އީރާނުގެ އަސްކަރީ މަނަވަރެއް އަޑިއަށްދަނިކޮށް، ސްރީ ލަންކާގެ ކަންޑުގެ ސިފައިންގެ އުޅަނދަކުން، އެ މަނަވަރުގައި ތިބި 30 ފަޅުވެރިން ސަލާމަތްކޮށްފިއެވެ.
ސްރީ ލަންކާގެ ޤާނޫނު ހަދާ މަޖިލީހަށް މަޢުލޫމާތު ދެއްވަމުން އެ ޤައުމުގެ ޚާރިޖީ ވަޒީރު، ވިޖިތާ ހޭރަތު ވިދާޅުވީ، އެ މަނަވަރުން އެހީއަށް އެދުމުން ފަޅުވެރިން ސަލާމަތްކޮށްފައިވަނީ ލަންކާގެ ކަނޑުގެ ސަރަޙައްދުގެ ބޭރުން ކަމަށެވެ. ސަލާމަތްކުރި ފަޅުވެރިން، ލަންކާގެ ދެކުނުގައި ހުރި ހޮސްޕިޓަލަކަށް ގެންދިޔަކަމަށް ވެސް އޭނާ ވިދާޅުވިއެވެ.
ލަންކާގެ ދިފާޢީ ވުޒާރާއިން ބުނީ، 180 ފަޅުވެރިންނާއެކު ދަތުރުކުރި އައިރިސް ޑެނާ ނަމަކަށް ކިޔާ އެ އަސްކަރީ މަނަވަރު، ލަންކާގެ ދެކުނު 40 މޭލު ބޭރުން އަޑިއަށް ގޮސްފައިވާ ކަމަށެވެ. އަދި އެ މަނަވަރުގައި ބާކީ ތިބި ފަޅުވެރިން ހޯދުމުގެ މަސައްކަތް ކުރަމުންދާކަމަށް އެ ވުޒާރާއިން ބުންޏެވެ. އެ މަނަވަރަށް ދިމާވި ސީދާ މައްސަލައެއް އަދި ސާފެއް ނުވެއެވެ.
ސްރީ ލަންކާގެ ކަނޑުގެ ސިފައިން ބުނީ، އެ އޮޕަރޭޝަން ކުރިއަށް ގެންގޮސްފައިވަނީ ބައިނަލްއަޤުވާމީ ޤާނޫނުތަކުގެ ދަށުން މަތިކޮށްފައިވާ ޒިންމާ އަދާކުރުމުގެ ގޮތުން ކަމަށެވެ. މިގޮތުން، ކަނޑުގެ ސިފައިން ޙަރަކާތްތެރިވެފައިވަނީ، އެ މަނަވަރުން އެހީއަށް އެދުމުން ކަމަށް ވެސް އެ އިދާރާއިން ބުނެފައިވެއެވެ.
އެ ޙާދިސާއާ ގުޅިގެން، ލަންކާގެ ޤާނޫނު ހަދާ މަޖިލީހުގެ މެމްބަރަކު ވަނީ، އެމެރިކާ އާ ގުޅިގެން ޔަހޫދީންގެ ނިރުބަވެރު ދައުލަތުން އީރާނަށް މިހާރު ދެމުންދާ ޢުދުވާނުތަކާ ގުޅުވައި، އެ މަނަވަރަށް ޙަމަލާއެއް އަމާޒުވީތޯ ސާފުކުރަން ސުވާލު ކުރައްވައިފައެވެ. ނަމަވެސް، އެ ސުވާލަށް ހޭރަތު ވެސް އަދި ލަންކާ ސަރުކާރުން ވެސް ޖަވާބު ދެއްވާފައެއް ނުވެއެވެ.
ރައީސް ޑޮނަލްޑް ޓްރަމްޕާއި ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫ އަޑީގައި ތިބެގެން އީރާނަށް އިސްވެ ޙަމަލާދީ، މުޅި މެދުއިރުމަތި ހަމަނުޖެހުންގަނޑެއްގެ ތެރެއަށް ވައްޓައިލީ ފެބުރުވަރީ 28ވަނަ ދުވަހުއެވެ. އެ ޙަމަލާތަކުގައި އީރާނުގެ ރޫޙީ އެންމެ މަތީ ވެރިޔާ އާޔަތުﷲ ޢަލީ އަލް ޚާމަނާއީ ވަނީ ޝަހީދުކޮށްލައިފައެވެ.
އީރާނުން ވެސް ދަނީ ރައްދުގައި، މެދުއެރުމަތީގެ އެކި ޤައުމުތަކުގައި އެމެރިކާ ސިފައިން ތިބޭ މަރުކަޒުތަކަށް ޢަމާޒުކޮށް ވަރުގަދަ ޙަމަލާތަކެއް ދެމުންނެވެ.