ވިލާތުގެ އިއްތިޙާދު (އީޔޫ)ގެ މެންބަރު ޤައުމެއް ކަމުގައިވާ ސައިޕްރަސްގެ ދިފާޢީ ކަންކަން ވަރުގަދަ ކުރުމުގެ ގޮތުން އިނގިރޭސިވިލާތާއި ފަރަންސޭސިވިލާތުން ފިޔަވަޅުތަކެއް އަޅަން ފަށައިފިއެވެ. އެ ދެ ޤައުމުން ދިފާޢީ ފިޔަވަޅުތަކެއް އެޅުމަށް ނިންމާފައި ވަނީ، އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ފަށާފައިވާ ހަނގުރާމައާއެކު ސަރަޙައްދީ މަސްލަޙަތު ގޯސްވެ، ހަމަނުޖެހުންގަނޑު ފުޅާވެގެން ގޮސްފައިވާ ދަނޑިވަޅެއްގައެވެ.
އީރާނާ ދެކޮޅަށް ޔަހޫދީންނާއި އެމެރިކާއިން ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ. އަދި، މިނިވަންކަމާއި އިސްތިޤުލާލުގެ ދިފާޢުގައި އީރާނުން ވެސް ވަނީ ރައްދު ޙަމަލާ ދޭން ފަށާފައެވެ. އޭގެ ތެރެއިން ގިނަ ޙަމަލާތައް އަމާޒު ކުރަމުން ދަނީ ޔަހޫދީ ދައުލަތުގެ ރަށްތަކަށެވެ. އަދި، ގަލްފާއި ޢަރަބި ޤައުމުތަކުގައި އެމެރިކާއިން ޤާއިމު ކޮށްފައިވާ އަސްކަރީ މަރުކަޒުތަކާއި، އެމެރިކާގެ މަސްލަޙަތު އޮތް އިމާރާތްތަކަށެވެ.
އެ ޙަމަލާތަކުގެ ތެރެއިން ސައިޕްރަސްގައި ހުންނަ އިނގިރޭސިވިލާތުގެ އަސްކަރީ މަރުކަޒަކަށް އީރާންގެ އަސްކަރީ ޑްރޯނެއް ވަނީ ވެއްޓިފައެވެ. އެ ހާދިސާގައި އަސްކަަރީ މަރުކަޒަށް ކޮންމެ ވެސް ވަރެއްގެ ގެއްލުންތަކެއް ލިބިފައިވާއިރު، އެއީ އީރާނުން ގަސްދުގައި ދީފައިވާ ޙަމަލާއެއް ކަން ނުވަތަ ނޫން ކަން ސާފެއް ނޫނެވެ. ނަމަވެސް، ސައިޕްރަސްގެ ދިފާޢީ ކަންކަން ވަރުގަދަ ކުރުމަށް އިނގިރޭސިވިލާތާއި ފަރަންސޭސިވިލާތުން މަސައްކަތް ފަށާފައި މި ވަނީ އެ ހާދިސާއާ ގުޅިގެންނެވެ.
ޔަހޫދީންނާއި އެމެރިކާ ގުޅިގެން އީރާނާ ދެކޮޅަށް ފަށާފައިވާ ހަނގުރާމައިގައި އަމަލީ ގޮތުން ބައިވެރިވުމަށް އިނގިރޭސިވިލާތުން ކުރިން ވަނީ އިންކާރު ކޮށްފައެވެ. ނަމަވެސް، ސައިޕްރަސްގައި ހިނގި ހާދިސާއަށް ފަހު، އިނގިރޭސިވިލާތުގެ އަސްކަރީ މަރުކަޒުތައް ބޭނުން ކުރުމުގެ ހުއްދަ އެމެރިކާއަށް ދިނުމަށް އިނގިރޭސިވިލާތުގެ ބޮޑުވަޒީރު ކީރް ސްޓާމަރ ވަނީ ނިންމަވާފައެވެ. އޭގެ ތެރޭގައި، ފޯޅަވަހީގައި އެމެރިކާއާއި އިނގިރޭސިވިލާތުން ގުޅިގެން ހިންގާ އަސްކަރީ މަރުކަޒު ހިމެނެއެވެ.
