"ކުޅިވަރު ކުރިއެރުވުމަށް ކުރައްވާ މަސައްކަތާއެކު މޮޅެތި ކުޅުންތެރިން ދަނީ އުފެދެމުން"

އަދުގެ ސަރުކާރުން ކުޅިވަރަށް ކުރައްވާ ހޭދައާއިއެކު މޮޅެތި ކުޅުންތެރިންތަކެއް އުފެދެންފަށައިފިކަމަށް ކުރީގެ މަޝްހޫރު ނެޓްބޯޅަ ކުޅުންތެރިޔާ އަދި މިހާރު ކާމިޔާބެއް ކޯޗެއްގެ ގޮތުގައިވެސް ފެންނަމުންދާ ޢާއިޝަތު ނާޒިމާ ބުނެފިއެވެ.

ރާއްޖޭގެ ކުޅިވަރުގެ މުސްތަގުބަލާއި ގުޅޭގޮތުން ޕީއެސްއެމް ނިއުސްއާއި ވާހަކަދައްކަމުން ނާޒިމާވަނީ ސަރުކާރުން ކުޅިވަރުގެ ދާއިރާއަށް ގެންނަވަމުންދާ ހެޔޮ ބަދަލުތަކަށް ތައުރީފްކޮށް ވާހަކަދައްކާފައެވެ. ދިގު ރާސްތާ ޕްލޭނެއްގެ ދަށުން ސަރުކާރުން ކުޅިވަރުގެ ދާއިރާއަށް ގެންނަވަމުންދާ ހެޔޮ ބަދަލުތަކުގެ އަސަރު މިހާރުވެސް ފެންނަމުންދާކަމަށް ނާޒިމާ ފާހަގަކުރިއިރު، މިބަދަލުތަކުގެ ސަބަބުން ކުޅިވަރުގެ މުސްތަގުބަލު އުޖާލާވެގެންދާނެކަމަށް އޭނާ ފާހަގަކުރިއެވެ.

ކުޅިވަރު ދާއިރާގެ ތެރެއިން ކުޅުންތެރިންނާއި ގުޅުންހުރި ކަންކަމަށް ސަރުކާރުން ދެއްވަމުންދާ އަހަންމިއްޔަތުކަމުގެ ދަށުން ގައުމީ ޓީމުތަކުގެ ކުޅުންތެރިންނަށް އިންޝުއަރެންސް ސްކީމްއެއްގެ ދަށުން ބޭސްފަރުވާގެ ނިޒާމު ހަމަޖެހިގެން ދިއުމަކީ ކުޅުންތެރިންނާއި، ކުޅުންތެރިންގެ ބެލެނިވެރިންގެ ޒަމާންވީ ތަސައްލީއަކަށް އައި ފޮނި ނިމުމެއްކަމަށް އޭނާވަނީ ބުނެފައެވެ.

މީގެ ކުރިން ގައުމީ ޓީމެއްގެ ކުޅުންތެރިއަކަށް އަނިޔާވެއްޖެ ނަމަ އެޓީމަކުން އެކަމަށް ޚަރަދުކޮށްދިން ނަމަވެސް ސަރުކާރުގެ ބެލުމުގެ ދަށުން ވަކި ނިޒާމެއްގެ ދަށުން އެކަން ހަމަޖެހިފައިނުވާކަމަށް އޭނާ ފާހަގަކުރިއެވެ.

"މީގެ ކުރީގައިވެސް ގައުމީ ޓީމު ކުޅުންތެރިން އިންޖަރީވީމަ، ގައުމީ ޓީމުތަކުން އެބަހުރި އެ އިންޖަރީތަކަށް ޚަރަދުކޮށްދީފައި. އެކަމަކުވެސް މިހާރު އިންޝުއަރެންސްއެއް އިނުމަކީ ލިބޭ އިތުރު ސެކިއުރިޓީއެއް ކުދިންނަށް ލިބިގެންދާ. ބެލެނިވެރިންވެސް ލުކްފޯވާޑް ކުރަމުން ދިޔަކަމެއް" ނެޓްބޯޅައިގައި ގިނަ ކާމިޔާބީތަކެއް ހޯދާފައިވާ ކުޅުންތެރިޔާ ބުންޏެވެ.

ގައުމީ ޓީމުތަކުގެ ކުޅުންތެރިންނާއި އޮފިޝަލުންނަށް ހެލްތު އިންޝުއަރެންސްގެ ޚިދުމަތް ލިބެން ފެށުމުން ގައުމީ ޓީމުތަކުގެ ކުޅުންތެރިންނަށް އިތުރު ސެކިއުރިޓީއެއް ލިބިގެން ގޮސްފިކަމަށް ނާޒިމާ ގަބޫލުކުރެއެވެ.

