ޚަބަރު

މިފްކޯގެ އައު 5 އުފެއްދުމެއް ބާޒާރަށް!


  • "ރަންވަރު ފަސްމީރު" ނަމުގައި ނެރުނު އުފެއްދުންތައް ޚާއްސަކޮށްފައި ވަނީ ރާއްޖޭގެ ބާޒާރަށް

  • ދިވެހިންނަށް ކަމުދާ އުފެއްދުންތައް ތައްޔާރުކުރުމަށް މިފްކޯއިން އިސްކަންދޭ

މިފްކޯގެ ފަސްމީރު ބްރޭންޑުގެ ދަށުން "ރަންވަރު" ޕްރީމިއަމް އުފެއްދުންތަކުގެ ގޮތުގައި އައު އުފެއްދުންތަކެއް ރާއްޖޭގެ ބާޒާރަށް ނެރެފިއެވެ.

މި އައު އުފެއްދުންތައް ބާޒާރަށް ތަޢާރަފުކުރުމުގެ ގޮތުން މިފްކޯ މަސްފިހާރައިގައި ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި މި އުފެއްދުންތައް ނެރެދެއްވީ އެކުންފުނީގެ ޗެއަރމަން ޝިމާޒެވެ. މި ރަސްމިއްޔާތުގައި މިފްކޯގެ ސީއީއޯ ފަރުހަތު ޝަހީރާއި އެކުންފުނީގެ އިސްވެރިންވެސް ވަނީ ބައިވެރިވެވަޑައިގެންފައެވެ. "ރަންވަރު" ޕްރީމިއަމް ބްރޭންޑުގެ ދަށުން ޖުމްލަ 5 އުފެއްދުމެއް މިފްކޯއިން ވަނީ އަލަށް ބާޒާރަށް ނެރެފައެވެ.

މުޅިން އަލަށް ބާޒާރަށް ނެރެނު މި އުފެއްދުންތަކާ ގުޅޭގޮތުން ޕީއެސްއެމް ނިއުސްއަށް މައުލޫމާތު ދެއްވަމުން މިފްކޯގެ ސޭލްސް އެންޑް މާކެޓިންގ ޖެނެރަލް މެނޭޖަރު ޙަސަން ޒާހިދު ވިދާޅުވީ، އެކުންފުނީގެ އަމާޒަކީ ރައްޔިތުން ބަލައިގަންނާނެ ފަދަ އުފެއްދުންތަކެއް ބާޒާރަށް ނެރުން ކަމަށެވެ.

"އަޅުގަނޑުމެން ވީހާވެސް ބޮޑަށް މި ބަލަނީ ދިވެހިންނަށް ކަމުދާނެ އުފެއްދުންތަކެއް މާކެޓަށް ނެރެވޭތޯ. އެގޮތުން ރަންވަރު މި ބްރޭންޑް ތަޢާރަފުކޮށް މި ނެރެވުނު އުފެއްދުންތަކުގެ އިތުރަށް އަދި ކުރިއަށް އޮތްތާނގައިވެސް މިފަދަ ތަފާތު އުފެއްދުންތައް ރަންވަރު ބްރޭންޑްގެ ދަށުން ތަޢާރަފު ވެގެންދާނެ." ޒާހިދު ވިދާޅުވިއެވެ.

މިފްކޯއިން އަލަށް ބާޒާރަށް ނެރުނު އުފެއްދުންތައް:

1. މޭބިސް ލަގޮނޑި ރިހާކުރު
2. ހިމުން މުގުރިމަސް ރިހާކުރު
3. ހިމުން މުގުރިމަހު ތެލުލި ރިހާކުރު
4. ކަންނެލި ސްޓޭކް މަސްދަޅު
5. ބަނޑައިދުލުގެ މަސްދަޅު

މި އުފެއްދުންތައް ތަޖުރިބާކުރި ބައެއް ފަަރާތްތަކުން ވަނީ، މި ތަކެތީގެ ރަހަ ވަރަށް ކަމުދާކަން ފާހަގަކޮށްފައެވެ.

ރަންވަރު މި ބްރޭންޑަކީ ރާއްޖޭގެ ބާޒާރަށް ޚާއްސަކޮށް މިފްކޯއިން ތަޢާރަފުކުރި ބްރޭންޑެކެވެ. ޒާހިދު ވިދާޅުވީ، އެކުންފުނިން ބޭރުގެ މާކެޓަށް ޚާއްސަކޮށް ތައްޔާރުކުރާ އުފެއްދުންތަކެކޭ އެއްފަދައިން، ރަންވަރު ބްރޭންޑުގެ ދަށުން ނެރޭ އުފެއްދުންތަކަށް ރައްޔިތުންގެ ފަރާތުން ބޮޑު ތަރުހީބެއް ލިބިގެންދާނެކަމަށް އުއްމީދުކުރާކަމަށެވެ.

މިފްކޯއިން އަންނަނީ އަހަރަކަށްވުރެ އަހަރެއް އެކުންފުނީގެ އުފެއްދުންތަކާ ކުންފުނީގެ ކެޕޭސިޓީ އިތުރަށް ފުޅާކޮށް، ކުރިއެރުވުމަށް ގިނަ މަސައްކަތްތަކެއް ކުރަމުންނެވެ.