ޢުމުރުން 91 އަހަރުގައިވެސް ޙަސަން އިސްމާޢީލްގެ ހިތް މައްކާގައި

މައްކާގެ މާތް ބިމަށް އައުމަށް ކޮންމެ މުސްލިމަކުވެސް ބޭނުންވެއެވެ. އެކަމަށް ގަދައަޅައި މަސައްކަތް ކުރާ އެތައް ބަޔަކު ތިބެއެވެ. އެކަން ކާމިޔާބުވާ މީހުންނާއި ނުވާ މީހުން ތިބޭއިރު މައްކާގެ ބިމަށް އާދެވުމަކީ އަނެއްކާވެސް އެބިމަށް ދިޔުމުގެ ޝައުގުވެރިކަން އިތުރުވާކަމެކެވެ. މިފަދަ އެތައް މީހުންނެއްގެ ވާހަކަ އަޑުއަހާފައިވާއިރު، މިފަހަރު މިއޮތީ ތ.ވިލުފުށީ ޙަސަން އިސްމާޢީލްގެ ވާހަކައެވެ.

އުމުރުން 91 އަހަރުގެ ޙަސަން އިސްމާޢީލްވަނީ 3 ފަހަރު މިހާރު މައްކާގެ މާތް ބިމަށް އައިސްފައެވެ. ގިނަ ބަޔަކަށް މައްކާގެ ބިމުން ޙަސަން އިސްމާޢީލް ފެނުނަސް، މައްކާއަށް އައުމަށް ކުރި ދިގު އިންތިޒާރެއް ނޭނގޭނެއެވެ.

ޢުމުރުން 16 އަހަރުގައި ޒަވާޖީ ހަޔާތެއް ފަށައި 8 ދަރިން ލިބި ހަމަޖެހޭ ދިރިއުޅުމެއް ރަށުގައި އުޅެމުންދިޔަ ނަމަވެސް ޙަސަން އިސްމާޢީލްގެ ހިތް އެންމެ ބޮޑަށް ބޭނުންވީ މާތްﷲގެ ގެފުޅަށް ޒިޔާރަތްކުރުމަށެވެ. އެހެންކަމުން 15 ވަރަކަށް އަހަރު އެކި މަސައްކަތްކޮށްގެން ފައިސާ ރައްކާކޮށްގެން އަންހެނުން ގޮވައިގެން އައީ ޙައްޖުގެ މަތިވެރި އަޅުކަން އަދާކުރުމަށެވެ. މީގެ އެތައް އަހަރެއްކުރިން ކުރި އެދަތުރުގައި ޙައްޖަށް ދިޔުމަށް ޚަރަދުކުރީ 13000 ރުފިޔާކަމަށް ޙަސަން އިސްމާޢީލް ވިދާޅުވެއެވެ. ފުރަތަމަ ޙައްޖު ދަތުރާއި ގުޅޭގޮތުން ދުރު ހަނދާނެއް އައު ކުރަމުން އެފަހަރު ރާއްޖެއިން ގާތްގަނޑަކަށް 25 ވަރަކަށް ދިވެހީން ޙައްޖަށް އެގްރޫޕުން ދިޔަކަން ފާހަގަކޮށްލިއެވެ.

"ކޮންކަމެއް ނުކުރަނީ ފައިސާ ހޯދަން. 8 ކުދިންނަށް ޚަރަދު ކުރަމުން ރައްކާކުރެވޭ އެތިކޮޅު ރައްކާކުރަމުން ގޮސްގެން ގާތްގަނޑަކަށް 15 ވަރަކަށް އަހަރުން އެއްކުރެވުނީ." ޙަސަން އިސްމާޢީލް ކިޔައިދިނެއެވެ.

ޢާމްދަނީ ހޯދުމަށް ރޭނުމުގެ މަސައްކަތާއި މަސްވެރިކަމުގެ މަސައްކަތް ވަރަށް ބުރަކޮށްވަނީ ކޮށްފައެވެ. ޙަސަން އިސްމާޢިލްގެ މައްކާގެ 3 ދަތުރުގައިވެސް އަންހެނުން ބައިވެރިކުރިއެވެ. މިއަދު ޙަސަން އިސްމާޢީލް މައްކާއަށް އައީ އަންހެނުންނާއި ދަރިންނާވެސް އެކުގައެވެ. ޙަސަން އިސްމާޢީލަކީ މިއަދު 60 ދަރިން ކާފަ އަދި މުނިކާފަކިޔާ މީހެކެވެ.

މައްކާގެ ދަތުރުގައި އެންމެ ތަފާތުކަމަކަށް މިހާރު ފާހަގަކުރެވެނީ ތިބެންޖެހޭ ދުރުކަންކަމަށް އޭނާ ބުންޏެވެ. އޭރުވެސް ބޮޑު ގަޑި ހުންނަކަމަށާއި އެހެންނަމަވެސް ވަށައިގެން އެހުންނަ ބޮޑެތި ޢިމާރާތްތައް ނެތުމުން ދިވެހި ޙައްޖުވެރިންނަށްވެސް އެދިމާލުން ވަރަށް ކައިރިން ތިބޭނެ ތަންތަން ހަމަޖެހޭކަމަށް ބުންޏެވެ.

މާތްﷲގެ ރަޙުމަތުން ޙައްޖެއްކޮށް، 2 ވަނަ ޢުމްރާއަށް އައިސްހުރި ޙަސަން އިސްމާޢީލް ބުނީ، މައްކާގެ ބިމަށް އައުމަށް އަބަދުވެސް ޝައުގުވެރިކަން ހިތުގައި އޮންނަކަމަށެވެ. އަދި މައްކާއަށް ދާން ގަސްތުކޮށްގެން ތިބި މީހުންނަށް ޙަސަން އިސްމާޢީލްގެ ނަސޭޙަތަކީ، ތެދުވެރި ނިޔަތަކާއެކު މަސައްކަތް ކުރުމަށެވެ. މިބިމަށް އާދެވެނީ ﷲ ގެންނެވުމުންކަން ފާހަގަކުރިއެވެ.