މޮރޮކޯގެ ކޯޗުކަން އެ ގައުމުގެ 23 އަހަރުން ދަށުގެ ޓީމުގެ ކޯޗު މުހައްމަދު ވާބީ އަށް އަދި ޓެކްނިކަލް ޑައިރެކްޓަކަށް ސްޕޭނުގެ ކުރީގެ މިޑްފީލްޑަރު އަންދްރޭސް އިނިއެސްޓާ ހަމަޖައްސައިފި އެވެ.
ކޯޗުކަމަށް އައު ކޯޗަކު ހަމަޖެއްސީ އެ މަގާމުގައި މިހާތަނަށް ހުރި ވަލީދު ރެގްރާގީ މަގާމުން ވަކި ކުރުމަށް ފަހު އެވެ. އެންމެ ފަހުގެ ވޯލްޑް ކަޕުގެ ސެމީ ފައިނަލަށް ޓީމު ގެންގޮސްދިން ވަލީދު ބަދަލު ކުރަން މޮރޮކޯގެ ފުޓްބޯޅަ ފެޑަރޭޝަނުން ވިސްނަން ފެށީ ޑިސެމްބަރު މަހު އެ ގައުމުގައި ބޭއްވި އެފްރިކާ ކަޕް ފުޓްބޯޅަ މުބާރާތުގެ ތަށި ހޯދައި ނުދެވެމުންނެވެ. ފައިނަލުގައި މޮރޮކޯ ބަލިވީ ސެނެގާލް އަތުންނެވެ.
ވާބީ އަކީ މޮރޮކޯގެ 23 އަހަރުން ދަށުގެ ޓީމާ ހަވާޅުވުމުގެ ކުރިން 20 އަހަރުން ދަށުގެ ވޯލްޑް ކަޕް ކާމިޔާބު ކުރި ކޯޗެވެ.
މޮރޮކޯ ފުޓްބޯޅަ ފެޑަރޭޝަނުން ބުނީ އޭނާ އަށް ކޯޗުކަން ދިނީ އުއްމީދީ ނަތީޖާތަކެއް ނެރެފައިވުމާއި އައު ޕްރޮޖެކްޓް ހިންގަން އެންމެ ރަނގަޅު މީހަކީ އޭނާ ކަމަށް ވުމުން ކަމަށެވެ. އަދި އޭނާގެ އެހީތެރިންގެ ގޮތުގައި ތިބޭނީ މިހާތަނަށް ރަނގަޅު މަސައްކަތްތަކެއް ކޮށްފައިވާ ތަކުރިބާކާރުން ކަމަށެވެ.
މޮރޮކޯއިން މިހާރު ވަނީ އެ ގައުުގެ ފުޓްބޯޅަ އެސޯސިއޭޝަނުގެ ޓެކްނިކަލް ޑައިރެކްޓަރުކަން ސްޕޭނާއި ބާސެލޯނާގެ ކުރީގެ މިޑްފީލްޑަރު އަންދްރޭސް އިނިއެސްޓާ އަށް ދީފަ އެވެ. އިނިއެސްޓާ އާއި މޮރޮކޯ ފުޓްބޯޅަ ފެޑަރޭޝަނުން މަޝްވަރާ ކުރަމުން އަންނަތާ ދުވަސްކޮޅެއް ވެއްޖެ އެވެ.
އިނިއެސްޓާ އަކީ ބާސެލޯގެ ކެޕްޓަންކަން ކޮށް، 2010 ވަނަ އަހަރުގެ ވޯލްޑް ކަޕް ކާމިޔާބު ކުރި ސްޕޭން ޓީމުގެ އެންމެ މުހިންމު އެއް ކުޅުންތެރިޔާ އެވެ. މިއީ ކުޅުންތެރިއެއްގެ ގޮތުގައި މިހާތަނަށް ހުރި އިނިއެސްޓާ ފުޓްބޯޅައިގެ އެ ނޫން މަގާމެއް އަދާ ކުރާ ފުރަތަމަ ފަހަރެވެ.
އިނިއެސްޓާ އާއި އައު ކޯޗަށް މިހާރު އޮތް އެންމެ މުހިންމު ކަމަކީ ޖޫން މަހު އެމެރިކާގައި ބާއްވާ ވޯލްޑް ކަޕް ފުޓްބޯޅަ މުބާރާތަށް މޮރޮކޯ ޓީމު ތައްޔާރު ކުރުމުގެ މަސައްކަތެކެވެ.