އައިޓީބީ ބާލިން ފެއަރގައި ދިވެހިރާއްޖޭގެ ތާރީޚީ ދަތުރު

ދުނިޔޭގެ ފަތުރުވެރިކަމުގެ ސިނާޢަތުގައި ބާއްވާ އެންމެ ބޮޑު އަދި އެންމެ ނުފޫޒުގަދަ ވިޔަފާރި މައުރަޒަކީ ޖަރުމަނުވިލާތުގެ ބާލިންގައި ކޮންމެ އަހަރަކު ބާއްވާ "އައިޓީބީ ބާލިން" އެވެ.

ދިވެހިރާއްޖޭގެ ފަތުރުވެރިކަން ދުނިޔޭގެ ބާޒާރަށް ތަޢާރަފުވެ، މިއަދު މިދެކޭ ފަދަ މަޤުބޫލު މަންޒިލަކަށް ވުމުގައި މި ފެއަރއަކީ އެންމެ މުހިންމު އެއް ބިންގަލެވެ.

ފެށުން: 1983 ވަނަ އަހަރުގެ ތާރީޚީ ފިޔަވަޅު

ދިވެހިރާއްޖެއިން އައިޓީބީ ފެއަރގައި އެންމެ ފުރަތަމަ ބައިވެރިވީ 1983 ވަނަ އަހަރުއެވެ. މިއީ ރާއްޖޭގެ ފަތުރުވެރިކަމުގެ ދާއިރާގެ ދެ ބާނީން ކަމުގައިވާ ކޮލިގޭ މުޙައްމަދު ޢުމަރު މަނިކު ނުވަތަ އާންމު ނަމުންނަމަ އެމްޔޫ މަނިކާއި އަޙްމަދު މާހިރު ދީދީގެ ވަރަށް ބޮޑު އިސްނެންގެވުމަކާއެކު ފެށުނު ދަތުރެކެވެ.

އޭރު ރާއްޖެއަކީ ދުނިޔޭގެ ޗާޓުގައި ފަތުރުވެރިކަމުގެ މަންޒިލެއްގެ ގޮތުގައި އެހާ ބޮޑަށް އެނގޭ ޤައުމަކަށް ނޫނެވެ. ނަމަވެސް މި ދެ ބޭފުޅުންގެ ދުރުވިސްނުމާއެކު ރާއްޖޭގެ ނަން ބައިނަލްއަޤުވާމީ މައިދާނަށް ނެރެދިނެވެ.

އަމިއްލަ ފަރާތްތަކުން ފެށި މި ހިތްވަރުގަދަ މަސައްކަތުގެ ނަތީޖާއެއްގެ ގޮތުން، 1984 ވަނަ އަހަރުން ފެށިގެން ދިވެހި ސަރުކާރުގެ ފަރާތުން ރަސްމީ ސިފައެއްގައި މި ފެއަރގައި ބައިވެރިވާން ފެށިއެވެ. މިއީ ރާއްޖޭގެ ފަތުރުވެރިކަން ދުނިޔޭގެ ފެންވަރުގައި މާކެޓްކުރުމަށް އެޅުނު އެންމެ ވަރުގަދަ ބިންގަލެވެ.

ސްޓޭންޑްތަކުގެ ފަރުމާ: ގުދުރަތީ ރީތިކަމާއި ދިވެހިވަންތަކަން

އައިޓީބީ ބާލިންގައި ރާއްޖެއިން ބޭނުންކުރާ ސްޓޭންޑްތަކަކީ އަބަދުވެސް ފެއަރއަށް ޒިޔާރަތްކުރާ މީހުންގެ ސަމާލުކަން އެންމެ ބޮޑަށް ހުއްޓޭ އެއް ކަމެވެ.

1980 ގެ އަހަރުތަކުގައި، ޒަމާނީ ޓެކްނޮލޮޖީއާއި ޑިޖިޓަލް ވަސީލަތްތައް މަދު އެ ދުވަސްވަރު، ރާއްޖޭގެ ސްޓޭންޑް ތައްޔާރުކޮށްފައި ވަނީ ވަރަށް ގުދުރަތީ އަދި ސާދާ ސިފައެއްގައެވެ. އޭރުގެ ސްޓޭންޑްތަކުން ފެނިގެންދިޔައީ ދިވެހިންގެ އަމިއްލަވަންތަކަމެވެ. ދިވެހި އަތްތެރި މަސައްކަތުގެ މުއްސަނދިކަން ހާމަކޮށްދިނުމަށްޓަކައި، ވިޔެފައި ހުރި ކުނާ އަޅައި، މުޅި ސްޓޭންޑް އޮންނަނީ ދިވެހިވަންތަ މާހައުލަކަށް ބަދަލުކޮށްފައެވެ.

