އީރާނާއެކު ޙަމަލާ ބަދަލުކުރަމުންދާތީ ކަމަށް ބުނެ ޣައްޒާއަށް ތެލާއި މުދާ ވެއްދުމަށް ޔަހޫދީން ހުރަސްއަޅަމުންދާތީ، ކުރިއަށް އޮތް ދުވަސްތަކުގައި ޣައްޒާއަށް ތެޔޮ ލިބުމަށް އިތުރަށް ދަތިވެ، ހަލުވިކަމާއެކު ކާބޯތަކެތި ހުސްވުން އެކަށީގެންވާ ކަމަށް ޣައްޒާގެ އޮފިޝަލުން ބުނެފިއެވެ.
ޔަހޫދީންނާއި އެމެރިކާއާ ގުޅިގެން ފެބްރުއަރީ މަހުގެ 28ވަނަ ދުވަހު ވަނީ އީރާނަށް ޙަމަލާ ދޭން ފަށައިފައެވެ. ހަނގުރާމައިގެ ހާލަތުގައި ޣައްޒާއަށް ރައްކާތެރިކަމާއެކު ސާމާނު ނުވެއްދޭނެ ކަމަށް ބުނެ ނިރުބަވެރި ޔަހޫދީ އަސްކަރިއްޔާއިން މިހާރު ވަނީ ޣައްޒާއަށް ތަކެތި ވެއްދޭ ހުރިހާ މަގުތަކެއް ބަންދުކޮށްފައެވެ. އެ މަގުތައް ބަންދުކޮށްފައި ހުންނާނީ ކިހާ ދުވަހަކަށް ކަމެއް ޔަހޫދީން ބުނެފައެއް ނުވެއެވެ. ނަމަވެސް އެ މަގުތައް އަލުން ހުޅުވައިލުމަށް ގިނަ ދުވަސްތަކެއް ނެގުން އެކަށީގެންވާ ކަމުގެ އިޝާރާތެއް ޔަހޫދީ އިދާރާތަކުން ވަނީ އިޝާރާތްކޮށްފައެވެ.
2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޔަހޫދީން ޣައްޒާއަށް ޙަމަލާ ދޭން ފެށުމާއެކު ޣައްޒާގެ ގިނަ ރައްޔިތުންގެ ގެދޮރު ވަނީ ގެއްލިފައެވެ. ދެ އަހަރަށް ފަހު ނަމެއްގައި ޙަމަލާ ބަދަލުކުރުން ހުއްޓާލާފައި އޮތް ނަމަވެސް ހަނގުރާމައިގައި ސުންނާފަތިވެފައިވާ އެ ސަަހަރުގެ ރައްޔިތުން އަދިވެސް ދިރިއުޅެމުންދަނީ ވަރަށް ދަތި ޙާލުގައެވެ. ޣައްޒާއިން ބަރޯސާ ވަނީ ޔަހޫދީ ދައުލަތުންނާއި މިޞްރު މަގުން އެ ސަހަރަށް އެތެރެކުރާ މަދު ޢަދަދުގެ ތެލުގެ މައްޗަށެވެ. ކޮންމެހެން ބޭނުންވާ މުދާ ޣައްޒާއަށް އެތެރެނުކުރެވޭ ނަަމަ ޣައްޒާގެ ހަސްފަތާލުތައް ހިންގުމަށް ވެސް އިތުރު ދަތިތައް ކުރިމަތިވާނެއެވެ. އޭގެ އިތުރުން ފެނާއި ނަރުދަމާގެ ނިޒާމަށް ވެސް އަސަރުކުރާނެއެވެ.
ޣައްޒާއަށް އެތެރެކުރާ ތެލުގެ ކަންކަން ބަލަހައްޓާ އދގެ އޮފިޝަލެއް ކަމަށްވާ ކަރޫނާ ހަރމަން ވިދާޅުވީ އެ ސަހަރުގައި މިހާރު ހުރި ތެޔޮ ބޭނުން ކުރެވޭނީ މަދު ދުވަސްކޮޅަކަށް ކަމަށެވެ. އދއާއި އެންޖީއޯތަކާ ގުޅިގެން ޣައްޒާގައި އެހީ ބެހުމުގެ މަސައްކަތްކުރާ އަމްޖަދު އަލް ޝަވާ ވިދާޅުވީ އެ ތެޔޮ ބޭނުން ކުރެވޭނެ ކަމަށް ބެލެވެނީ ތިނެއް ނޫނީ ހަތަރު ދުވަހު ކަމަށެވެ. ޣައްޒާގައި ހުރި ތަރުކާރީއާއި ގޮދަނާއި އެހެނިހެން ޒަރޫރީ ސާމާނު ވެސް ވަރަށް އަވަށް ހުސްވާނެ ކަމަށް އޭނާ ވިދާޅުވިއެވެ.
ޣައްޒާއަށް ކާބޯތަކެއްޗާއި އެހީގެ ސާމާނު ވެއްދޭނެ މަގުތައް ބަންދުވެފައިވާއިރު އެ ސަހަރުގައި އަނެއްކާ ވެސް ބަނޑުހައިހޫނުކަން ފެތުރުމުގެ ބިރު ވަނީ އުފެދިފައެވެ.