ހޭންޑްބޯލް މޯލްޑިވްސްއިން މިއަހަރު 14 ކޯހެއް ހިންގާނެ

ރާއްޖޭގެ އެކި ސަރަހައްދުތަކުގައި ހިންގުމަށް 14 ކޯހެއް ހިމަނާ ހޭންޑްބޯލް މޯލްޑިވްސްގެ ވަގުތީ ކަލަންޑަރު އާންމުކޮށްފިއެވެ.

މިދިޔަމަހުގެ ފަހުކޮޅު އެއެސޯސިއޭޝަނުގެ ވަގުތީ ކަލަންޑަރު އާންމުކޮށްފައިވާއިރު، މިއަހަރަކީވެސް ހޭންޑްބޯޅައާއި ގުޅުންހުރި ގިނަ ހަރަކާތްތަކެއް އެއެސޯސިއޭޝަން ރާވާ ހިންގުމަށް ތާވަލުކޮށްފައިވާ އަހަރެއްކަން ފާހަގަކޮށްލެވެއެވެ، އެގޮތުން ހޭންޑްބޯޅައިގެ އޮފިޝަލުންނާއި ކޯޗުންނާއި ރެފްރީން ބިނާކުރުމަށް މާލެއާއި އަތޮޅު ތެރޭގައި ސާދަ ކޯހެއް ހިންގުމަށް ރާވާފައިވާއިރު އޭގެ ތެރޭގައި ހިމެނޭ ކޯސްތަކަކީ އެޗްބީއެމް ޓެކްނިކަލް އޮފިޝަލްސް ގްރޭޑިން ކޯސް ބެޗް 2 ކޯހެވެ.

މިކޯހަކީ އޭޕްރިލް 1 އިން 7 ގެ ނިޔަލަށް މާލޭގައި ކުރިއަށްގެންދާ ކޯހެކެވެ. އަދި އޭޕްރިލްމަހުގެ 10 އިން 20 އަށް ވ. އަތޮޅުގައި ކޯޗިން ކޯހެއް ކުރިއަށްދާނެއެވެ. އަދި މާލޭގައި ކުރިއަށްގެންދާ ރެފްރީސް ރިފްރެޝަރ ޕްރޮގްރާމު ކުރިއަށް ގެންދިއުމަށް ހަމަޖެހިފައިވަނީ މާޗުމަހުގެ 22 އިން 24 އަށެވެ. އަދި ހަމަ މާލޭގައި 20 ދުވަހުގެ މުއްދަތަށް މޭ މަހު ކޯޗިން ކޯހެއްވަނީ ކުރިއަށް ގެންދިއުމަށް ރާވާފައެވެ.

ހޭންޑްބޯލް މޯލްޑިވްސްއިންވަނީ އދ. އަތޮޅަށްވެސް ޚާއްސަކޮށްގެން ރެފްރީން ތަންރީނުކުރުމަށް ކޯހެއް ރާވާފައެވެ. އަދި ޖޫންމަހުގެ 20 އިން 30 އަށް ތ. އަތޮޅުގައި ރެފްރީ ކޯހެއް ކުރިއަށް ގެންދިއުމަށް ހަމަޖައްސާފައިވާއިރު، ނ. މާމެންދޫ، ނ. ވެލިދޫ އަދި ކުޅުދުއްފުށި ސިޓީގެ އިތުރުން ލ. އަތޮޅުގައިވެސް ކޯޗިން ކޯހެއް ކުރިއަށްގެންދާނެއެވެ.

މީގެ އިތުރުން އޮގަސްޓުމަހުގެ 25 އިން ސެޕްޓެމްބަރުމަހުގެ 3 އަށް ތިނަދޫ ސިޓީގައި ރެފްރީން ތަމްރީނުކުރުމަށް ރެފްރީސް ކޯހެއް ކުރިއަށް ގެންދިއުމަށް ކަލަންޑަރުގައި ހިމަނާފައިވާއިރު، މާލޭގައި ކުރިއަށްގެންދާ ހޭންޑްބޯލް ލެވެލް 1 ކޯޗިން ކޯސް ކުރިއަށްދާނީ ސެޕްޓްމެބަރުމަހުގެ 10 އިން 20 ގެ ނިޔަލަށެވެ. އަދި އަހަރު ނިންމާނީ ނޮވެމްބަރުމަހު 20 އިން 30 އަށް މާލޭގައި ބޭއްވުމަށް ތާވަލުކޮށްފައިވާ ކޯޗިން ކޯހުންނެވެ.

ހޭންޑްބޯލް މޯލްޑިވްސްއިން މިއަހަރުވެސް ބައިނަލްއަގްވާމީ ގިނަ މުބާރާތްތަކެއްގައި ވާދަކުރުމަށް ނިންމާފަވެއެވެ.

އޭގެ ތެރޭގައި ހިމެނީ އޭޕްރިލްމަހުގެ 22 އިން 30 އަށް ޗައިނާގެ ސާންޔާގައި ބާއްވާ 6 ވަނަ އޭޝިއަން ބީޗް ގޭމްސްއާއި ރާއްޖެ ނުވަތަ ބަނގްލަދޭޝްގައި ކުރިއަށް ގެންދިއުމަށް ރާވާފައިވާ 18 އަހަރުންދަށާއި 20 އަހަރުންދަށުގެ އައިއެޗްއެފް ޓްރޮފީ މުބާރާތާއި ޖުލައި މަހަށް ތާވަލުކޮށްފައިވާ ފުރަތަމަ އޭޝިއަން ވިމެން - އަންޑަރ 16 ޗެމްޕިއަންޝިޕެވެ.

