ރަމަޟާން 7ވީ7 ލީގު: އެލްޓީ އަށް ފުރަތަމަ މޮޅު، ހުޅުމާލެ ވެޓެރެންސް ތިން ޕޮއިންޓް ލީޑެއް
-
އެލްޓީ އޮތީ ތިންވަނައިގަ
-
އެއްވަނައިގަ 6 ޕޮއިންޓާއެކު އޮތީ، މުއިވެޔޮ ފްރެންޑްސް ކުލަބް
މޯލްޑިވްސް ސޮކަރ މޭޓްސްއިން އިންތިޒާމުކޮށްގެން ކުރިއަށްގެންދާ ރަމަޟާން 7ވީ7 ލީގު 2026 ގެ ފުރަތަމަ މޮޅު އެލްޓީ ސްޕޯޓްސް ކުލަބުން ހޯދި އިރު ހުޅުމާލެ ވެޓެރެންސް ޓީމުން ގުރޫޕުގެ އެއްވަނައިގަ ތިން ޕޮއިންޓު ލީޑެއް ނަގައިފިއެވެ.
ހެންވޭރު ދަނޑުގައި ކުރިއަށްދާ މި މުބާރާތުގައި ދެ ޑިވިޝަނެއް ހިމެނެއެވެ. އެގޮތުން 40 އަހަރުން މަތީގެ ވެޓެރަންސް ކެޓެގަރީގައި 10 ޓީމެއް އަދި 50 އަހަރުން މަތީގެ މާސްޓަރސް ކެޓެގަރީގައި 8 ޓީމެއް ވަނީ ބައިވެރިވެފައެވެ.
މުބާރާތުގައި މިއަދު ކުޅުނު ފުރަތަމަ މެޗުގައި ވެޓެރެންސް ކެޓަގަރީގަ އެލްޓީން ވަނީ މާފަންނު ސެންޓްރަލް ޔުނައިޓެޑް މައްޗަށް ބޮޑު މޮޅެއް ހޯދާފައެވެ. އެލްޓީ މެޗު ކާމިޔާބު ކުރީ 6-2 ލަނޑުންނެވެ.
މެޗުގައި އެލްޓީގެ ހަސަން ނޫރިޝް ތިން ލަނޑު ޖެހިއިރު ހަސަން ނަސީރު ވަނީ ދެ ލަނޑުޖަހާފައެވެ. އަނެއް ލަނޑު އެޓީމަށް ކާމިޔާބުކޮށްދިނީ ހަސަން އިރުޝާދުއެވެ. މާފަންނު ޓީމަށް ލަނޑުތައް ޖަހައިދިނީ ޝާން އަހުމަދާއި، އަރުޝަދު މުހައްމަދު އިސްމާއިލްއެވެ.
މި މޮޅާއެކު އެލްޓީ އޮތީ ތިންވަނައިގައެވެ. އެއްވަނައިގަ 6 ޕޮއިންޓާއެކު އޮތީ، މުއިވެޔޮ ފްރެންޑްސް ކުލަބެވެ.
މުބާރާތުގައި ދެން މިއަދު ކުޅުނީ މާސްޓަރސް ކެޓަގަރީގެ ދެމެޗެވެ. އެގޮތުން ސްޓެލްކޯގެ މައްޗަށް ޅ.ހިންނަވަރު ހިރިޔާ ވަނީ 2-1 ލަނޑުން ކުރިހޯދާފައެވެ. ހިރިޔާ ޓީމަށް ލަނޑުތައް ޖަހައިދިނީ މުހައްމަދު އިބްރާހިމް އާއި އައްބާސް މުހައްމަދެވެ. ސްޓެލްކޯގެ ލަނޑުޖެހީ އިބްރާހިމް ރަޝީދެވެ.
މި ކެޓަގަރީގެ ފަހު މެޗުގައި ވިކްޓަރީ ސްޕޯޓްސް ކުލަބުގެ މައްޗަށް ހުޅުމާލެ ވެޓެރެންސް ކުލަބުން ވަނީ 2-0 ލަނޑުން ކުރި ހޯދާފައެވެ. ހުޅުމާލެ ޓީމަށް ލަނޑުތައް ޖަހައިދިނީ މުހައްމަދު ނިޒާމް އާއި މުހައްމަދު ޖަމީލުއެވެ.
މި ނަތީޖާއެކު މި ކެޓަރގަރީގެ ގުރޫޕް އޭގައި ހުޅުމާލެ ވެޓެރެންސް އެއްވަނައިގަ އޮތީ ތިން ޕޮއިންޓުގެ ލީޑަކާ އެކުއެވެ. ހިރިޔާ އާއި ސްޓެލްކޯ އަށް ލިބުނީ 3 ޕޮއިންޓެވެ.