ބީއެމްއެލްގެ އެހީގައި ދ.އަތޮޅު ތަޢުލީމީ މަރުކަޒުގައި މަލްޓިމީޑިއާ ސްޓޫޑިއޯއެއް

ދ. ކުޑަހުވަދޫގައި ހުންނަ ދ.އަތޮޅު ތަޢުލީމީ މަރުކަޒުގައި މަލްޓިމީޑިއާ ސްޓޫޑިއޯއެއް ޤާއިމްކޮށްފިއެވެ. މިއީ މިދިޔަ އަހަރު ބޭންކް ފަންޑް ކާމިޔާބުކުރި އެއް ފަރާތްކަމަށްވާ ޔުނައިޓެޑް އިސްލާމިކް ސޮސައިޓީ ޔޫއައިއެސް އިން ގާއިމްކުރި ތަނެކެވެ.

ބީއެމްއެލްއިން ވިދާޅުވީ، ޔޫއައިއެސްގެ އަމާޒަކީ، މިސްޓޫޑިއޯ މެދުވެރިކޮށް ދަރިވަރުންގެ މީޑިއާ ދާއިރާގެ ހުނަރާއި ތަޖުރިބާ އިތުރުކުރުންކަމަށެވެ. އެގޮތުން މިސްޓޫޑިއޯއިން ދަރިވަރުންނަށް ވީޑިއޯ އުފެއްދުމަށާއި، އިވެންޓް ބްރޯޑްކާސްޓްކުރުމަށާއި ވީޑިއޯ ރިޕޯޓް ހެދުމަށާއި، އެ މަރުކަޒުގެ ރަސްމީ ޔޫޓިއުބް ޗެނަލަށް ތައުލީމީ ކޮންޓެންޓް އުފެއްދޭނެ ތަމްރީނުދޭ އަދި އުފެއްދުންތެރި ތަނެއްގެ ގޮތުގައި މިސްޓޫޑިއޯ ބޭނުންކުރެވޭނެކަމަށް ބީއެމްއެލްއިން ވިދާޅުވެއެވެ.

ބީއެމްއެލްއިން ވިދާޅުވީ، މިސްޓޫޑިއޯ ބަލަހައްޓާނީ ސްކޫލާއި ޔޫއައިއެސް ޖަމްޢިއްޔާގެ ޚާއްސަ ޓީމަކުންކަމަށެވެ. އަދި މިތަނުގެ ބޭނުން އެންމެ ފުރިހަމަ ގޮތުގައި ހިފައި ދެމެހެއްޓެނިވި ގޮތެއްގައި އާމްދަނީ ލިބޭނެ ގޮތަށް ހިންގުމަށްޓަކައި ގަވާއިދުން ތަމްރީނު ދިނުމާއިއެކު އެކަށީގެންވާ ގޮތެއްގައި ތަން ބެލެހެއްޓޭނެ އިންތިޒާމް ހަމަޖެހިފައިވާކަމަށެވެ.

ޔޫއައިއެސްއަކީ ކުޑަހުވަދޫގެ ޖަމްޢިއްޔާއެކެވެ. ދ.އަތޮޅު ތަޢުލީމީ މަރުކަޒުގައި މަލްޓިމީޑިއާ ސްޓޫޑިއޯ ގާއިމުކޮށްފައިވަނީ ޕްރޮފެޝަނަލް ކެމެރާއާއި ލައިޓިންގ ކިޓް، އޯޑިއޯ ރެކޯޑު ކުރާނެ ވަސީލަތްތަކާއި އެޑިޓިންގ ކޮމްޕިއުޓަރ އަދި ސްޓްރީމިންގ ހާޑްވެއާވެސް ހިމަނައިގެންނެވެ.

ބޭންކް ފަންޑަކީ ތައުލީމު، ތިމާވެށި، ކުޅިވަރު އަދި މުޖުތަމަޢު ކުރިއެވުމަށް މަޝްރޫޢުތައް ހިންގުމަށް ބޭންކު ފަންޑަށް އެދި ހުށަހަޅާ ޖަމްޢިއްޔާ ޖަމާޢަތްތަކުގެ ތެރެއިން ހޮވާލާ ކޮންމެ ޖަމްޢިއްޔާއަކަށް 200،000 ރުފިޔާގެ ހިލޭ އެހީ ލިބޭ ފަންޑެކެވެ. މުޖުތަމަޢުގެ ތަރައްގީއަށް ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތަކަށް ބޭންކުން މުހިންމު އަހުމިއްޔަތުކަމެއް ދެއެވެ.