50އަށްވުރެ ގިނަ ޓޫރިސްޓު އެނދު ހިމެނޭ ރަށްތަކުގައި މައުލޫމާތުދޭ ސެންޓަރުތަކެއް

މީހުން ދިރިއުޅޭ ރަށްރަށުގެ ތެރެއިން 50 އެނދަށްވުރެ ގިނަ ޓޫރިސްޓު އެނދު ހިމެނޭ ރަށްތަކުގައި މައުލޫމާތު ދިނުމަށް ޚާއްޞަ ސެންޓަރެއް ޤާއިމްކުރުމަށް ނިންމާފައިވާ ކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ، އެ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވީ، ރާއްޖޭގެ ފަތުރުވެރިކަން އަހަރުން އަހަރަށް ކުރިއަރުވަން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ލޯކަލް ޓުއަރިޒަމާއި، ފަތުރުވެރިކަމަށް ނެރޭ އެނދުގެ އަދަދު އިތުރު ކުރުމާއި، އައު ރިސޯޓުތައް ހުޅުވުން ހިމެނޭ ކަމަށެވެ. ވަޒީރު ވިދާޅުވީ، މިހާރުވެސް ފަތުރުވެރި ކަމަށް 168 ތަނެއް ތަރައްޤީ ކުރުމުގެ މަސައްކަތް ކުރަމުންދާ ކަމަށެވެ. އަދި މިއަހަރު މުޅިން އަލަށް ހުޅުވޭނެ ކަމަށް ލަފާކުރާ 7 ރަށެއްގެ މަސައްކަތް ކުރަމުންދާ ކަމަށް ވިދާޅުވިއެވެ. ވަޒީރު ޠާރިޤު ވިދާޅުވީ، މި ރިޒޯޓްތައް ހުޅުވުމުން 10000އަށްވުރެ ގިނަ އެނދު އިތުރުވާނެ ކަމަށް ލަފާކުރެވޭ ކަމަށެވެ.

މީގެއިތުރުން މީހުން ދިރިއުޅޭ ރަށްތަކުގެ ތެރެއިން 50 އެނދަށްވުރެ ގިނަ ޓޫރިސްޓު އެނދު ހިމެނޭ ރަށްތަކުގައި ޓޫރިސްޓު އިންފޯރމޭޝަން ސެންޓަރުތަކެއް ޤާއިމްކުރުމަށް ނިންމާފައިވާ ކަަމަށް ވަޒީރު ވަނީ ވިދާޅުވެފައެވެ. މިއީ، ރަށްރަށަށް ޒިޔާރަތް ކުރާ ފަތުރުވެރިންނަށް މައުލޫމާތު ދިނުމަށްޓަކައި ޤާއިމްކުރާ ސެންޓަރުތަކެކެވެ. ވަޒީރު ވިދާޅުވީ، މީގެ ސަބަބުން ފަތުރުވެރިކަމާއި ގުޅިގެން ދިމާވާ އިޖުތިމާޢީ މައްސަލަތަކަށް ޙައްލެއް ލިބި، ރިވެތި އާދަކާދަތަކާއި، ސަޤާފަތް ރައްކާތެެރިކޮށް ދެމެހެއްޓުމާއެކު ރަށު ފަތުރުވެރިކަން ތަރައްޤީ ކުރުމަށް މަގުފަހިވެގެންދާނެ ކަމަށެވެ.

" މީގެ ސަބަބުން ފަތުރުވެރިންނަށް ދިމާވާ މައްސަލަަތަކަށް ޙައްލު ލިބިގެންދާނެ. އަޅުގަނޑުމެން ބޭނުންވަނީ ފަތުރުވެރިން އާންމުން ދިރިއުޅޭ ރަށްރަށުގައި ދިރިއުޅޭއިރު، އިޖްތިމާޢީ ރިވެތި މިންގަނޑުތަކަށް އުޅުމާއި، އެރަށެއްގެ ސަޤާފަތަށް އިސްކަމެއްދީގެން ފަތުރުވެރިންނަށް ދޭންޖެހޭ އިންފޯމޭޝަންތައް ދިނުމަށް އަދި ފަތުރުވެރިންނަށް ދިމާވާ ކަންތައްތަކަށް ފަސޭހައިން ޙައްލެއް ހޯދައިދިނުމަށް" ވަޒީރު ވިދާޅުވިއެވެ.

ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވީ، މި އިންފޯމޭޝަން ސެންޓަރުތައް ޤާއިމްކުރާނީ އެރަށެއްގެ ކައުންސިލާއި ގުޅިގެން ކަމަށެވެ.

2019 ވަނަ އަހަރަށްފަހު މިދިޔަ އަހަރުގެ ތެރޭގައި ވަނީ، ރާއްޖެއަށް ޒިޔާރަތް ކުރާ ފަތުރުވެރިންނަށް އަމާޒު ކޮށްގެން ވިޒިޓަރ ސާރވޭއެއް ބާއްވާފައެވެ. ފަތުރުވެރިކަމާއި ބެހޭ ވުޒާރާއިން ވިދާޅުވީ، މި ސާރވޭގައި ބައިވެރިވި 80 އިންސައްތަ މީހުން ރާއްޖޭގައި ހޭދަކުރި ޗުއްޓީއާއިމެދު ވަރަށް ބޮޑަށް ހިންހަމަޖެހޭކަން ފާޅުކޮށްފައިވާއިރު، 90 އިންސައްތަ އަށްވުރެ ގިނަ މީހުން އަލުން އެނބުރި އަންނަން ބޭނުންވާކަން ފާހަގަކޮށްފައިވާ ކަމަށެވެ.

އެ ވުޒާރާއިން ވިދާޅުވީ، މި ސަރވޭއަށް ބިނާކޮށް ސަމާލުކަން ދޭންވީ ކަންތައްތަކަށް ބަލާއިރު، ފަތުރުވެރިންނަށް ރާއްޖެ އައިސް އަވަސް އަވަހަށް އެކި ތަންތަނަށް ދަތުރު ކުރެވޭނެ ގޮތަށް ފްލައިޓް ކަނެކްޝަން އިތުރު ކުރުމާއި، އެތެރޭގެ ދަތުރުފަތުރުގެ ނިޒާމު ހަރުދަނާކުރުން ހިމެނޭ ކަމަށެވެ.

މީގެ އިތުރުން ރަށު ފަތުރުވެރިކަން ކުރިއެރުވުމަށްވެސް އެ ވުޒާރާއިން ވަނީ މިދިޔަ އަހަރު ގިނަ މަސައްކަތްތަކެއް ކޮށްފައެވެ. އެގޮތުން މިސާރވޭގެ ތެރެއިން ކ، އއ އަދި އދގެ އަތޮޅުން ހޮވާލި 5 ރަށަކަށް ޒިޔާރަތްކޮށް، މިރަށްތަކުގެ ގެސްޓުހައުސްތައް ހިނގާ ފަރާތްތަކާއި، ރަށުގެ ރައްޔިތުންނާއި އަދި ރަށުގައި ތިބި ފަތުރުވެރިންނާއި ވަކިން ބައްދަލުކޮށް މައުލޫމާތު ހޯދާފައިވެއެވެ. މި ސާރވޭއިން ލިބުނު މައުލޫމާތުތަކަށް ބަލައި، ރިޕޯޓް ތައްޔާރު ކުރުމުގެ މަސައްކަތް ކުރަމުންދާ ކަަމަށްވެސް ފަތުރުވެރިކަމާއި ބެހޭ ވުޒާރާއިން ވިދާޅުވިއެވެ.