ހުދުމުޚުތާރު އެބަސް ބޭނުންކުރަންޏާ ބޭނުން ކުރަންވާނީ ކުރީ ސަރުކާރުތަކަށް: ރައީސް
-
މިހާރު 5 ތަނެއްގައި އެއްވެ އުޅުމުގެ ހުއްދަ އޮންނާނެ
-
މި ސަރުކާރުން އެއްވެސް ސިޔާސީ ލީޑަރަކު ޖަލައްލާފައިނުވާނެ
-
ޕްރައިމަރީތައް ސްކޫލުތަކުގައި ބޭއްވުމަށް ވާނީ ފުރުސަތު ދީފައި
ރާއްޖޭގެ ޑިމޮކްރަސީ އެންމެ ފައްކާވެފައިވަނީ މިދިޔަ 2 އަހަރު ދުވަހުގެ ތެރޭގައި ކަމަށާއި، އެހެންނޫންނަމަ އިދިކޮޅު ފަރާތްތަކުގެ ޕްރައިމަރީތައް ބާއްވަން ސަރުކާރުގެ ސްކޫލުތައްދީ، އެއްވެ އުޅުމުގެ މިނިވަކަމަށް މިމިނަށް ފުރުސަތު ނުދޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ، އެމަނިކުފާނަކީ ހުދުމުޚުތާރުކޮށް އެއްވެސް ކަމެއް ކުރާ ބޭފުޅެއް ނޫން ކަމަށެވެ.
ރައީސް ވިދާޅުވީ، އިދިކޮޅު ފަރާތްތަކުން ޕްރައިމަރީ ބާއްވާފައިވަނީ ސަރުކާރުގެ އިދާރާތަކުގައި ސަރުކާރުގެ ފުރިހަމަ އެހީތެރިކަމާ އެކުގައި ކަމަށެވެ. އަދި މީގެކުރިން ކާނިވާ ސަރަޙައްދުގައި އެކަނި އެއްވެ އުޅުމުގެ ހުއްދަ އޮތްނަމަވެސް މިހާރު 5 ތަނެއްގައި އެއްވެ އުޅުމުގެ ހުއްދަ އޮތް ކަމަށެވެ.
އަންނަ މަހު ބާއްވާ ލޯކަލް ކައުންސިލް އިންތިޚާބުގެ އިދިކޮޅު އެމްޑީޕީގެ ޕްރައިމަރީ ސްކޫލްތަކުގައި ބާއްވާފައިވާއިރު، މީގެ ކުރިން ސްކޫލްތަކުގައި ސިޔާސީ ޕާޓީތަކުގެ ހަރަކާތްތައް ނުބޭއްވެއެވެ. ނަމަވެސް ސަރުކާރުން ވަނީ މި ސިޔާސަތަށް ބަދަލު ގެނެސް، ސްކޫލްތަކަށް ދަތިނުވާނެހެން ޗުއްޓީ ދުވަސް ނުވަތަ ބަންދު ދުވަސްތަކާއި ދިމާކޮށް އެފަދަ ހަރަކާތްތައް ކުރިއަށް ގެންދިއުމަށް ފުރުޞަތު ފަހިކޮށްދީފައެވެ. އަދި ހުރިހާ ޕާޓީއަކަށްވެސް މި ފުރުޞަތު އެއް ހަމައަކުން އޮންނާނެ ކަމަށް ސަރުކާރުން ވަނީ ވިދާޅުވެފައެވެ.
ޕްރެސް ކޮންފަރެންސުގައި ރައީސް ވިދާޅުވީ، އެމަނިކުފާނަކީ ހުދުމުޚުތާރު ބޭފުޅެއްނަމަ އިދިކޮޅު ސިޔާސީ ވެރިން މިހާރު ތިބޭނީ ޖަލުގައި ކަމަށެވެ. ނަމަވެސް މި ސަރުކާރުން އެއްވެސް ސިޔާސީ ލީޑަރަކު ޖަލައްލާފައިނުވާ ކަމަށް އެމަނިކުފާނު ވިދާޅުވިއެވެ.
"ހުދުމުޚުތާރު އެ ބަސް ބޭނުންކުރަންޏާ ބޭނުން ކުރައްވާނީ ކުރީގެ ސަރުކާރުތަކަށް. މި ސަރުކާރާ ދެކޮޅަށް ބޭނުން ކުރެވޭނެ ބޭނުން ކުރަން ހިތައްވެސް އެރުވޭނެ ބަހެއް ނޫން. ހުދުމުޚުތާރު ވެގެެން ކުރާނެ ކަމެއް ނޯންނާނެ. އޭގެ ބަދަލުގައި ރައްޔިތުންނާއެކު މި ސަރުކާރުން މަސައްކަތް ކުރާނީ. ރައްޔިތުން ގާތަށް ގޮސް މަސައްކަތް ކުރާ ސަރުކާރެއް މިއީ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސް ވިދާޅުވީ، އެމަނިކުފާނު ރާއްޖޭގެ ހުރިހާ ރައްޔިތުންނާއި ބައްދަލުކުރައްވާފައިވާ ކަމަށާއި، ވަކިވަކިންނާއި ޖަމާއަތްތަކުގެ އިތުރުން މުއައްސަސާތަކާއި ކައުންސިލްތަކާއި އެތައް ފަހަރަކު ބައްދަލުކޮށް، އެމީހުންގެ ކަންބޮޑުވުންތައް އަޑުއަހައި އަމަލީ ސިފަ ގެނެސްދެއްވަމުން ގެންދަވާ ކަމަށެވެ. މިއީ ޑިމޮކްރަސީގެ ފުރިހަމަ މިސާލު އެންމެ ފައްކާވެފައިވާ ޒަމާން ކަމަށާއި، މި ރާއްޖޭގައި ލާމަރުކަޒި ނިޒާމާއި ޑިމޮކްރަސީ ނިޒާމް އެންމެ ބޮޑަށް ފައްކާވެ މިނިވަންކަން އެބައޮތް ކަމަށް ރައީސް ވިދާޅުވިއެވެ.
ރައީސް ވިދާޅުވީ، މަޖިލިސް އިންތިޚާބާއި ރިޔާސީ އިންތިޚާބު ބާއްވާ ދުވަސް އެއް ދުވަހަަކަށް ހެދުމަށް ނިންމާފައިވަނީވެސް އެކަން އިތުރަށް ވަރުގަދަ ކުރުމަށް ކަމަށެވެ. އަދި ބޭނުންވަނީ ވީހާވެސް ގިނަ ރައްޔިތުން ބައިވެރިވާ ޑިމޮކްރަސީއަކަށް ހެދުމަށް ކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.