އާއިލާ އާއި ގާތް ތިމާގެ މީހުންގެ ހާލު ވެސް ނޭނގޭތީވެ ކުޅުންތެރިން ތިބީ ވަރަށް ބޮޑަށް ކަންބޮޑުވެފައި ކަމަށް އިރާނުގެ އަންހެން ޓީމުން ބުނެފި އެވެ.
އޭޝިއަން ކަޕުގައި ކުޅެން އިރާނުގެ އަންހެން ޓީމު މިވަގުތު ތިބީ އޮސްޓްރޭލިޔާގަ އެވެ. އިޒްރޭލާއި އެމެރިކާއިން އިރާނަށް ހަމަލާތައް ދޭން ފެށީ މި ޓީމު އޮސްޓްރޭލިޔާ އަށް ދިޔަ ފަހުންނެވެ. މިއަށްފަހު އިރާނުން އިންޓަނެޓްގެ ހިދުމަތް މެދުކަނޑލާފައިވުމާއެކު ކުޅުންތެރިންނާއި އޮފިޝަލުންނަށް ވަނީ ގައުމުގައި ތިބި އެއްވެސް މީހަކާ ގުޅޭގޮތް ނުވެފަ އެވެ.
"މިކަމާ އަހަރުމެން އެންމެން މި ތިބީ ކަންބޮޑުވެފައި. އަހަރުމެން އެންމެން މި ތިބީ އާއިލާތަކާއި އަހަރުމެންގެ ގާތް މީހުންނާއި ލޯބިވެރިން ވީތަނެއް ވެސް އެ މީހުންގެ އެއްވެސް މައުލޫމާތެއް ނުލިބޭތީވެ ވަރަށް ކަންތައް ބޮޑުވެފައި. އެކަމަކު ވެސް ކުޅުންތެރިން މަސައްކަތް އެ ކުރަނީ ވީ އެންމެ ރަނގަޅަށް މެޗަށް ސަމާލުކަން ދެވޭތޯ،" ކޯޗު މަރިޒިޔާ ޖަފަރީ ބުންޏެވެ.
މުބާރާތުގައި ކުޅުނު ފުރަތަމަ މެޗުގައި ދެކުނު ކޮރެޔާ އަތުން 3-0އިން ބަލިވި އިރާން ޓީމު މިހާރު ތައްޔާރު ވަމުންދަނީ މުބާރާތް ބާއްވާ ގައުމު އޮސްޓްރޭލިޔާއާ ދެކޮޅަށް ކުޅުމަވެ.
އިރާނުގެ 21 އަހަރުގެ ފޯވަޑް ސާރާ ދީދާރު ބުނީ އެ މީހުން އޮސްޓްރޭލިޔާ އަށް އައީ ފުޓްބޯޅަ ކުޅެން ކަމަށާއި ނަމަވެސް މިވަގުތު މުޅި ޓީމަށް ވެރިވެފައިވަނީ ކަންބޮޑުވުން ކަމަށެވެ.
"އެކަމަކު ވެސް އަހަރުމެންގެ ޒިންމާ އަހަރުމެން އަދާ ކުރަން މިދަނީ މަސައްކަތް ކުރަމުން. އަހަރުމެންނަށް ގައުމުގައި ތިބި އެއްވެސް މީހަކާ ނުގުޅޭ. އެ މީހުން ވީތަނެއް ވެސް ތިބި ހިސާބެއް ވެސް ނޭނގެ. އެންމެން ވެސް މިތިބީ ހިތްދަތިވެފައި،" މެޗުގެ ކުރިން ބޭއްވި ޕްރެސް ކޮންފަރެންސްގައި ރޮމުން ރޮމުން ސާރާ ބުންޏެވެ.
އިރާން ޓީމުން އޭޝިޔާގެ ފުޓްބޯޅަ ފެޑަރޭޝަނާއި އޮސްޓްރޭލިޔާގެ ފުޓްބޯޅަ ފެޑަރޭޝަނުން އެ މީހުންނާމެދު ކަންތައްތައް ކުރަނީ ވަރަށް ރަނގަޅަށް ކަމަށާއި އެކަމަށްޓަކައި ޝުކުރު އަދާ ކުރާ ކަމަށެވެ. އަދި އޮސްޓްރޭލިޔާގައި ތިބި އިރާނު މީހުންނާއި އެ ގައުމާ ގުޅިފައި ތިބި ފަރާތްތަކުން ދަނޑަށް އައިސް ތަރުހީބު ދޭތީވެ ޝުކުރު އަދާ ކުރާ ކަމަށެވެ.