައިވަނީ ރައްޔިތުންގެ ލާބައާއި މަންފާއަށް ކަމަށެވެ. މިއީވެސް ރައްޔިތުންނާއި ޤައުމަށްޓަކައި ވީ މިފަދަ ވައުދެއްކަން ފާހަގަކުރެއްވިއެވެ. އަދި މިއީ، އިޤްތިޞާދީގޮތުންނާއި އަމިއްލަ ބޭނުންތަކަށް ދަތުރު ކުރާ ފަރާތްތަކަށް ލިބިގެން ދިޔަ ވަރަށް ބޮޑު ފަސޭހައެއްކަން ފާހަގަކުރައްވާ، މީގެ ބޭނުން ފުވައްމުލަކު ރައްޔިތުން ހިފުމަށް ގޮވާލެއްވިއެވެ.

"މި ޚިދުމަތަކީ ރާއްޖޭގެ ރައީސުލްޖުމްހޫރިއްޔާ ރައްޔިތުންގެ އިހްސާސާއި ރައްޔިތުންގެ ބޭނުންތަކާއި، ރައްޔިތުން އެއްދުވަހުން އަނެއް ދުވަހަށް ފުދުންތެރިވެ ކުރިއަރައިގެންދާނެ ގޮތުގެ މައްޗަށް ރައީސުލްޖުމްހޫރިއްޔާ އެކުލަވާލި ތަޞައްވުރެއްގެ ތެރެއިން ރައްޔިތުންގެ އަޑު އައްސަވާފައި ރައްޔިތުންނަށްޓަކައި ޤައުމަށްޓަކައި ވެދެއްވި ވަރަށް މުހިންމު ތަޞައްވުރެއް ފުރިހަމަވެގެން މިދިޔައީ". ޢަލީ ސަލީމް ވިދާޅުވިއެވެ.

މި ދަތުރުތައް ކުރުމަށް ހަމަޖެހިފައިވަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތަކުގައެވެ. އިފްތިތާޙީ ދަތުރު ފެށުމުގެ ގޮތުން މި ބޯޓު ވަނީ، އައްޑޫ ސިޓީން ފުވައްމުލައް ސިޓީއަށް ދަތުރު ކޮށްފައެވެ.

މިހާރު ފުވައްމުލައް ސިޓީން އައްޑޫ ސިޓީއަށް ޝެޑިއުލްކޮށް ދަތުރު ކުރެވެނީ އާރުޓީއެލް ފެރީގައެވެ. މިއީ، 1 ގަޑިއިރަށްވުރެ ދިގު ދަތުރެކެވެ. އެހެންކަމުން މިފެށި ދަތުރުތަކާއިއެކު ފުވައްމުލަކުން ބޭސްފަރުވާއާއި އެހެނިހެން ބޭނުންތަކަށް ދަތުރުކުރާ ފަރާތްތަކަށް ވަރަށް ބޮޑު ލުއިފަސޭހައެއް ލިބިގެންދާނެއެވެ. ސަބަބަކީ، މޯލްޑިވިއަންގެ ބޯޓުތަކުގައި މި ފެށި ދަތުރަކީ އެންމެ 20 މިނެޓުގެ ދަތުރަކަށްވުމެވެ. އަދި މިއީ ފުވައްމުލަކު ރައްޔިތުންނަށް އެއްގޮތަށްވުރެ ގިނަ ގޮތްގޮތުން ފަސޭހަތަކެއް ލިބިގެންދާނެ ދަތުރުތަކެއްގެ ގޮތުގައި އެ ފަރާތްތަކުންވެސް ވަނީ ފާހަގަކޮށްފައެވެ.

މީގެއިތުރުން މި ދަތުރުތަކާއިއެކު ފަތުރުވެރިކަމަށްވެސް ބޮޑު ކުރިއެރުމެއް ލިބިގެންދާނެއެވެ. ގަން އިންޓަނޭޝަނަލް އެއާޕޯޓަކީ، މިހާރުވެސް ސްރީލަންކަން އެއާލައިންގެ ބައިނަލްއަޤްވާމީ ދަތުރުތައް ހަފްތާއަކު 2 ދުވަހު ކުރާ އެއާޕޯޓެކެވެ. އެހެންކަމުން އެ އެއާޕޯޓަށް އަންނަ ފަތުރުވެރިންނަށްވެސް ދެކުނުގެ އަތޮޅުތަކަށް ފަސޭހަކަމާއިއެކު ދަތުރު ކުރެވޭނެއެވެ.

ރާއްޖޭގެ ދެކުނުގެ 4 އަތޮޅު ވައިގެ ދަތުރުން ގުޅާލުމަށް އައްޑޫއިން ފުވައްމުލަކަށް އިފްތިތާޙީ ދަތުރު ބޭއްވުމުގެ ރަސްމިއްޔާތުގައި ދައުލަތުގެ އެކިއެކި ވުޒާރާތަކުގެ ވަޒީރުންނާއި، މޯލްޑިވިއަންގެ އިސްވެރިންނާއި، ފުވައްމުލައް ސިޓީގެ އެކިއެކި މުވައްސަސާތަކުގެ އިސްވެރިންނާއި އާންމު ރައްޔިތުން ވަނީ ބައިވެރިވެފައެވެ.