ސިފައިން ކަޓައި، ނިއުއަށް ފުރުސަތު ހަނިވެއްޖެ

އެފްއޭއެމް ވެޓެރެންސް ކަޕް 2026 ގައި ދެވެހި ސިފައިންގެ ކުލަބް ކަޓައި، ނިރޭޑިއަންޓް ސްޕޯޓްސް ކުލަބުން މުބާރާތު ސެމީއަށް ދިއުމުގެ ފުރުސަތު ހަނިވެއްޖެއެވެ. ގުރޫޕް އޭގައި މި ދެޓީމު ކުޅުނު މެޗު ނިމުނީ 2-2 ލަނޑުން އެއްވަރުވެގެންނެވެ.

މާފަންނު އެއްނަންބަރު ޓާފް ދަނޑުގައި ކުޅުނު މެޗު ފަށައިގެން ދެޓީމުން ހަމަހަމަ ކުޅުމެއް ދެއްކިއިރު އެޓޭކްގައި ލަނޑުޖަހަން ދެޓީމަށް ވަނީ ގިނަ ފުރުސަތުތަކެއް ލިބިފައެވެ. އެގޮތުން މެޗުގެ ފުރުތަމަ ފުރުސަތެއް ލިބިގެން ދިއައީ ނިއުގެ އިއްޒަތު އަބްދުލް ބާރީއަށެވެ. އޭގެފަހުން ސިފައިންގެ ޓީމުގެ އަހުމަދު ރަޝީދު ވަނީ ރަނގަޅު ފުރުސަތެއް ހޯދާފައެވެ.

ނިއުގެ ފުރަތަމަ ލަނޑު ކާމިޔާބުކުރީ މެޗުގެ 15 ވަނަ މިނިޓު މުހުތާރު ނަސީރުއެވެ. މެޗުގެ 18 ވަނަ މިނިޓުގައި ނިއުގެ ދެވަނަ ލަނޑު ކާމިޔާބުކޮއްދިނީ މުހައްމުދު ވާސިފް އޭރިއާތެރެއިން ފަހަތައް ޖައްސާލި ބޯޅައެއް އޭރިއާތެރެއިން އިއްޒަތަށް ލިބުމުން އޭނަ ކާމިޔާބު ކުރި ލަނޑެކެވެ.

ސިފައިންގެ ޓީމުން އެޓީމުގެ ފުރަތަމަ ލަނޑުޖެހީ މެޗު 29 ވަނަ މިނިޓުގައި އިސްމާއިލް މުހައްމަދު އޭރިއާ ބޭރުން ފޮނުވާލި ބޯޅައެއް ގޯލުގެ ކަނަށް ވައްދާލައިގެންނެވެ.

މެޗުގެ ދެވަނަހާފް ފަށައިގެން ސިފައިންގެ ޓީމުން ރަނގަޅަށް ކުޅެ ގިނަ ހަމަލާތަކެއް އުފެއްދިއިރު ލިބުނު މަދު ފުރުސަތުތަކުން ނިއުވެސް ވަނީ ގޯލަށް ނުރައްކާ ކޮއްފައެވެ. ދެވަނަ ހާފުގައި ނިއުގެ ނިއުގެ އަހުމަދު މުހައްމަދަށް އޭރިއާ ތެރެއިން ސިފައިންގެ ޓީމުގެ ވާސިފް ކުރި ފައުލަކަށް ލިބުނު ޕެނެލްޓީ އަހުމަދު މުހައްމަދު ޖެހީ ބޭރަށެވެ.

ސިފައިންގެ ޓީމުން ނަތީޖާ ހަމަހަމަ ކުރީ 50 ވަނަ މިނިޓުގައ އަހުމަދު ރަޝީދު ކާމިޔާބުކުރި ލަނޑުންނެވެ.

މި ނަތީޖާ އެކު ގުރޫޕުގައި ސިފައިންނަށް ހުރިހާ މެޗެއް ހަމަވިއިރު އެޓީމަށް ހޯދުނީ 04 ޕޮއިންޓެވެ. ނިއުވެސް ތިން ވަނައިގަ އޮތީ ހަތަރު ޕޮއިންޓް ހޯދައިގެންނެވެ. މުއިވެޔޮ ދެވަނައިގަ އޮތީ 6 ޕޮއިންޓާއެކުއެވެ.

އެއްވަނައިގަ ވިލިމާލެ ޔުނައިޓެޑް އޮތީ 9 ޕޮއިންޓާއެކުއެވެ. ގުރޫޕުގައި ފަހުމެޗުގައި ނިއު ނުކުންނާނީ މުއިވެޔޮއާ ދެކޮޅަށެވެ. މިމެޗު މުއިވެޔޮ ޓީމަށް އެއްވަރުކޮއްލައިގެން ސެމީއަށް ދިއުމުގެ ފުރުސަތު އޮތްއިރު ނިއުއަށް އޮތީ މެޗުން މޮޅުވުމެވެ.