އެފްއޭއެމް ވެޓެރެންސް ކަޕް 2026 ގައި އަލީ ޝިހާމްގެ ހެޓްރިކާ އެކު މުބާރާތުގެ ފުރަތަމަ މޮޅު ހުއްރިއްޔާ ސްޕޯޓްސް ކުލަބުން ހޯދައިފިއެވެ. ހުރާ މެޗު ކާމިޔާބުކުރީ ޔުނައިޓެޑް ވިކްޓަރީ (ޔޫވީ)އާ ވާދަކޮށް 4-1 ލަނޑުން މެޗު ކާމިޔާބުކޮއްގެންނެވެ.
މާފަންނު އެއްނަންބަރު ޓާފް ދަނޑުގައި ކުޅުނު މެޗުގައި ގިނައިރު ބޯޅަގެންގުޅެ ގިނަ ހަމަލާތައް އުފެއްދީ ހުރާ ޓީމުންނެވެ. މެޗުގެ ފުރަތަމަ މިނިޓުން ފެށިގެން އެޓޭކްގައި ހުރާ ޓީމުން ދިއައީ ޔޫވީގެ ގޯލަށް ނުރައްކާ ކުރަމުންނެވެ. އެގޮތުން ހުރާގެ އަލީ އުމަރު ފޮނުވާލި ބޯޅައެއް ވަނީ ދަނޑިއަށް އަމާޒުވެފައެވެ.
ހުރައަށް ލީޑު ނަގައިދިނީ މެޗުގެ 11 ވަނަ މިނިޓުގައި އަލީ އުމަރު ކާމިޔާބުކުރި ލަނޑުންނެވެ. ހުރާ ޓީމުން ލީޑު އިތުރަށް ފުޅާކުރީ 28 ވަނަ މިނިޓުގައި އަލީ ޝިހާމް ކާމިޔާބުކުރި ލަނޑުންނެވެ.
މެޗުގެ ފުރަތަމަ ހާފު ނިމުމުގެ ކުރިން ހުރާ ޓީމުގެ ތިންވަނަ ލަނޑު އަލީ ޝިހާމް ޖެހީ އިސްމާއިލް މުހައްމަދު ދިން ބޯޅައަކުންނެވެ. މި ލަނޑު އަލީ ޝިހާމް ކާމިޔާބު ކުރީ ފުރަތަމަ ހާފުގެ އެންމެ ފަހު މިނިޓުގައެވެ.
ހުރާގެ ހަތަރު ވަނަ ލަނޑުޖަހާ އަލީ ޝިހާމް ހެޓްރިކް ފުރިހަމަ ކުރީ މެޗުގެ 47 ވަނަ މިނިޓުގައެވެ. އޭގެ ފަހުން ހުރާގެ އަހުމަދު ސަމާއު އޭރިއާ ބޭރުން ފޮނުވާލި ބޯޅައެއް ގޯލުގެ ދަނޑިއަށް ވަނީ އަމާޒުވެފައެވެ.
މެޗުގައި ޔޫވީން ޖެހި ހަމައެކަނި ލަނޑު 53 ވަނަ މިނިޓުގައި ޖެހީ އިބްރާހިމް ހަސަން ހުސްކޮށް އޭރިއާތެރެއަށް ވަދެ ފޮނުވާލި ބޯޅަ ކީޕަރު އަތުގަ ޖެހިފަ ގޯލަށް ވަދެގެންނެވެ.
މުބާރާތުގައި ހުރާ ހޯދި ފުރަތަމަ މޮޅާއެކު އެޓީމުވަނީ ގުރޫޕުގެ ތިންވަނައަށް ޖެހިލާފައެވެ. ހުރައަށް ވުރެ އެއްޕޮއިންޓް އިތުރަށް ހޯދައިގެން ޕޮލިސް ކުލަބު ދެވަނައިގަ އޮތްއިރު 7 ޕޮއިންޓާ އެކު އެއްވަނައިގަ އޮތީ ހުޅުމާލެ ވެޓެރެންސް ކުލަބެވެ.