މިއަހަރުގެ އުފެއްދުންތެރިކަމުގެ މައުރަޒު އޮކްޓޯބަރުގައި

ދިވެހި ފަންނުވެރިންގެ ހުނަރާއި އުފެއްދުންތެރިކަން ދައްކާލުމަށް ރާއްޖޭގައި ބާއްވާ އެންމެ ބޮޑު މައުރަޒު ކަމަށްވާ "ދިވެހީންގެ އުފެއްދުންތެރިކަމުގެ މަޢުރަޒު" މިއަހަރުގެ އޮކްޓޯބަރުމަހު ބޭއްވުމަށް ނިންމާފައިވާކަމަށް ބިޒްނަސް ސެންޓަރ ކޯޕަރޭޝަން، ބީސީސީން ވިދާޅުވެއްޖެއެވެ.

މިއަހަރުގެ މިމައުރަޒު ބޭއްވުމަށް ނިންމާފައިވަނީ އޮކްޓޫބަރު 23 އިން 31އަށެވެ.

ދިވެހީންގެ އުފެއްދުންތެރިކަމުގެ މަޢުރަޒަކީ، ރާއްޖޭގެ އެކި ކަންކޮޅުތަކުގައި ތިބި އަތްތެރި މަސައްކަތްތެރިންނާއި، ކުދި އަދި މެދު ފަންތީގެ ވިޔަފާރިތަކާއި، ޑިޖިޓަލް އުފެއްދުންތެރިންގެ އިތުރުން އައު އީޖާދުތައް ކުރާ ފަރާތްތަކަށް އެ ފަރާތްތަކުގެ މަސައްކަތްތައް ދައްކާލުމަށް ބާއްވާ މަޢުރަޒެކެވެ.

މި މައުރަޒުގެ ތެރެއިން، މުޅި ރާއްޖެއަށް ޑިޖިޓަލް ވަސީލަތްތައް ފުޅާކޮށް، އުފެއްދުންތެރިންނަށް ބައިނަލްއަޤްވާމީ ފެންވަރުގައި ވާދަކުރެވޭނެ މަގު ފަހިކޮށްދިނުމަކީ މި މައުރަޒު ބޭއްވުމުގެ މަޤްސަދެކެވެ.

ބީސީސީން ވިދާޅުވީ، މިއަހަރުގެ އުފެއްދުންތެރިކަމުގެ މައުރަޒުގައި ބައިވެރިވުމުގެ ފުރުސަތު އަންނަ މަހު ރަސްމީކޮށް ހުޅުވާލާނެކަމަށް އިޤްތިސާދީ ތަރައްޤީއާ ވިޔަފާރިއާ ބެހޭ ވުޒާރާއިން ވިދާޅުވެއެވެ.

މިއަހަރުގެ ރިޔާސީ ބަޔާނުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މި އަހަރަކީ "އުފެއްދުންތެރިކަމުގެ އަހަރު" ގެ ގޮތުގައި ކަނޑައަޅުއްވައި އެކަން އިޢުލާނު ކުރައްވާފައެވެ. އެހެންކަމުން ދިވެހީންގެ އުފެއްދުންތެރިކަމުގެ މަޢުރަޒް 2026 ވާނީ ދިވެހި އުފެއްދުންތެރިންނާއި ފަންނުވެރިންނަށް ހުޅުވިގެންދާނެ މުހިންމު ފުރުޞަތަކަށް ކަމަށް ބީސީސީން ވިދާޅުވިއެވެ.

މިދިޔަ އަހަރު ބޭއްވި "ދިވެހީންގެ އުފެއްދުންތެރިކަމުގެ މަޢުރަޒު 2025"އަށް ރެކޯޑް އަދަދަކަށް އާންމުން ވަނީ ޒިޔާރަތް ކޮށްފައެވެ.