ގައުމީ 18 ކުޅިވަރު އެސޯސިއޭޝަނެއްގެ 385 ކުޅުންތެރިންނާއި، އޮފިޝަލުންނަށް ހެލްތު އިންޝުއަރެންސްގެ ޚިދުމަތް ފޯރުކޮށްދެއްވަން ފައްޓަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރައްވާފައިވަނީ މިދިޔަ މަހުގެ 5 ވަނަ ދުވަހުއެވެ. މިކަމަކީ ރާއްޖޭގެ ކުޅިވަރު ޢާއިލާއިން ދެކެމުން ދިޔަ ދުވަސްވީ އުންމީދަކަށްވާއިރު، މިކަމަކީ ރައީސުލްޖުމްހޫރިއްޔާ ޑރ. މުހަންމަދު މުޢިއްޒުގެ ޚާއްސަ އިސްނެންގެވުމުގެ މަތިން ކުރިއަށް ދިޔަ ކުޅިވަރުގެ މުހިންމު މަސައްކަތެކެވެ.

ސަރުކާރުން ކުޅިވަރަށް ދެއްވަމުންދާ އަހަންމިއްޔަތުކަމުގެ ސަބަބުން ހެޔޮ ބަދަލުތަކެއް ކުޅިވަރު ދާއިރާއަށް އަންނަމުންދާކަށް ފާހަގަކުރަމުން ނާޒިމާ ބުނީ މިކަމުގެ ސަބަބުން އުޖާލާ މުސްތަގުބަލެއްގެ މަލަމަތި ފެންނަމުންދާކަމަށެވެ. މިކަންކަމުގެ ހެޔޮ އަސަރު ކުޅިވަރުތަކުންނާއި ކުޅުންތެރިންގެ ކިބައިން މިހާރުވެސް ފެންނަމުންދާކަމަށާއި މިއީ އުފާވެރި މަންޒަރެއްކަމަށް އޭނާވަނީ ސިފަކޮށްފައެވެ.

"ކުޅިވަރު ސްޓްރޯންގްވެގެން އަންނަތަން އަޅުގަނޑުމެންނަށް މިފެންނަނީ. ދުވަހެއް ދުވަހަކަށް ކޮންމެސް އެއްކަމެއް އައުވަމުން އަންނަތަން އެބަފެނޭ. އެހެންވީމަ ކުޅިވަރުގެ ފިއުޗަރ ވަރަށް ބްރައިޓޭ ބުނެވިދާނެ މިހާރު. އަޅުގަނޑުމެންނަށް، ކުޅިވަރުގެ ގިނަ މީހުންނަށް ގަބޫލުކުރެވެނީ ކުޅިވަރަށްޓަކައި ވަރަށް ބޮޑު ހޭދައެއް (ސަރުކާރުން) ކުރަމުންދާކަން އެބަ މިހާރު" ނާޒިމާ ބުނެފަވެއެވެ.

ސަރުކާރުން ކުޅިވަރު ދާއިރާއަށް ގެންނަމުންދާ ހެޔޮ ބަދަކުތަކާއިއެކު، ކުރެވުނު މަސައްކަތްތަކުގެ ދަށުން ކުޅިވަރުގައި މީގެ ކުރިން އޮތް މިންތީގެ ފަރަގު އުވާލާ، ކުޅިވަރުގެ ދާއިރާގައި މިންތީގެ ހަމަހަމަކަން ގާއިމުކޮށްދެއްވުން ނާޒިމާ ފާހަގަކުރިއެވެ. އެގޮތުން ފިރިހެން އެތުލީޓުންނެކޭ އެއްހަމައަކުން އަންހެން އެތުލީޓުންނާއި އޮފިޝަލުންގެ މުސާރަވެސް އެއް ހަމަކޮށްދެއްވުމުގެ ނަތީޖާއަކަަށްވީ ފެންވަރު ރަނގަޅު އަންހެން ކުޅުންތެރިންތަކެއް އުފެދިގެން ދިއުންކަމަށް ނާޒިމާ ބުނެފަވެއެވެ.

