ބޮޑު ބަދަލަކާއެކު ބާއްވާ ޢީދު ބައިބަލާ ޗެލެންޖު މިފަހަރުވެސް ޕީއެސްއެމްއިން

ބައިބަލާ އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ބާއްވާ ޢީދު ބައިބަލާ މުބާރާތުގެ މި އަހަރުގެ އެޑިޝަން، ޢީދު ބައިބަލާ ޗެލެންޖް 1447 ގެ އޮފިޝަލް މީޑިއާ ޕާޓްނަރެއްގެ ގޮތުގައި ޕީއެސްއެމް ހަމަޖައްސައިފިއެވެ.

މިކަމާ ގުޅޭ އެއްބަސްވުމުގައި ސޮއިކުރުމަށް ޕީއެސްއެމް "ޓީވީ ބިލްޑިންގ" ގައި ބޭއްވި ޙަފްލާގައި ޕީއެސްއެމްގެ ފަރާތުން އެއްބަސްވުމުގައި ސޮއިކުރެއްވީ ޑިރެކްޓަރ އޮފް ސޭލްސް އެންޑް ކޯޕަރޭޓިވް އެފެއާޒް. މަރިޔަމް ހުނާއެވެ. ބައިބަލާ އެސޯސިއޭޝަންގެ ފަރާތުން އެއްބަސްވުމުގައި ސޮއިކުރެއްވީ އެ އެސޯސިއޭޝަންގެ ސެކެޓްރީ ޖެނެރަލް ސައީދު އަލީއެވެ.

މި ޙަފްލާގައި ބައިބަލާ އެސޯސިއޭޝަނުގެ އެކްސްކޯ މެމްބަރު އަދި ޔޫތު މިނިސްޓްރީގެ ޑެޕިއުޓީ މިނިސްޓަރު މުޙައްމަދު އަސީލް ވެސް ބައިވެރިވެވަޑައިގެންނެވިއެވެ،

އެއްބަސްވުމުގައި ސޮއިކުރެއްވުމަށްފަހު "ޕީއެސްއެމް ނިއުސް" އާ ވާހަކަދައްކަވަމުން ސައީދު ވަނީ، މި ފަހަރުގެ މުބާރާތުގައި ވަރަށް ޙާއްސަ ތަފާތެއް ފެނިގެންދާނެކަން ހާމަކުރައްވާފައެވެ.

"

މިފަހަރުގެ މުބާރާތް މުޅިން އަލަށް އަޅުގަނޑުމެން މި ބާއްވަނީ މާލޭގައި، ޑަބަލް އެލިމިނޭޝަން އުސޫލުން. އޭގެ މާނައަކީ، ކުރިން އޮންނަ ގޮތުން ވެއްޖެއްޔާ އެއް މެޗުން ބަލިވީމަ މުބާރާތުން ކަޓަނީ މި. އެ ފޯމެޓް ބަދަލުވެ، ކޮންމެ ޓީމެއް ވެސް މުބާރާތުގައި މަދުވެގެން ދެ މެޗު ކުޅޭނެ. އޭގެ މާނައަކީ ވިނާޒް ސައިޑަކާއި ލޫޒާސް ސައިޑެއް މުބާރާތުގައި އޮންނާނެ. އެހެންވީމަ މި އަހަރުގެ މުބާރާތް އެހެން އަހަރުތަކަށްވުރެ ދިގުދެމިގެންދާނެ މުބާރާތަކަށް ވާނެ.

ސައީދު އަލީ - ބައިބަލާ އެސޯސިއޭޝަނުގެ ސެކެޓްރީ ޖެނެރަލް

ސައީދު ވަނީ، މީޑިއާ ޕާޓްނަރެއްގެ ގޮތުގައި ޕީއެސްއެމް އިޚްތިޔާރުކުރި ސަބަބު ވެސް ވިދާޅުވެފައެވެ.

"

ބައިބަލާ އެސޯސިއޭޝަންގެ އެންމެބޮޑު އަމާޒަކަށް ވެފައި ވަނީ ބައިބަލާ އަކީ ރާއްޖޭގެ ކޮންމެ ސަރަހައްދެއްގައި ވެސް، ކޮންމެ ތަނެއްގައި ހުރެގެން ވެސް، ކޮންމެ އުމުރުފުރައެއްގެ ބޭފުޅަކަށް ވެސް އެއްވެސް އުނދަގުލެއް ނެތި ބަލާލެވޭނެ ކުޅިވަރަކަށް ވާން. އެހެންވީމަ އަޅުގަނޑުމެންނަށް އެންމެ ރަނގަޅު ޕްލެޓްފޯމަކަށް މި ފެންނަނީ ދައުލަތުގެ މީޑިއާ. ޔެސް ޓީވީން ހުރިހާ ބޭފުޅުންނަށް ވެސް އެއްވެސް ދަތިކަމެއް ނެތި މެޗުތައް ބަލާލެވޭނެ

ސައީދު އަލީ - ބައިބަލާ އެސޯސިއޭޝަނުގެ ސެކެޓްރީ ޖެނެރަލް

ބައިބަލާ އެސޯސިއޭޝަންގެ އީދު ބައިބަލާ ޗެލެންޖް 1447 ގެ މީޑިއާ ޕާޓްނަރެއްގެ ގޮތުގައި ޕީއެސްއެމް ހަމަޖައްސާފައިވާއިރު، މުބާރާތުގެ ހުރިހާ މެޗެއް، ޕީއެސްއެމްގެ "ޔެސް ޓީވީ" އިން ވަގުތުން ގެނެސްދޭނެއެވެ.

ރާއްޖޭގެ ތާރީޚުގައި ވެސް އެންމެ ހައިބަތު ބޮޑުކޮށް ބޭއްވި ބައިބަލާ ޗެލެންޖު މިދިޔަ އަހަރު ބާއްވާފައިވާއިރު އެ ފަހަރުގެ ޗެލެންޖުގެ ވެސް މީޑިއާ ޕާޓްނަރަކީ ޕީއެސްއެމް އެވެ.

އީދު ބައިބަލާ ޗެލެންޖް 1446 ގެ ނަމުގައި ކުރިއަށް ގެންދިޔަ އެ މުބާރާތުގެ ބައިބަލާ މައިޒާން ފެނިގެންދިޔައީ، މީގެކުރިން ދުވަހަކު ވެސް ފެނިގެންނުދާހާ ފުރިހަމަކޮށް، ކުލަގަދަކޮށެވެ.

ބައިބަލާ އަކީ ދިވެހި ޒުވާނުންގެ މެދުގައި މަގުބޫލު، ގިނަބަޔަކު އިންތިޒާރުކުރާ މުބާރާތެކެވެ.

މިފަހަރުގެ މުބާރާތް ފަށާނީ މާޗު 21 ވަނަ ދުވަހުއެވެ.