އައިސްޕްލާންޓްތައް ނިންމާ މިއަހަރު އޮޕަރޭޝަނަށް ގެންނަނީ

ސަރުކާރުގެ އަމާޒަކީ މިހާރު ކުރިއަށްގެންދިޔުމަށް ނިންމާފައިވާ އައިސްޕްލާންޓްތަކުގެ މަސައްކަތް ނިންމާ މިއަހަރު އޮޕަރޭޝަނަށް ގެނައުންކަމަށް މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ޝިޔާމް ވިދާޅުވީ ސަޢުދީ ފަންޑުންނާއި ސަރުކާރުގެ ބަޖެޓުން ޚަރަދުކޮށްގެން އައިސްޕްލާންޓް ތަރައްޤީކުރުމަށް ނިންމާފައިވާކަމަށެވެ.

ވަޒީރު ޝިޔާމް ވިދާޅުވީ މަސްވެރިންނަށް ދިމާވާ މައްސަލަތައް ހައްލުކުރުމަށްޓަކައި ކުރާ މަސައްކަތްތުގެ ތެރެއިން އައިސް ލިބުމުގެ ދަތިތައް ހައްލުކުރުމުގެ މަސައްކަތް ކުރަމުންދާކަމަށެވެ.

އެގޮތުން 6 ރަށެއްގައި ޤާއިމްކުރި އައިސްޕްލާންޓްތައް އޮޕަރޭޝަނަށް ގެނެސްފައިވާކަމަށް ވަޒީރު ވިދާޅުވިއެވެ. މިއާއެކު އުތުރާއި ހުވަދުއަތޮޅުގައި އަލަށް ޤާއިމްކުރި އައިސްޕްލާންޓްތަކާއި އެ ސަރަޙައްދުގައި މަސްވެރިކަން ކުރާ ފާރަތްތަކަށް ލުއިފަސޭހަތަކެއް ލިބޭނެކަމަށެވެ. ވަޒީރު ވިދާޅުވީ މިހާރުވެސް 9 އައިސްޕްލާންޓެއް ޤާއިމްކުރުމުގެ ޢަމަލީ މަސައްކަތް ކުރިއަށްދާކަމަށެވެ.

އަމަލީ މަސައްކަތް ކުރިއަށްދާ އައިސް ޕްލާންޓްތައް:

- ލ. މާބައިދޫ
- ލ. މާވަށް
- ލ. ހިތަދޫ
- މ.ވޭވަށް
- ޅ. ނައިފަރު
- ށ. ކޮމަންޑޫ
- މ. މުލައް
- ކުޅުދުއްފުށި ސިޓީ
- ދ. ހުޅުދެލި

"މި 9 ޕްލާންޓްގެ މަސައްކަތްތައް އެކި މަރުހަލާތަކުގައި. ބައެއް އައިސް ޕްލާންޓްތައް ކަރުދާހުގައި. ބައެއް ޕްލާންޓްތައް ޢަމަލީ ގޮތުން މަސައްކަތްތައް ފެށިފައި." މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވިއެވެ.

ސަޢުދީ ފަންޑުން ކުރިއަށް ގެންދިޔުމަށް ނިންމާފައިވާ މަޝްރޫޢުތަކަށް އަލިއަޅުވާލައްވާ ވަޒީރު ވިދާޅުވީ 5 އައިސްޕްލާންޓެއްގެ މަސައްކަތް ސަޢުދީ ފަންޑުން ކުރިއަށް ގެންދިޔުމަށް ހަމަޖެހިފައިވާކަމަށެވެ.

ސަޢުދީ ފަންޑުން ކުރިއަށްގެންދާ މަޝްރޫޢުތައް:

- ގދ. ރަތަފަންދޫ
- އއ. ރަސްދޫ
- ހއ. ދިއްދޫ
- ގއ. ދާންދޫ
- ކ. ގާފަރު

ސަރުކާރު ބަޖެޓުން ކުރިއަށްގެންދާ އިތުރު މަޝްރޫޢުތައް

- ގއ. ނިލަންދޫ
- ގއ. ވިލިނގިލި
- ގއ. މާމެންދޫ

ވަޒިރު ވިދާޅުވީ މި އައިސް ޕްލާންޓްތަކުގެ މަސައްކަތް މިއަހަރު ފަށާ ނިންމުމަކީ އަމާޒެއްކަމަށެވެ. އެގޮތުން 23 އައިސްޕްލާންޓެއްގެ މަސައްކަތް ނިންމާ މިއަހަރު އޮޕަރޭޝަނަށް ގެނައުންކަމަށެވެ. އެއާއެކު ރާއްޖޭގެ މޫސުމީ މަސްވެރިކަމުގައި އައިސްއަށް ޖެހޭ ޖެހުން އެއްކޮށް ނިމުމަކަށް ގެނެވޭނެކަމަށެވެ.

އައިސް ޕްލާންޓްތަކުގެ އިތުރުން ކޯލްޑް ސްޓޯރޭޖްތައް ޤާއިމްކުރުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ. ރާއްޖޭގައި މިހާރު ކޯލްޑް ސްޓޯރޭޖްގެ ކެޕޭސިޓީއަކީ 9500 މެޓްރިކް ޓަނުގައެވެ. އަދި އެއަދަދު 25000 ޓަނަށް އިތުރުކުރުމަކީ ސަރުކާރުގެ އަމާޒެކެވެ. އެކަން ކުރުމަށްޓަކައި މިހާރުވެސް 4 ރަށެއްގައި ކޯލްޑް ސްޓޯރޭޖް ޤާއިމްކުރުމުގެ މަސައްކަތް ދަނީ ކުރަމުންނެވެ.

އެގޮތުން ކޫއްޑޫއާއި ފެލިވަރުގައި 4000 ޓަނަށް ކެޕޭސިޓީ އިތުރުކުރުމުގެ މަސައްކަތް ކުރަމުން އަންނައިރު ގދ. ތިނަދޫގައި 1000 ޓަނުގެ ކެޕޭސިޓީ އިތުރުކުރުމާއި މުލަކުގައި 500 ޓަނަށް ކެޕޭސިޓީ އިތުރުކުރުމުގެ މަސައްކަތް އަންނަނީ ކުރަމުންނެވެ. މީގެ އިތުރުން ސ. ހުޅުމީދޫގައި ކެޕޭސިޓީ 500 ޓަނަށް އިތުރުކުރުމަށް ނިންމާފައިވާއިރު ތ. ހިރިލަންދޫގައި 200 ޓަނުގެ ކޯލްޑް ސްޓޯރޭޖްއެއް ޤާއިމްކުރުމަށްވެސް ވަނީ ނިންމާފައެވެ. ހއ. އިހަވަންދޫގައި ކޯލްޑް ސްޓިރެޖް ޤާއިމްކުރުމަށް ކުރަންޖެހޭ މަސައްކަތްތަަކާއި ކަނޑުއޮއްގިރީގައިވެސް ކޯލްޑް ސްޓޯރޭޖް 200 ޓަނަށް އިތުރުުކުރުމުގެ މަސައްކަތްވެސް ހިމެނެއެވެ.