މީގެ އިތުރުން، ރާއްޖޭގެ ކަނޑުތަކުގެ ރީތިކަން ސިފަކޮށްދިނުމަށްޓަކައި އެކި ބާވަތްތަކުގެ ބޮލިތަކާއި، މުތްތައް ބޭނުންކޮށްގެން ސްޓޭންޑު ޒީނަތްތެރިކޮށްފައި ހުރިއެވެ. ރާއްޖޭގެ ހުދު ދޮންވެލިގަނޑާއި ސާފު ނޫކުލައިގެ މޫދު ފެންނަ ގުދުރަތީ މަންޒަރުތައް ދައްކުވައިދޭ ފޮޓޯތަކެއް 'ރަން ޒަމާނުގެ' ސްޓޭންޑުތަކުގައި ހަރުކޮށްފައި ހުރިއެވެ. މި ސާދާ ނަމަވެސް ފުރިހަމަ ފަރުމާގެ ސަބަބުން، ފިނި މޫސުމުގެ ދުވަސްވަރު ޖަރުމަނުވިލާތުގެ މީހުންނަށް ރާއްޖޭގެ ސްޓޭންޑަކީ ހިތްފަސޭހަ، ހޫނު މޫސުމުގެ އިހުސާސް ގެނުވައިދޭ މަންޒިލެއްގެ ގޮތުގައި ވެގެންދިޔައެވެ.

މިއަދު މި މަންޒަރުތައް ވަރަށް ތަފާތެވެ. އައިޓީބީ ބަރލިންގައި ރާއްޖެއިން ތައްޔާރުކޮށްފައި ހުންނަ ސްޓޭންޑުތައް ކުލަގަދަވެފައި އެހާމެ ބޮޑުވެސް މެއެވެ.

މިހާރު އައިޓީބީގައި ރާއްޖެއިން ތައްޔާރުކުރާ ސްޓޯލްތަކަކީ 400 އަކަމީޓަރަށްވުރެ ބޮޑު ދެ ފްލޯގެ ސްޓޭންޑެކެވެ. މި ސްޓޭންޑުގައި ރާއްޖޭގެ ރީތިކަން ފެންނަ ފޮޓޯތައް ޑިސްޕްލޭކޮށްފައި ހުންނައިރު، ރާއްޖޭގެ ލުއި ކެއުންތައް ރަހަ ބަލާލުމުގެ ފުރުސަތު ސްޓޭންޑަށް ޒިޔާރަތް ކުރާ ފަރާތްތަކަށް ލިބިގެންދެއެވެ. އަދި ދިވެހިންނާ ގުޅުންހުރި އަތްތެރި މަސައްކަތްތައް ލައިވްކޮށް ބަލާލުމުގެ އިތުރުން ވާޗުއަލް ރިއަލިޓީ ބޭނުންކޮށްގެން ރާއްޖޭގެ ކަނޑު އަޑީގެ މަންޒަރުތައް ބަލާލުމުގެ ފުރުސަތުވެސް ފެއާ އަށް ޒިޔާރަތްކުރާ ފަރާތްތަކަށް ފޯރުކޮށްދީފައިވެއެވެ.

ފަހަކަށް އައިސް އައިޓީ ބަރލިންގައި ތައްޔާރުކުރާ ރާއްޖޭގެ ސްޓޭންޑަކީ މި ކުޑަކުޑަ ޤައުމުގެ ސަގާފަތާއި، ގުދުރަތީ ރީތިކަން ދައްކުވައިދޭ ފަދަ ގޮތަކަށް ތައްޔާރުކުރާ ސްޓޭންޑުތަކެކެވެ. އެގޮތުން ދިވެހީންގެ ދިރިއުޅުން ދައްކައިދިނުމަށް ސްޓޭންޑުގައި އުނދޯއްޔާއި ޖޯލި، ދިވެހި ގޮނޑުދޮށްތަކުގައި ހުންނަ ހުދު ދޮންވެލި ބޭނުންކޮށްފައިހުރެއެވެ.

