ކޮމެންޓްރީ ދަސްކޮށްދޭ ޕްރޮގްރާމުގައި ހިލޭ ބައިވެރިވެވޭނެ

ފުޓްބޯޅައިގެ ފޯރިގަދަ ދަނޑުމަތީގެ މަންޒަރުތައް ކިޔާދީ، ބެލުންތެރިންނާއި ހަމައަށް ފުޓްބޯޅައިގެ ފޯރި ގެންގޮސްދިނުމަށް ޝައުޤުވެރިވާ ޒުވާނުންނަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް މީޑިއާ އިންސްޓިޓިއުޓް (އެމްއެމްއައި) ގުޅިގެން ކޮމެންޓްރީ ދޭން ބޭނުންވާ ފަރާތްތަކަށް ޚާއްސަ ފުރުސަތެއް ހުޅުވާލައިފިއެވެ.

ފުޓްބޯޅަ ކޮމެންޓްރީ ދިނުމުގެ ތަމްރީން ޕްރޮގްރާމްގައި ބައިވެރިވުމުގެ ފުރުސަތު މިހާރު މިވަނީ ހުޅުވާލާފައެވެ. 15 އަހަރުން މަތީގެ މިދާއިރާއަށް ޝައުޤު ހުންނަ ބައިވެރިންނަށް ހުޅުވާލާފައިވާ މިޕްރޮގްރާމްގައި ހިލޭ ބައިވެރިވެވޭނެއެވެ. މިކަމަށް ޝައުގުވެރިވާ ފަރާތްތަކަށް 20 މާޗްގެ ނިޔަލަށް ފޯމު ހުށަހެޅޭނެ ކަމަށް ޕަބްލިކް ސާވިސް މީޑިއާގެ އެމްއެމްއައި އިން ބުނެއެވެ.

ޓީވީ އަދި ސޯޝަލް މީޑިއާއަށް ފުޓްބޯޅަ ކޮމެންޓްރީ ދިނުމަށް ޚާއްސަކޮށްފައިވާ މިތަމްރީން ޕްރޮގްރާމަކީ، ކޮމެންޓްރީ ދިނުމާއި، ކުޅިވަރުގެ ދާއިރާގެ ތަޖްރިބާކާރު ފަންނުވެރިންނާއެކު ކޮމެންޓްރީގެ އަސާސީ އުކުޅުތައް ދަސްކޮށްދޭ 5 ދުވަހުގެ ޕްރޮގްރާމެކެވެ.

އެފްއޭއެމްގެ ޖެނެރަލް ސެކެއްޓްރީ އަހުމަދު ޒަރީރު ވިދާޅުވީ ރާއްޖޭގެ އެކި ތަންތަނުން މެޗުތައް ލައިވްކޮށް ގެނެސްދޭ އިރު ކޮމެންޓްރީދޭނެ މީހުން ހޯދުމަކީ ވަރަށް ދަތިކަމެއް ކަމަށެވެ. ޓީވީގެ އިތުރުން ސޯޝަލްމީޑިއާގެ އެކި ޕްލެޓްފޯމުތަކުގައި އެއްފަހަރާ ގިނަ މެޗުތައް ލައިވްކޮށް ގެނެސްދޭއިރު ކޮމެންޓްރީ ރަނގަޅަށް ގެނެސްދޭން އެފްއޭއެމުން ބޭނުންވާ ކަމަށާއި މިހާރު ބައެއް މެޗުތައް ގެނެސްދެނީ ކޮމެންޓޭޓަރުން ނުލިބޭތީ ކޮމެންޓްރީއާއި ނުލާކަމަށެވެ.

އެހެންކަމުން މިދަތިކަން ހައްލުކުރުމަށް ކޮމެންޓޭޓަރުން އުފެއްދުމަށް ޕީއެސްއެމްއާއިއެކު މިފަދަ ޕްރޮގްރާމެއް ފަށަން ގަސްދުކުރީ އެފްއޭއެމްގެ ރައީސް އަޙްމަދު ޠާރިޤްގެ އިސްނެންގެވުމަކަށް ކަމަށެވެ.

"މިއައި ބަދަލުތަކާއެކުގައި ފުޓްބޯޅަ މެޗުތައް އެބަ ލައިވްކުރޭ ބައިވަރު މީޑިއަމްތަކުގައި. ހަމައެކަނި ޓީވީއެއް ނޫން. އަޅުގަނޑުމެން ސޯޝަލް މީޑިއާގައިވެސް އެބަކުރޭ. ދެން ބައެއް ފަހަރަށް އަޅުގަނޑުމެންގެ މެޗުތައް އެބަދޭ ދެތިން ހަތަރު މެޗު އެއްފަހަރާ އެކި ތަންތަނުގައި ކުރިޔަށްދާއިރުގަވެސް އަޅުގަނޑުމެންނަށް ވަރަށް ބޮޑު ޗެލެންޖަކަށް އެބަވޭ. އަޅުގަނޑުމެން މަސައްކަތް ކުރަނީ ޕީއެސްއެމްއާއި ގުޅިގެން، ޕީއެސްއެމަށްވެސް ވަރަށް ބޮޑު ޗެލެންޖަކަށް އެބަވޭ ހުރިހާ މެޗެއްގަ ކޮމެންޓްރީ ދޭނެ މީހުން ހޯދުން" ޒަރީރު ވިދާޅުވިއެވެ.

އެހެންކަމުން ކޮމެންޓްރީ ދިނުމަށް ޝައުގުވެރިކަން ހުރި މީހުންނަށް މިއީ ރަނގަޅު ފުރުސަތަކަށްވާނެ ކަމަށް ޒަރީރު ވިދާޅުވިއެވެ. އަދި މި ތަމްރީނު ޕްރޮގްރާމުގެ ސަބަބުން ޕީއެސްއެމްއިން ގެނެސްދޭ އެހެން ކުޅިވަރުތަކުގެ ލައިވްކަވަރޭޖަށްވެސް މީގެން ތަމްރީނުވެގެން އަންނަ ކުދިން ބޭނުން ކުރެވޭނެކަމަށް އެފްއޭއެމްގެ ޖެނެރަލް ސެކެއްޓްރީ ވިދާޅުވިއެވެ.

މޯލްޑިވްސް މީޑިއާ އިންސްޓިޓިއުޓްގެ އިންސްޓަރގްރާމާއި ފޭސްބުކްގައި ޙިއްސާކޮށްފައިވާ ލިންކް މެދުވެރިކޮށްވެސް އެޕްލައިކުރެވޭނެއެވެ. އަދި އިތުރު މައުލޫމާތު 3000340 މި ނަމްބަރު ފޯނަށް ގުޅައިގެން ލިބޭނެއެވެ.