ކަރަންޓު ޑިސްޓްރިބިއުޝަން ފޮށިތަކުގައި ޕޯސްޓަރު ހަރުނުކުރަން އެދިއްޖެ
-
މިކަމުގެ ސަބަބުން ޑިސްޓްރިބިއުޝަން ފޮށި ހުޅުވާ، މެއިންޓެއިން ކުރުމަށް ދަތިވާކަން އެކުންފުނިން ފާހަގަކުރޭ
ސްޓެލްކޯގެ ސަބްސްޓޭޝަން އިމާރާތްތަކުގެ ފާރުތަކާއި، ޑިސްޓްރިބިއުޝަން ފޮށިތަކުގައި ޕޯސްޓަރާއި ސްޓިކަރ ހަރުނުކުރުމަށް އެކުންފުނިން އެދިއްޖެއެވެ.
ސްޓެލްކޯއިން ވިދާޅުވީ، އެކުންފުނިން ޚިދުމަތްދޭ އިމާރާތްތަކާއި، ސަބްސްޓޭޝަން ޢިމާރާތްތަކުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި އެކި ފަރާތްތަކުން ޕޯސްޓަރު، ސްޓިކަރ ފަދަ ތަކެތި ތަތްކުރަމުންދާކަން ފާހަގަކުރެވިފައިވާކަމަށެވެ. އަދި މިކަމުގެ ސަބަބުން ޑިސްޓްރިބިއުޝަން ފޮށި ހުޅުވާ، މެއިންޓެއިން ކުރުމަށް ދަތިތައް ދިމާވަމުންދާކަމަށް ސްޓެލްކޯއިން ވިދާޅުވިއެވެ.
ސަބްސްޓޭޝަން ޢިމާރާތްތަކުގެ ބޭރުގައި ހަރުކޮށްފައިވާ އިންޒާރު ނުވަތަ ނުރައްކާ ބޯޑުތަކުގެ މަތީގައި ސްޓިކަރ އަދި ޕޯސްޓަރ ތަތްކުރުމުގެ ސަބަބުން ރައްކާތެރިކަމާއެކު ދެމެހެއްޓެނެވި ގޮތެއްގައި ކަރަންޓުގެ ޚިދުމަތް ދިނުމަށް ސްޓެލްކޯއިން ކުރަމުންދާ މަސައްކަތްތަކަށް ހުރަސް އެޅެމުންދާކަންވެސް އެކުންފުނިން ވަނީ ފާހަގަކޮށްފައެވެ.
އެހެންކަމުން ޚިދުމަތްދޭ ޢިމާރާތްތަކާއި، ސަބްސްޓޭޝަންތަކުގެ ޢިމާރާތުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި ޕޯސްޓަރ، ސްޓިކަރ އަދި މިނޫނަސް އެއްވެސް އެއްޗެއް ތަތްނުކުރުމަށް ސްޓެލްކޯއިން ވަނީ އެދިފައެވެ.