އެމެރިކާގެ ރައީސް ޑޮނާލްޑް ޓްރަމްޕާއި ދުނިޔޭގައި އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާ، ލިއޮނެލް މެސީ، އެމެރިކާގެ ވައިޓް ހައުސްގައި ބައްދަލުކޮށްފިއެވެ.
މި ބައްދަލުވުމުގައި މެސީއާއެކު އޭނާ ކުޅެމުން އަންނަ އިންޓަރ މަޔާމީގެ ކުޅުންތެރިންނާއި އޮފިޝަލުން ވެސް ބައިވެރިވިއެވެ. މި ބައްދަލުވުމަކީ، މޭޖާ ލީގު ސޮކާ (އެމްއެލްއެސް) ކަޕުގައި މެސީއާއި އިންޓަރ މަޔާމީން ހޯދި ކާމިޔާބީ ފާހަގަކުރުމުގެ ގޮތުން ވައިޓް ހައުސްގައި ބޭއްވި ބައްދަލުވުމެކެވެ.
އިންޓަރ މަޔާމީން މިދިޔަ އަހަރުގެ ޑިސެމްބަރު މަހު އެ މުބާރާތް ކާމިޔުާބުކުރިއިރު މިއީ އެ ޓީމަށް މި މުބާރާތުގެ ތަށި އުފުލާލެވުނު ފުރަތަމަ ފަހަރެވެ.
އެމެރިކާއާއި ޔަހޫދީ ނިރުބަވެރި ދައުލަތް، އިސްރާޢީލުން ގުޅިގެން އީރާނަށް ދެމުން ގެންދާ ހަމަލާތަކާ ގުޅޭ މައުލޫމާތު ހިއްސާކުރެއްވުމަށްފަހު ބޭއްވެވި މި ބައްދަލުކުރެއްވުމުގައި ވާހަކަދައްކަވަމުން ޓްރަމްޕް ވިދާޅުވީ، އޭނާގެ ދަރިކަލުން، ބެރޮން އަކީ މެސީގެ ވަރަށް ބޮޑު "ފޭން" އެއް ކަމަށެވެ.
އަދި ދުނިޔޭގެ އެންމެ މޮޅު އެއް ފުޓުބޯޅަ ކުޅުންތެރިޔާގެ ގޮތުގައި ނިސްބަތްކުރެވޭ ކުޅުންތެރިއަކު، ދުނިޔޭގެ އެންމެ މަތީ ފަންތީގައި އެތައް އަހަރެއް ކުޅުމަށްފަހު، ބޭނުން ކޮންމެ ގައުމެއްގައި ކުޅުމުގެ ފުރުސަތު އޮއްވައި އެމެރިކާގައި ކެރިއަރުގެ ފަހު ދުވަސްތައް ހޭދަކުރަން ނިންމުން އެއީ ނުހަނު އުފާވެވަޑައިގަންނަވާ ކަމަެއް ކަމަށް އަދި އެކަމަށް ޝުކުރުއަދާކުރައްވާކަމަށް ޓްރަމްޕް ވިދާޅުވިއެވެ.
އުމުރުން 38 އަހަރުގެ މެސީ ވަނީ އިންޓަރ މަޔާމީއާއެކު މިފަހުން އެއްބަސްވުން އައުކޮށްފައެވެ. މި އެއްބަސްވުމުގެ ދަށުން އޭނާ 2028 ވަނަ އަހަރުގެ ނިޔަލަށް އެ ކުލަބުގައި މަޑުކުރާނެއެވެ.