ޔަހޫދީންނާއި އެމެރިކާ ގުޅިގެން އީރާނާ ދެކޮޅަށް ޣައިރުޤާނޫނީ ހަނގުރާމައެއް ފެށުމުގެ ސަބަބުން ދުނިޔޭގެ ހަކަތައިގެ ލޭނާރުގެ ގޮތުގައި ބެލެވޭ ހުރްމުޛް ކަނޑުއޮޅި އޮތީ އީރާނުގެ ފުރިހަމަ ބާރުގެ ދަށުގައި ކަމަށް އީރާނުގެ އިންޤިލާބީ ފައުޖު، އައިއާރުޖީސީން ބުނެފިއެވެ.
އީރާނުން މިހެން ބުނެފައިވަނީ، ހުރްމުޛް ކަނޑުއޮޅިން ދަތުރުކުރާ ތެޔޮ ޓޭންކަރުތަކަށް ރައްކާތެރިކަން ދިނުމަށް އެމެރިކާގެ ކަނޑުގެ ސިފައިން ފޮނުވަން ތައްޔާރުކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ. ޓްރަމްޕް ސޯޝަލް މީޑިޔާގައި ވިދާޅުވީ، ދުނިޔެއަށް ބޭނުންވާ ހަކަތަ ފޯރުކޮށްދެވޭނެކަން އެމެރިކާއިން ޔަޤީންކުރާނެކަމަށެވެ. އެގޮތުން، އެމެރިކާގެ ކަނޑުގެ ސިފައިންގެ ހިމާޔަތުގެ ދަށުން އުޅަނދުފަހަރަށް ހުރްމުޛް ކަނޑުއޮޅިން ދަތުރުކުރެވޭނެ އިންތިޒާމް ވަރަށް އަވަހަށް ހަމަޖައްސަވާނެކަމަށް ޓްރަމްޕް ވިދާޅުވިއެވެ.
އައިއާރުޖީސީން ނެރުނު ބަޔާނެއްގައި ބުނީ، ހުރްމުޛް ކަނޑުއޮޅި އޮތީ އީރާނުގެ ކަނޑުގެ ސިފައިންގެ ފުރިހަމަ ބާރުގެ ދަށުގައި ކަމަށެވެ. މިގޮތުން، ތެލާއި ގޭސް އުފުލާ އުޅަނދުތަކަށް އެ ކަނޑުއޮޅިން ދަތުރުކުރުން ހުއްޓުވާފައިވާކަމަށް އައިއާރުޖީސީން ބުނެފައިވެއެވެ.
ދުނިޔޭގައި ކޮންމެ ދުވަހަކު ބޭނުންކުރާ ސާފުނުކުރާ ތެލުގެ %20 ނުވަތަ ދުވާލެއްގެ މައްޗަށް 20 މިލިޔަން ފީފާ، އަދި ދުނިޔޭގެ ބާޒާރަށް ނެރޭ ޤުދުރަތީ ގޭހުގެ (އެލްއެންޖީ) ފަސްބައިކުޅަ އެއްބައި އުފުލަނީ މި ހަނި ކަނޑުއޮޅިންނެވެ. މީގެ އިތުރުން، ދުނިޔޭގައި ދަނޑުވެރިކަމަށް ބޭނުންކުރާ އެންމެ މުހިންމު ފަރޓިލައިޒަރ ކަމުގައިވާ ޔޫރިއާގެ %33 ވެސް އުފުލަނީ މި މަގުންނެވެ. މިހާތަނަށް ލިބިފައިވާ ރިޕޯޓުތަކަށް ބަލާއިރު، އެ ސަރަޙައްދުން ދަތުރުކުރާ އުޅަނދުފަހަރުގެ އަދަދު ވަނީ %80 އަށްވުރެ ބޮޑަށް ދަށަށް ގޮސްފައެވެ.