"މިދިޔަ އަހަރު އޮތީ އިއުލާންކުރެވިފައި މުސާރައަށް ބަދަލުތަކެއް އަންނާނެ ވާހަކަ. އެހެންވީމަ އެދުވަސްވެސް މިއޮތީ ފެނިފަ. ކުރިންވެސް އަޅުގަނޑު ފާހަގަކޮށްލި ފަދައިން ކުޅިވަރަށް ވަރަށް ރަނގަޅު ފިއުޗަރއެއް އެބަ ބިލްޑްއަޕް ވޭ. މިއީ އަޅުގަނޑަށް ހީވަނީ މިކަހަލަ ކަންތައްތައް ރަނގަޅުވަމުން ދިޔަ ވަރަކަށް، ރަނގަޅު ކުޅުންތެރިންތަކެއް ބިނާވެގެން ގޮސް ކުޅިވަރަށް އަހަންމިއްޔަތުކަން ލިބެމުން ދާނެ ކަންނޭނގެ. އަދި ބެލެނިވެރިންގެ ވެސް ލޯތައް މިކަމަށް ހުޅުވިގެންދާނެ" ކުޅިވަރު ދާއިރާއަށްވެސް ގިނަ ޚިދުމަތްތަކެއް ކޮށްދެމުންދާ ނާޒިމާ ބުންޏެވެ.


މޮޅެތި ކުޅުންތެރިން ވަކި ހިސާބާކުން ގެއްލޭ މައްސަލައަކީ ރާއްޖޭގައި ވަރަށް ގިނައިން ފެންނަމުންދާ ހިތާމަވެރި މަންޒަރެއްކަމަށް ނާޒިމާ ބުންޏެވެ. އެކަން އެގޮތަށް ދިމާވަނީ އަނިޔާގެ މައްސަލަތަކަށް އެކަށީގެންފާ ފަރުވާ ނުލިބުމާއި، ކުޅުންތެރިންނަށް އެލަވަންސެއް ހަމަޖެހިފައި ނެތުމުގެ ސަބަބުންކަމަށް ނާޒިމާ ފާހަގަކުރިއެވެ. އެހެންކަމުން އަދުގެ ސަރުކާރުން ގައުމީ ޓީމުތަކުގެ ކުޅުންތެރިންނަށް އެލަވަންސެއްގެ ގޮތުގައި ކޮންމެ މަހަކު ހަތްހާސް ރުފިޔާ ހަމަޖައްސަވައިދެއްވުމަކީ ކުޅުންތެރިން އެކަމުގައި ހިފެހެއްޓުމަށް އެޅުނު މުހިންމު ފިޔަވަޅެއްކަމަށް ނާޒިމާ ބުންޏެވެ.

"އަޅުގަނޑުމެންނަށް ވަކި ހިސާބަކުން އެބަ ފެނޭ ކުޅުންތެރިން ގެއްލޭތަން. އޭގެ ބަދަލުގައި މިކަހަލަ ކަންތައްތައް ކުރެވެމުންދާނަމަ، ރަނގަޅަށް ކުރެވޭނަމަ ހީވަނީ އެކުޅުންތެރިންތައް ކުޅިވަރުގެ ތެރޭގައި ހިފެހެއްޓެމުންވެސްދާނެހެން" ނެޓްބޯޅަ ކުރިއެރުވުމަށް ފިއޯންޓީގެ ނަމުގައި އެކަޑަމީއެއްވެސް ހިންގަމުން އަންނަ ނާޒިމާ ބުންޏެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވައުދުފުޅާ އެއްގޮތަށް ގައުމީ ޓީމުގެ ކުޅުންތެރިންނާ އޮފިޝަލުންގެ އިނާޔަތްތައް އެއްހަމަކޮށް، ގައުމީ ޓީމުތަކުގެ ކުޅުންތެރިންނާއި އޮފިޝަލުންނާއި ޕެރަ އެތުލީޓުންނަށް ދެމުން ގެންދާ އެލަވަންސް ފަސްހާސް ރުފިޔާއިން ހަތްހާސް ރުފިޔާއަށް ބޮޑުކޮށްދެއްވާފައިވަނީ މިދިޔަ އަހަރުގެ މެއި މަހުން ފެށިގެންނެވެ.

ރާއްޖޭގެ ކުޅިވަރު އެހެން ހަރުފަތަކަށް ގެންދިއުމަށާއި ދާއިރާގެ ކުރިމަގަށް ސަރުކާރުން ގެންދަވަނީ ކުހިންމު ފިޔަވަޅުތަކެއް އަޅުއްވަމުންނެވެ. އެގޮތުން ކުޅުންތެރިންގެ ފެންވަރު މަތިކުރުމަށް ތަމްރީނާއި ތަޖްރިބާގެ ފުރުސަތުތައް ހޯދައިދިނުމާއި، ކުޅިވަރުގެ ޢުމްރާނީ ތަރައްގީގެ އިތުރުން ފަންނީ މީހުން ބިނާކުރުމަށް ސަރުކާރުން ވަރަށް ޚާއްސަ އިސްކަމެއް ދެއްވައެވެ.