އޭއޯޕީގެ ދަށުން ތަމްރީނުގެ ފުރުސަތު ބެޑްމިންޓަނަށް ހޯދައިދޭނަން: އިޝްފާން
-
މިއީ އޭޝިއާގެ ގައުމުތަކުން 20 ކުޅުންތެރިން ނަގައިގެން ކުރިޔަށް ގެންދާ ޕްރޮގްރާމެއް
-
ބެޑްމިންޓަން އޭޝިއާއިން ރާއްޖެއަށް ފުރުސަތު ދޭނެކަމުގެ އުންމީދު ބޮޑު
މިއަހަރު ރާއްޖެއަށް އޭޝިއަން އޮލިމްޕިކް (އޭއޯޕީ) ޕްރޮޖެކްޓްގެ ދަށުން ކުޅުންތެރިން ތަމްރީނު ކުރުމުގެ ޕްރޮގްރާމުން ފުރުސަތު ހޯދައިދިނުމަށް މަސައްކަތް ކުރަމުން އަންނަ ކަމަށް، ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ރައީސް އިޝްފާން މުޙަންމަދު (އިއްޕަ) ވިދާޅުވެއްޖެއެވެ.
ޕީއެސްއެމް ނިއުސްއަށް ދިން އިންޓަވިއުއެއްގައި ބީއޭއެމްގެ ރައީސް ވިދާޅުވީ މިއަހަރު ކޯޗުންނާއި ކުޅުންތެރިން ތަމްރީނު ކުރުމުގެ ޕްރޮގްރާމުތައް ހިންގުމަށް ރާވާފައިވާކަމަށެވެ. އެގޮތުން އޭއޯޕީގެ ދަށުން ކުރިޔަށްގެންދާ "ޕްލޭޔަރ ޑިވެލޮޕްމެންޓް ޕްރޮގްރާމް" އަށް ރާއްޖޭގެ ކުޅުންތެރިއަކު ހޮވާ ނަން ފޮނުވާފައިވާ ކަމަށެވެ.
އަދި ބެޑްމިންޓަން އޭޝިއާއިން ރާއްޖެއަށް އެފުރުސަތު ދެއްވާނެ ކަމަށް ވަރަށް ބޮޑަށް އުންމީދު ކުރައްވާކަމަށެވެ. އިޝްފާން ވިދާޅުވީ މިއަހަރު ބެޑްމިން ކޯޗުން ތަމްރީނުކުރުމުގެ ތިން ޕްރޮގްރާމެއް ކުރިޔަށް ގެންދާނެ ކަމަށެވެ. އޭގެ އިތުރުން ކޯޗިން ކޯސް - ލެވެލް އެކެއް، ކުރިޔަށް ގެންދާނެ ކަމަށެވެ.
"އެއީ އޭޝިއާގެ ހުރިހާ ގައުމަކުން 20 ކުޅުންތެރިން ނަގައިގެން ކުރިޔަށް ގެންދާ ޕްރޮގްރާމެއް، އެއަށްވެސް ކޮންސިޑރކޮށްދޭނެ ކަމަށް ބެޑްމިންޓަން އޭޝީއާއިން އޮތީ ބުނެފަ
އޭގަ ކުޑަ ޑިލޭތަކެއް ކުރިމަތިވެދާނެ، އެހެންނަމަވެސް އަޅުގަނޑުމެން ބުނާ ކޮންމެ ކަމެއްގައި ބެޑްމިންޓަން އޭޝިއާއިން ފުރިހަމަ އެއްބާރުލުން ދޭނެކަމުގެ ސަތޭކަ ޕަސެންޓް ޔަގީންކަން އެބައޮތް" އިޝްފާން ވިދާޅުވިއެވެ.
ބެޑްމިންޓަން އަލުން ކުރިއެރުވުމަށް މީހުން ބިނާކުރުމާއި ކުޅުންތެރިންގެ ފެންވަރު މަތިކުރުމަށް ބީއޭއެމްއިން ކުރާ މަސައްކަތަށް ބެޑްމިންޓަންގެ ސަރަހައްދީ ޖަމްއިއްޔާ، ބެޑްމިންޓަން އޭޝިއާއިން ފުރިހަމަ އެއްބާރުލުން ރާއްޖެއަށް ލިބޭނެ ކަމަށްވެސް އިޝްފާން ވިދާޅުވިއެވެ.
ބީއޭއެމްއިން އަންނަނީ ބީޑަބްލިއުއެފްއިން އަޅާފައިއޮތް ފިޔަވަޅުތައް އުވާލުމާއިއެކު ބައިނަލްއަގްވާމީ މުބާރާތްތަކުގައި ރާއްޖެ ތަމްސީލުކުރުމުގެ ވީހާވެސް ގިނަ ފުރުސަތުތައް ފަހިކޮށްދިނުމަށް މަސައްކަތް ކުރަމުންނެވެ. އެގޮތުން ބީއޭއެމްއިން އަންނަނީ ކުޅިވަރު ވުޒާރާއާއި، ސްޕޯޓްސް ކޮމިޝަނަރުގެ އޮފީސް އަދި އޮލިމްޕިކް ކޮމިޓީއާއި ވަރަށް ގާތުން މަސައްކަތް ކުރަމުންނެވެ.