އިނގިރޭސި ޕްރިމިއަރ ލީގުގައި ނޮޓިންހަމް ފޮރެސްޓާ ދެކޮޅަށް ކުޅެ އެއްވަރުވި ނަމަވެސް، މެޗުގައި މޮޅަށް ކުޅެ، މޮޅުވުން ހައްގު ކުޅުމެއް ދެއްކީ މެންޗަސްޓަރ ސިޓީގެ ކުޅުންތެރިން ކަމަށް ޓީމުގެ ކޯޗު ޕެޕް ގާޑިއޯލާ ބުނެފިއެވެ.
ނޮޓިންހަމް ފޮރެސްޓުގެ ދަނޑުގައި ކުޅުނު މި މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ. މެޗުގައި ސިޓީން ދެ ފަހަރަށް ލީޑު ނެގިނަމަވެސް ފޮރެސްޓުގެ ކުޅުންތެރިން ވަނީ ގަދަ ހިތްވަރު ދައްކައި ނަތީޖާ ހަމަހަމަކޮށްފައެވެ.
މެޗަށްފަހު ވާހަކަދައްކަމުން ގާޑިއޯލާ ބުނީ، ޖުމްލަ ގޮތެއްގައި ސިޓީން މެޗުގައި މޮޅު ކުޅުމެއް ދެއްކި ނަމަވެސް، ރަނގަޅު ކުރަންޖެހޭ ބައެއް ކަންކަން މެޗުގައި ފާހަގަކުރެވުނު ކަމަށެވެ. ލީގުގައި ބާކީ ނުވަ މެޗު އޮތްއިރު އެ މެޗުތަކަށް ނުކުންނާނީ ރަނގަޅުކުރަންޖެހޭ ކަންކަން ރަނގަޅުކޮށްގެން ކަމަށް ވެސް ގާޑިއޯލާ ބުންޏެވެ.
ގާޑިއޯލާ އިތުރަށް ބުނީ، މެޗުން މޮޅުވާން ދެ ފަހަރަށް މެޗުގައި ލީޑު ނެގުނު ނަމަވެސް ހެދުނު ގޯސްތަކެއް ސަބަބުން އެ ފުރުސަތު ގެއްލުމުން ހިތްހަމަނުޖޭ ކަމަށެވެ.
ފާއިތުވީ ބައެއް މެޗުތަކަކީ ސިޓީ ބަލިވިޔަސް މާބޮޑު ޝަކުވާއެއް ކުރެވޭނެ ޖާގައެއް ނެތް މެޗުތައް ކަމަށްވީ ނަމަވެސް، ފޮރެސްޓާ ކުޅެ އެއްވަރުވި މެޗަކީ ސިޓީ މޮޅުވުން ހައްގު މެޗެއްކަމަށް ވެސް ގާޑިއޯލާ ބުންޏެވެ.
މި މެޗުން ތިން ޕޮއިންޓު ނުހޯދުމާއެކު ސިޓީއަށް، އާސެނަލްއާ ދެމެދު ފަރަގު ކުޑަކުރަން ލިބުނު ފުރުސަތު މިވަނީ ގެއްލިފައެވެ. އެހެންނަމަވެސް ސިޓީއަށް އޮތް ހިތްހަމަޖެހުމަކީ އެ ޓީމަށް ވުރެ އާސެނަލް އިތުރަށް އެއް މެޗު ކުޅެފައި ވުމެވެ.
ލީގު ތާވަލުގައި އާސެނަލް އެއްވަނައިގައި އޮތީ ކުޅުނު 30 މެޗުން 67 ޕޮއިންޓާއެކުއެވެ. އެ ޓީމަށް ބާކީ އޮތީ އަށް މެޗެވެ. ސިޓީން އެއް މެޗު މަދުން ކުޅެ ލިބެނީ 60 ޕޮއިންޓެވެ. އެހެންކަމުން ސިޓީއަށް އާސެނަލްއަށް ޓައިޓަލްއަށް ވާދައެއް ދިނުމަށްޓަކައި، ލީގުގައި މި މަހުގެ 15 ވަނަ ދުވަހު ވެސްޓްހަމް އާ ދެކޮޅަށް ކުޅެން އޮތް މެޗުން ތިން ޕޮއިންޓު ހޯދުން މުހިންމެވެ.