31 އޮކްޓޯބަރުން ފެށިގެން ނޮވެންބަރު 13 އަށް ސެނެގާލްގެ ވެރިރަށް ޑާކާގައި ކުރިއަށްދާ ޑާކާ 2026 ސަމާ ޔޫތް އޮލިމްޕިކް ގޭމްސްގައިވެސް ރާއްޖެއިން ވާދަކުރާނެއެވެ.

ހޭންޑްބޯލް މޯލްޑިވްސްއިން އިންތިޒާމުކޮށްގެން ރާއްޖޭގައި ކުރިއަށްގެންދިއުމަށް ރާވާފައިވާ މުބާރާތްތަކަށް ބަލާއިރު، މޭމަހުގެ 10 އިން 20 އަށް ކުރިއަށްދާނީ 8 ވަނަ ހޭންޑްބޯލް ޗެންޕިއަންޝިޕެވެ.

8 ވަނަ އިންޓަ އޮފީސް/ކޮންޕެނީ ހޭންޑްބޯޅަ މުބާރާތް ރާވާފައިވަނީ ޖޫންމަހުގެ 1 އިން 15 ގެ ނިޔަލަށް ކުރިއަށްގެންދާގޮތަށެވެ. އަދި ޖުލައިމަހުގެ 15 އިން 25 ގެ ނިޔަލަށް 12 ވަނަ ގައުމީ ހޭންޑްބޯޅަ މުބާާރާތުގެ ކުޅުން ކުރިއަށް ގެންދިއުމަށްފަހު، މާލެ އޭރިއާގައި މުޅިން އަލަށް ފަށަން ހަމަޖެހިފައިވާ އިންޓަ ސްކޮލާސްޓިކް ހޭންޑްބޯލް ޓޯނަމަންޓު ރާވާފައިވަނީ އޮގަސްޓުމަހުގެ 1 އިން 22ގެ ނިޔަލަށެވެ.

ހޭންޑްބޯލް މޯލްޑިވްސްއިން މުޅިން އަލަށް ފަށާ ޖޫނިއާ އެންޑް ޔޫތް ޗެލެންޖު ޓްރޮފީ އޮކްޓޯބަރުގެ 15 އިން 30 އަށް ކުރިއަށްދާނެއެވެ. އަދި 13 ވަނަ ގައުމީ ހޭންޑްބޯޅަ މުބާާރާތުގެ ކުޅުން ކުރިއަށް ގެންދިއުމަށް ހަމަޖެހިފައިވަނީ ނޮވެންބަރު 5 އިން 15 ގެ ނިޔަލަށެވެ. އަދި އަހަރު ނިންމާނީ ޑިސެންބަރު 13 އިން 15 އަށް ކުރިއަށްގެންދާ ހޭންޑްބޯލް އެކަޑަމީ ފިއެސްޓާއިންނެވެ.

18 އަހަރުންދަށާއި 20 އަހަރުންދަށުގެ ގައުމީ ހޭންޑްބޯޅަ ޓީމަށް ކުޅުންތެރިން ހޯދުމަށްޓަކައި އެކަމަށް ޝައުގުވެރިވާ ފަރާތްތަކަށް އެ ފުރުސަތު މިމަހުގެ 7 ވަނަ ދުވަހާއި ހަމައަށް ހޭންޑްބޯލް މޯލްޑިވްސްއިން މިހާރުވަނީ ހުޅުވާލާފައެވެ.

މި ސްކޮޑްގެ ބޭނުމަކީ ރާއްޖެ ނުވަތަ ބަނގްލަދޭޝްގައި ކުރިއަށް ގެންދިއުމަށް ރާވާފައިވާ 18 އަހަރުންދަށާއި 20 އަހަރުންދަށުގެ އައިއެޗްއެފް ޓްރޮފީ މުބާރާތުގައި ވާދަކުރާ ގައުމީ ޓީމަށް ކުޅުންތެރިން ނެގުމެވެ.

ގައުމީ ހޭންޑްބޯޅަ ޓީމުން މިހާރު ތައްޔާރުވަމުން އަންނަނީ މިއަހަރުގެ އޭޕްރިލްމަހުގެ 22އިން 30 އަށް ޗައިނާގެ ސާންޔާގައި ފެށުމަށް ހަމަޖެހިފައިވާ 6 ވަނަ އޭޝިއަން ބީޗް ގޭމްސްގައި ވާދަކުރުމަށެވެ.

ގައުމީ ބީޗް ހޭންޑްބޯލް ޓީމުގެ ފަރިތަކުރުންތައް ކުޅުދުއްފުށި ސިޓީގައި ފަށާފައިވާއިރު، އެ މުބާރާތަށް ފުރުމުގެ ކުރިން އިތުރު ތަޖުރިބާ ހޯދުމުގެ ގޮތުން ބެންކޮކުގައި ކޭމްޕުކުރުމަށް ރާވަމުންދާކަމަށް ހޭންޑްބޯލް މޯލްޑިވްސްއިންވަނީ ޕީއެސްއެމް ނިއުސްއަށް މައުލޫމާތުދީފައެވެ.