35 މިސްކިތެއްގައި ދަމު ނަމާދު؛ އިޢުތިކާފަށް 25 މިސްކިތެއް

ރަމަޟާންމަހުގެ ފަހު ދިހައެއްގައި މާލޭ ސަރަހައްދުގެ 35 މިސްކިތެއްގައި ދަމު ނަމާދު ކުރާނެކަމަށާއި އަދި 25 މިސްކިތެއްގައި އިޢުތިކާފަށް ތިބެވޭނެ އިންތިޒާމް ހަމަޖައްސާފައިވާކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއްޖެއެވެ.

ކޮންމެ އަހަރެއްގެވެސް ރަމަޟާންމަހުގެ ފަހު 10 އެއްގައި ދަމުނަމާދާއި އިއުތިކާފަށް ތިބޭ މިސްކިތްތައް ކަނޑައަޅާ އެ އިންތިޒާމް އިސްލާމީ ކަންތައްތަކާބެހޭ ވުޒާރާއިން ހަމަޖައްސަވައެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ ރަމަޟާން މަހުގެ ފަހު 10ގައި މާލެ ސަރަޙައްދުގެ 35 މިސްކިތެއްގައި ދަމުނަމާދު ކުރާނެކަމަށެވެ. އޭގެ ތެރޭގައި ހިމެނެނީ މާލޭގައި ހުރި މިސްކިތްތަކުގެ ތެރެއިން 21 މިސްކިތަކާއި ވިލިމާލޭގެ 3 މިސްކިތެކެވެ. އަދި ހުޅުމާލެ ފުރަތަމަ ފިޔަވަހީގެ 6 މިސްކިތުގައާއި ދެވަނަ ފިޔަވަހީގެ 5 މިސްކިތެއްގައިވެސް ދަމުނަމާދު ކުރާގޮތަށް ވަނީ ހަމަޖައްސާފައެވެ.

މީގެ އިތުރުން މާލޭގެ 16 މިސްކިތެއްގައި އިއުތިކާފަށް ތިބޭނެ އިންތިޒާމް ހަމަޖައްސާފައިވެއެވެ. އަދި ވިލިމާލޭގެ މަސްޖިދުލްބިއްރީގައާއި ހުޅުމާލެ ފުރަތަމަ ފިޔަވަހީގެ 5 މިސްކިތެއްގައާއި ދެވަނަ ފިޔަވަހީގެ 3 މިސްކިތެއްގައިވެސް އިއުތިކާފަށް ތިބެވޭނެއެވެ.

ކޮންމެ ރަމަޟާން މަހެއްގެ ފަހު 10 އެއްގައި މާލޭގެ އިތުރަށް ރާއްޖޭގެ އެކި ރަށްރަށުގައި ދަމުނަމާދުކޮށް އުޅެއެވެ. އާންމުގޮތެއްގައި މިސްކިތްތަކުގައި ދަމުނަމާދުކުރަން ފަށަނީ މެންދަމު ދެގަޑި ސުންމިނެޓުން ފެށިގެންނެވެ.

ދަމުނަމާދަކީ، އިޝާނަމާދަށްފަހު ކިތަންމެ ކުޑަ ހިނދުކޮޅަކުނަމަވެސް ނިދާލުމަށްފަހު ތެދުވެ، ފަތިސްވަގުތުގެ ކުރިން ދެރަކުޢަތުން، ދެރަކުޢަތުން ސަލާމްދެމުން ކުރާ ނަމާދެކެވެ. މިއީ ގަދަވެގެންވާ ސުންނަތް ނަމާދެކެވެ. މި ނަމާދަކީ ހަމައެކަނި ރަމަޟާންމަހު ނުވަތަ ރަމަޟާން މަހުގެ ފަހުދިހައިގައި ކުރާ ނަމާދެއް ނޫނެވެ. އެހެންނަމަވެސް ރަމަޟާން މަހަކީ މަތިވެރި މައްސަރަކަށްވެފައި، ރަމަޟާން މަހުގެ އަޅުކަމުގެ ސަވާބާއި ދަރުމަ އިތުރުކަމާއެކު ރަމަޟާންމަހު ދަމުނަމާދުކުރުމަށް މުސްލިމުން ދޭ ސަމާލުކަން އިތުރުކުރެއެވެ.