އެމެރިކާއާއި އީރާން ހަނގުރާމަ ކުރަމުންދާ މި ދަނޑިވަޅުގައި އެމެރިކާއަށް މުހިންމު މިސައިލްތަކެއްގެ ސްޓޮކް މަދުވެއްޖެއެވެ.
އެމެރިކާގެ އިސް އޮފިޝަލަކަށް ހަވާލާދީ ޝާއިރުކޮށްފައިވާ ރިޕޯޓެއްގައި ބުނީ އެމެރިކާއިން ބޭނުންކުރާ ޓޮމަކޯކް މިސައިލްއާއި، މިސައިލް ޙަމަލާތައް ހުއްޓުވުމަށް ބޭނުންކުރާ އެސްއެމް-3 އިންޓަސެޕްޓަރ އެމެރިކާގެ އަތުގައި ހުރި މިންވަރު މިހާރު މަދުވެފައިވާ ކަމަށެވެ. އެމެރިކާއިން ބޭނުންކުރާ ޕެޓްރިއޮޓް މިސައިލް ވެސް މިހާރު ވަނީ މަދުވެފައެވެ. އޭގެ މައިގަނޑު ސަބަބަކީ ފާއިތުވި ހަތަރު އަހަރެއްހާ ދުވަހު ޔޫކްރެއިންއާއި ރަޝިޔާއާ ދެމެދު ކުރަމުންދާ ހަނގުރާމައިގައި އެ މިސައިލްގެ ސްޓޮކުގެ ގިނަ ޢަދަދެއް ބޭނުންކޮށްފައިވުމެވެ. މި ޙާލަތުގައި ދެކުނު ކޮރެޔާއިން ވަނީ އެ ޤައުމުގެ އަސްކަރީ މަރުކަޒުތަކުގައި ހުރި އެމެރިކާގެ ޕެޓްރިއޮޓް މިސައިލް ދިފާޢީ ނިޒާމުތައް މެދުއިރުމައްޗަށް ބަދަލުކުރުމާ ގުޅޭގޮތުން އެމެރިކާއާއެކު މަޝްވަރާ ކޮށްފައެވެ.
އެ އޮފިޝަލް ވިދާޅުވީ ފެބްރުއަރީ 28ވަނަ ދުވަހުން ފެށިގެން ޔަހޫދީންނާއި އެމެރިކާއިން އީރާނަށް ދެމުންދާ ޙަމަލާތަކުގެ ސަބަބުން އީރާނުގެ ދިފާޢު ބަލިކަށިވެފައިވާ ކަމަށެވެ. އަދި ކުރިއަށް އޮތް 24 ގަޑިއިރުގެ ތެރޭގައި ޙަމަލާތައް ބޮޑުތަނުން ވަރުގަދަ ކުރާނެ ކަމަށް ބެލެވޭ ކަމަށެވެ. ކުރިއަށް ރޭވިފައިވާ ޙަމަލާތައް އަމާޒު ކުރާނީ އީރާނުގެ މިސައިލް އުފެއްދުމުގެ ޤާބިލުކަން ނައްތާލައި، ޔޫއޭވީއާއި ކަނޑުމަތީ އަސްކަރީ ޤާބިލުކަން ކުޑަކުރުމަށް ކަމަށް އޭނާ ވަނީ ވިދާޅުވެފައެވެ.
އީރާނަށް ދެމުންދާ ޙަމަލާތަކުގެ ރައްދުގައި އީރާނުން ވެސް ދަނީ ހުއްޓުމެއްނެތި ޔަހޫދީންގެ ނިރުބަވެރި ދަޢުލަތުގެ އިތުރުން މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ތިބޭ މަރުކަޒުތަކަށް ޢަމާޒުކޮށް ވަރުގަދަ ޙަމަލާތައް ދެމުންނެވެ. އީރާނުން ކޮންމެ ދުވަހަކު ވެސް އެތައް ސަތޭކަ ޑްރޯންއާއި މިސައިލް ޙަމަލާތައް ދެއެވެ. މި ޙަމަލާތައް ދިނުމަށް އީރާނުން ބޭނުންކުރާ ޑްރޯންއާއި މިސައިލްއަކީ އޭގެ ބޮޑު ސްޓޮކެއް އީރާން އަތުގައި ހުރި، އަދި އުފެއްދުމަށް ޚަރަދު ކުޑަ ހަތިޔާރުތަކެކެވެ. ނަމަވެސް އެ މިސައިލްތަކާއި ޑްރޯންތައް ހުއްޓުވުމަށް އެމެރިކާއާއި ޔަހޫދީން ބޭނުންކުރާ އިންޓަސެޕްޓަރުތަކަކީ އަގުބޮޑު، އަދި ބޮޑެތި ސްޓޮކްތައް ނުހުންނަ ތަކެއްޗެވެ.
ބެލެވޭ ގޮތުގައި އީރާނުން ބޭނުންވަނީ ދުޝްމަނުންނަށް ހަނގުރާމައިގެ ޚަރަދު ބޮޑުކޮށް، ހަނގުރާމައިގައި މަރުވާ އެމީހުންގެ މީހުންގެ އިތުރު ކުރުމަށެވެ. ތެޔޮ ރިފައިނަރީތަކަށާއި ގޭސް އުފައްދާ މަރުކަޒުތަކަށް އީރާނުން ޙަމަލާ ދެމުންދާއިރު، އެ ފަދަ ޙަމަލާތަކުގެ ސަބަބުން ބައިނަލްއަޤްވާމީ ބާޒާރުގައި ތެލާއި ގޭހުގެ އަގު އުފުލި، ޔަހޫދީންނާއި އެމެރިކާއަށް އޮންނަ ޕްރެޝަރު އިތުރުކުރުމަކީ އީރާނުގެ ވިސްނުން ކަމަށް ބެލެވެއެވެ. އެހެންކަމުން އެމެރިކާއިން ބަލާނީ އީރާނުގެ މިސައިލް އުފެއްދުމުގެ ޤާބިލުކަން ކުޑަކުރުމަށް ކަމަށް ޤަބޫލުކުރެވެއެވެ.
މަސްރަހު ދިރާސާކުރާ މާހިރުން ދެކޭ ގޮތުގައި ކުރިއަށް އޮތް ދުވަސްތަކުގައި އެމެރިކާއާއި އެ ޤައުމަށް ވާގިވެރިވާ ޤައުމުތަކުގެ އަތުން މިސައިލް އިންޓަސެޕްޓަރު ހުސްވުން، ނުވަތަ އީރާނުގެ އަތުގައި ހުރި މިސައިލް ހުސްވުން، މި ދެ ގޮތުން ކުރެ އެއް ގޮތަކަށް ކަންތައް ހިންގާނެއެވެ. އެއާއެކު ހަނގުރާމައިގެ މައިދާނުގައި ދެ ފަރާތަށް ވެސް މުހިންމު ނިންމުންތައް ނިންމުމަށް މަޖުބޫރުވެގެންދާނެއެވެ. އެ ފަދަ ޙާލަތެއްގައި މީހުން މަރުވާ ޢަދަދު އިތުރުވުން އެކަށީގެންވާ ކަމަށް ތަޖުރިބާކާރުން ވިދާޅުވެއެވެ.