މީގެ އިތުރުން، ރާއްޖޭގެ ސްޓޭންޑަށް ޒިޔާރަތްކުރާ ފަރާތްތަކަށް ވާޗުއަލް ރިއަލިޓީގެ އެހީގައި ކަނޑުއަޑީގެ މަންޒަރުތައް ބަލާލައި، ރާއްޖޭގެ ގޮނޑުދޮށްތައް ތަޖުރިބާ ކޮށްލެވޭނެ ފަދަ ގޮތަކަށް މިހާރު ހަދާ ސްޓޭންޑުތައް ފަރުމާކޮށްފައިހުރެއެވެ. މިއަދު ޒަމާނީ ޓެކްނޮލޮޖީއާއެކު ސްޓޭންޑްތައް ބޮޑުވެ، ޒީނަތްތެރިކަން އިތުރުވެފައިވީ ނަމަވެސް، އެ ދުވަސްވަރުގެ އެ ގުދުރަތީ ސާދާކަމަކީ ރާއްޖެއަށް ދުނިޔޭގެ މަޤުބޫލުކަން ހޯދައިދިން އަސްލު ސިއްރެވެ.

އައިޓީބީގައި ރާއްޖެއިން ހޯދި ކާމިޔާބީތައް

ވޭތުވެދިޔަ ދިގު ތާރީޚުގައި ރާއްޖެއިން ވަނީ އައިޓީބީގައި ބޮޑެތި ކާމިޔާބީތަކެއް ހޯދާފައެވެ. އޭގެ ތެރެއިން އެންމެ ފާހަގަކޮށްލެވޭ އެއް ކަމަކީ 2016 ވަނަ އަހަރު އައިޓީބީ ބާލިންގެ "އޮފިޝަލް ހޯސްޓިން ޕާޓްނަރ ކަންޓްރީ" ގެ ޝަރަފު ރާއްޖެއަށް ލިބުމެވެ. މީގެ އިތުރުން އަންނަ އަހަރު މި ބައިނަލްއަޤުވާމީ ފެއަރ ހޯސްޓުކުރާ ގައުމަކަށް ދިވެހިރާއްޖެވުމެވެ. މިއީ މުޅި ފެއަރގެ މައިގަނޑު ސަމާލުކަން ރާއްޖެއަށް ހުއްޓި، ރާއްޖޭގެ ސަގާފަތާއި ފަތުރުވެރިކަން ބޮޑު ސިފައެއްގައި އިޝްތިހާރުކުރުމަށް ލިބުނު ރަން ފުރުސަތެކެވެ.

އެކި އަހަރުތަކުގެ މަތިން "ބެސްޓް އެގްޒިބިޓަރ" ނުވަތަ އެންމެ ފުރިހަމަ ސްޓޭންޑްގެ އެވޯޑްތައްވެސް ރާއްޖެއިން ވަނީ ހާސިލްކޮށްފައެވެ.

އައިޓީބީ ބާލިން ފެއަރއަކީ ހަމައެކަނި ވިޔަފާރި މައުރަޒެއް ނޫނެވެ. އެއީ ރާއްޖޭގެ ފަތުރުވެރިކަމުގެ ތާރީޚުގެ ލޯގަނޑެވެ. 1983 ވަނަ އަހަރު މަދު ބަޔަކާއެކު، ވިޔެފައި ހުރި ކުނާކޮޅަކާއި ބޮލިތަކަކުން ފެށި މި ދަތުރު، މިއަދު ވަނީ މުޅި ދުނިޔެ ބަލައިގަންނަ ފަދަ ވަރުގަދަ ބްރޭންޑަކަށް ބަދަލުވެފައެވެ.

މި ކާމިޔާބީގެ ފަހަތުގައިވަނީ ދިވެހިންގެ މަސައްކަތްތެރިކަމާއި، ރާއްޖޭގެ ގުދުރަތީ ރީތިކަން ދުނިޔެއަށް ހާމަކޮށްދިނުމަށް ކުރި އިޚުލާޞްތެރި މަސައްކަތެވެ.