އިނގިރޭސިވިލާތުގެ ދިފާޢީ ވުޒާރާއިން ބުނީ، ސައިޕްރަސްގެ ވައިގެ ދިފާޢީ ނިޒާމު ވަރުގަދަ ކުރުމުގެ ގޮތުން އިނގިރޭސިވިލާތުގެ އަސްކަރީ މަނަވަރު، އެޗްއެމްއެސް ޑްރެގަން އަދި ދެ އަސްކަރީ ހެލިކޮޕްޓަރު ސައިޕްރަސްއަށް ފޮނުވުމަށް ނިންމާފައިވާ ކަމުގައެވެ. އޭގެ ތެރޭގައި ހިމެނެނީ ވައިލްޑްކެޓް މަރުކާގެ އަސްކަރީ ހެލިކޮޕްޓަރެވެ. މީގެ ތެރެއިން އެޗްއެމްއެސް ޑްރެގަންއަކީ، ކޮންމެ 10 ސިކުންތެއްގެ ތެރޭގައި އަށް މިސައިލް އުދުއްސައިލުމުގެ ޤާބިލުކަން ލިބިފައިވާ މަނަވަރެކެވެ. އަދި، 'ސީ ވައިޕަރ' މިސައިލް ނިމާޒު ހަރުކޮށްފައިވާ އުޅަނދެކެވެ. މި ކަން އިޢުލާނު ކުރައްވައި ވާހަކަފުޅު ދައްކަވަމުން ބޮޑުވަޒީރު ސްޓާމަރ ވަނީ ސައިޕްރަސްގެ ރައްކާތެރިކަން ކަށަވަރު ކޮށްދިނުމުގައި އިނގިރޭސިވިލާތުން ދެމިއޮންނާނެ ކަމުގެ ޔަގީންކަން އަރުވާފައެވެ.
ފަރަންސޭސިވިލާތުގެ ރައީސް އިމަނުއެލް މެކްޚްރޮން ވެސް ވަނީ ސައިޕްރަސްއަށް ދިފާޢީ ގޮތުން އެހީތެރިކަން ފޯރުކޮށްދިނުމަށް ނިންމާފައިވާ ކަން އިޢުލާނު ކުރައްވާފައެވެ. އަދި، ފަރަންސޭސިވިލާތުގެ އަސްކަރީ މަތިންދާބޯޓު އުފުލާ މަނަވަރު، ޝާލެ ދެ ގޯލް މެޑިޓެރޭނިޔަން ކަނޑަށް ފޮނުވުމަށް އަމުރު ކުރައްވާފައެވެ. މީގެ އިތުރުން ރަފާލް މަރުކާގެ އަސްކަރީ މަތިންދާބޯޓުތަކެއް މެދުއިރުމައްޗަށް ފޮނުވުމުގެ މަސައްކަތް ފަށްޓަވާފައިވާ ކަން ވެސް އޭނާ ހާމަކުރެއްވިއެވެ.
ރަފާލް މަތިންދާބޯޓުތައް ބޭނުން ކޮށްގެން އީރާންގެ ބައެއް ޑްރޯންތައް ދިފާޢުކޮށް ވައްޓައިލާފައިވާނެ ކަމުގައި ފަރަންސޭސިވިލާތުގެ ޚާރިޖީ ވަޒީރު ޜޯން-ނޮއޭލް ބަޣޫ ވަނީ ވިދާޅުވެފައެވެ. އެއީ، އެކުވެރި ޢަރަބި ޢިމާރާތް (ޔޫއޭއީ)ގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ޙަަމަލާ ދިނުމަށް ބޭނުން ކޮށްފައިވާ ޑްރޯންތަކެއް ކަމަށް ބެލެވެއެވެ. ސައިޕްރަސްއަކީ ހުޅަނގުގެ ދިފާޢީ އިއްތިޙާދު (ނޭޓޯ)ގެ މެންބަރު ޤައުމެއް ނޫނެވެ. ނަމަވެސް، ފަރަންސޭސިވިލާތުން ވަނީ ސައިޕްރަސްއާ އެކު ދިފާޢީ އެއްބަސްވުމެއް އެކުލަވައިލާފައެވެ.