މަސްރަޙު ދިރާސާކުރާ ފަރާތްތަކުން ބުނާގޮތުގައި، އެ ކަނޑުއޮޅި ބަންދުކުރުމުން، 3،200 އުޅަނދު ވަނީ ގަލްފުގައި ތާށިވެފައެވެ.
ޔަހޫދީންނާއި އެމެރިކާ ގުޅިގެން އީރާނަށް ޙަމަލާ ދޭން ފަށާފައި ވަނީ ފެބުރުވަރީ 28ވަނަ ދުވަހުއެވެ. ނަމަވެސް، މަސްރަޙު ނުތަނަވަސްވަމުން ދިޔުމާ އެކު، ތެލުގެ އަގުތައް އުފުލެން ފަށާފައިވާއިރު، ސާފުނުކުރާ ތެޔޮ ފީފާއެއްގެ އަގު މިހާރު ވެސް 82 އެމެރިކާ ޑޮލަރަށް އަރައިފައެވެ. މިއީ މިދިޔަ އަހަރުގެ ޖެނުއަރީ މަހުން ފެށިގެން ތެލުގެ އަގު މިވަރަށް ބޮޑުވި ފުރަތަމަ ފަހަރެވެ.
އީރާނުގެ ވަރުގަދަ ރައްދު ޙަމަލާތައް ކުރިއަށް
އެމެރިކާއާ ގުޅިގެން ޔަހޫދީން ފެށި ޢުދުވާނުގެ، ރައްދުގައި އީރާނުން ދަނީ ޔަހޫދީންގެ ނިރުބަވެރި ދަޢުލަތުގެ އިތުރުން މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ތިބޭ އަސްކަރީ މަރުކަޒުތަކަށް އަމާޒުކޮށް ވަރުގަދަ ޙަމަލާތައް ދެމުންނެވެ.
މިގޮތުން، މިއަދު އެކަނިވެސް، އިރާޤާއި ކުވެއިތުގައި ހުންނަ އެމެރިކާގެ އަސްކަރީ މަރުކަޒުތަކަށް އަމާޒުކޮށް 230 ޑްރޯން ޙަމަލާ ފޮނުވާލާފައިވާކަމަށް އައިއާރުޖީސީން ބުންޏެވެ.
އެ ޙަމަލާތަކުގައި އެކި ގެއްލުންތައް ލިބިފައިވާކަމަށް އެ ދެ ޤައުމުން ވެސް ރިޕޯޓުކޮށްފައިވާއިރު، ވައިގެ ދިފާޢީ ނިޒާމުން ވައްޓާލައި ޑްރޯންތަކުގެ ބައިތަކުން އާންމުންނަށް ވެސް އަނިޔާވަމުންދާކަމަށް ބުނެފައިވެއެވެ.
އިރާޤާއި ކުވެއިތުގެ އިތުރުން، ސަޢުދީ ޢަރަބިއްޔާގެ ދިފާޢީ ވުޒާރާއިން ބުނީ، އެ ޤައުމުގެ އިރުމަތީގެ ސަރަޙައްދަށް އީރާނުން އަމާޒުކުރި ޑްރޯން ޙަމަލާއެއް ދިފާޢުކޮށްފައިވާ ކަމަށެވެ. އިއްޔެ ސަޢުދީން ވަނީ އެ ޤައުމުގައި ހުރި އެންމެ ބޮޑު އެއް ސާފުކުރާ ތެޔޮ އުފައްދާ ކާރުޚާނާ ވަގުތީ ގޮތުން ބަންދުކޮށްފައެވެ. އެ ކާރުޚާނާ ބަންދުކުރީ، ޑްރޯނެއްގެ ބައިތަކެއް ވެއްޓި ހިނގި އަލިފާނުގެ ޙާދިސާއަކާ ގުޅިގެންނެވެ.
އެކުވެރި ޢަރަބި ޢިމާރާތް (ޔޫއޭއީ) އާއި ދުބާއީއަށް ވެސް އީރާނުން ޙަމަލާ ދެމުންދާކަމަށް ރިޕޯޓުކޮށްފައިވެއެވެ.