"ދަރިވަރުން ގިނަ ޤައުމުތަކުގެ ސްޓައިޕެންޑު އަވަހަށް މުރާޖާކުރަނީ"

ސަރުކާރުގެ ޚަރަދުގައި އެންމެ ގިނައިން ދަރިވަރުން ކިޔަވާ ޤައުމުތަކުގެ ސްޓައިޕެންޑް އަވަހަށް މުރާޖާ ކުރެވޭތޯ ބަލާނެ ކަމަށާއި, ދަރިވަރުންނަށް ފައިސާ ދޫކުރުމުގެ މަސައްކަތް ކުރިއަށް ވުރެ ރަނގަޅުވެފައިވާކަމަށް މަތީ ތަޢުލީމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

ބޭރު ޤައުމުތަކުގައި ކިޔަވާ ދަރިވަރުންނަށް ދޫކުރާ ސްޓައިޕަންޑް މުރާޖާކުރުމުގެ މަސައްކަތް އެ ވުޒާރައިން ވަނީ ފައްޓަވާފައެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ސްޓައިޕެންޑް މުރާޖާ ކުރުމާ ގުޅޭގޮތުން ޕީއެސްއެމް ނިއުސްއިން ކުރި ސުވާލަކަށް ޖަވާބު ދެއްވަމުން މަތީ ތަޢުލީމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވީ، އެންމެ ގިނަ ދަރިވަރުން ކިޔަވަމުންދާ ޤައުމުތަކުގައި ތިބި ދަރިވަރުންނަށް ދޫކުރާ ސްޓައިޕަންޑް މުރާޖާ ކުރުމުގެ މަސައްކަތް އަވަސް ކުރާނެކަމަށެވެ.

ސަރުކާރުން ދޫކުރާ ލޯނު ސްކީމުގެ ދަށުން ކިޔަވާ ދަރިވަރުންނަށް އެއް ގޮތަކަށް ސްޓައިޕެންޑުގެ ގޮތުގައި ފައިސާ ދޭތާ 7 ވަރަކަށް އަހަރުވެއްޖެ ކަމަށާއި އެ ސްޓައިޕެންޑުތައް މުރާޖާކުރުމުގެ މަސައްކަތް ފަށާފައިވާ ކަމަށް ވިދާޅުވިއެވެ. މިގޮތުން، ދިރިއުޅުމުގެ ޚަރަދުތައް ކޮންމެ ޤައުމެއްގައި މަތިވަމުން އަންނާތީ ސްޓައިޕެންޑުތައް މުރާޖާކުރާއިރު އެ ކަމަށް ބަލާނެކަން ވަޒީރު ފާހަގަކުރެއްވިއެވެ.

"އެނގިވަޑައިގަންނަވާނެ ކޮންމެ ޤައުމެއްގައި ވެސް އޮންނާނެ ސްޓޫޑެންޓު ވިސާ ދޫކުރުމުގައި ބަލާ މިންގަނޑުތަކެއް. މިހާވަރަށް ކުއްޖާ އަތުގައި ފައިސާ ހުންނަން ޖެހޭނެޔޭ ވިސާ ދޫކުރުމުގެ ކުރިން. އެހެންވީމަ އެ ކަންތައްތަކަށް އަޅުގަނޑުމެން ބަލާނަން އެއް ކަމަކަށް." މަތީ ތަޢުލީމާ ބެހޭ ވަޒީރު ޑރ. އަލީ ޙައިދަރު އަޙްމަދު ވިދާޅުވިއެވެ.

ވަޒީރު ވިދާޅުވީ ބައެއް ފަހަރަށް ދަރިވަރުންނަށް ފައިސާ ފޮނުވާއިރު ލަސްތަކެއް ދިމާވާ ކަމަށެވެ. ގިނަ ފަހަރަށް އެހެން ވަނީ، ޔުނިވާސިޓީތަކުން އިންވޮއިސް ލިބޭއިރު، ފައިސާ ފޮނުވާ މުއްދަތު ހަމަވާން ހަފުތާއަކަށް ވެފައި އޮންނާތީ ކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ދަރިވަރުންނަށް ފައިސާ ދޫކުރަނީ ތިން އިދާރާއަކުން ބަލާފަކަމަށެވެ. ނަމަވެސް، މިހާރު އެ މައްސަލަ ދިމާވާ މިންވަރު ކުރިއަށް ވުރެ މަދުކަމަށް ވިދަޅުވިއެވެ.

"އާންމު ގޮތެއްގައި އަޅުގަނޑު ދެކެނީ މިހާރު ކުރިއަށް ވުރެ ބޮޑުތަން މިހާރު ރަނގަޅުވެއްޖެހެން ޕޭމަންޓުތައް ދަރިވަރުންނަށް ދިނުމުގައި. ބައެއް ފަހަރަށް ދަރިވަރުންނަށް ޕޭމަންޓު ދޭންވާ މުއްދަތުގެ ދެ ހަފުތާ ކުރިން ވެސް އަޅުގަނޑުމެންނަށް ޕޭމަންޓުތައް ދެވިފައި އެބަހުރި" މަތީ ތަޢުލީމާ ބެހޭ ވަޒީރު ޑރ. އަލީ ޙައިދަރު އަޙްމަދު ވިދާޅުވިއެވެ.

ވަޒީރު ވަނީ ދަރިވަރުންނަށް ފައިސާ ފޮނުވަން ޖެހޭ މުއްދަތުގެ ދެ ހަފުތާ ކުރިން، %75 ދަރިވަރުންނަށް މިއަހަރު ފައިސާ ދެމުން އަންނަކަން ފާހަގަކުރައްވާފައެވެ. ދަރިވަރުންނަށް ދިމާވާ މައްސަލަތައް ޙައްލު ކުރުމަށް ވުޒާރާގެ ފަރާތުން އެހީތެރިކަން ފޯރުކޮށްދިނުމަށް، ދަރިވަރުންނަށް ވުޒާރާއާއި ގުޅޭނެ ގޮތަށް ޚާއްޞަ ނަމްބަރުތަކެއްވެސް ވަނީ ހަމަޖައްސާފައެވެ. އެގޮތުން މިދިޔަ އަހަރު ތެރޭ 50 ދަރިވަރުންނަށްވުރެ ގިނަ ދަރިވަރުން އުޅޭ ޤައުމުތަކަށް ޚާއްޞަކޮށްގެން ނަންބަރުތައް ހަމަޖައްސާފައިވެއެވެ.

މިހާރު ރައީސުލްޖުމްހޫރިއްޔާގެ ނިންމެވުމުގެ މަތިން 25 ދަރިވަރުންނަށްވުރެ ގިނަ ދަރިވަރުން އުޅޭ ޤައުމުތަކަށްވެސް އެގޮތަށް ގުޅޭނެ ގޮތް މަގުފަހި ކުރުމުގެ މަސައްކަތް އަންނަނީ ކުރަމުންނެވެ. އަދި މި ނަންބަރުތަކަކީ، 24 ގަޑިއިރު ގުޅައި މެސެޖުކޮށް ޚިދުމަތް ލިބޭނެ ނަންބަރުތަކެކެވެ.