ފުލުހުންގެ "ވޯކް އެންޑް ޓޯކް" ހަރަކާތް މުޅިރާއްޖޭގައި!
-
މި ހަރަކާތުގައި ދާޚިލީ ވަޒީރު ޢަލީ އިޙްސާން ބައިވެރިވެވަޑައިގަތް
-
މިއީ ރައްޔިތުންނާ ގާތުން ބައްދަލުކޮށް މަޝްވަރާކުރުމަށް ހިންގި ހަރަކާތެއް
-
މިދިޔަމަހުގެ 28 ވަނީ މި ހަރަކާތް މާލޭ ސަރަޙައްދުގައިވެސް ކުރިއަށްގެންގޮސްފައި
ރާއްޖޭގެ އެކި ކަންކޮޅުތަކުގައި އެއް ވަގުތެއްގައި ފުލުހުންގެ "ވޯކް އެންޑް ޓޯކް" ހަރަކާތް ކުރިއަށްގެންގޮސްފިއެވެ.
ދިވެހި ފުލުހުންގެ ޚިދުމަތުން ވިދާޅުވީ، ރައްޔިތުންނާ ގާތުން ބައްދަލުކޮށް މަޝްވަރާކުރުމަށް ހިންގި މި "ވޯކް އެންޑް ޓޯކް" ހަރަކާތް ވަރަށް ކާމިޔާބުކަމާއެކު ކުރިއަށް ގެންދެވިފައި ވާކަމަށެވެ. މި ހަރަކާތުގެ ތެރެއިން ގިނަ އަދަދެއްގެ ރައްޔިތުންނާ ބައްދަލުކޮށް، އެފަރާތްތަކުގެ ޚިޔާލާއި މަޝްވަރާ ހޯދާފައިވާކަމަށް ފުލުހުން ވިދާޅުވިއެވެ.
މާލޭ ސަރަޙައްދުގައި މި ހަރަކާތް ކުރިއަށްދިޔަ ވަގުތު މި ހަރަކާތުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނާއި، ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ ބައިވެރިވެވަޑައިގަތެވެ. މީގެ އިތުރުން ފުލުހުންގެ އިސް ބޭފުޅުންނާއި ގިނަ އަދަދެއްގެ އާންމު ފުލުހުން ވަނީ މި ހަރަކާތުގައި އަމަލީގޮތުން ބައިވެރިވެފައެވެ.
މި ހަރަކާތާއި ގުޅިގެން އެސިސްޓެންޓް ކޮމިޝަނަރ އޮފް ޕޮލިސް (އޭސީޕީ) އަހުމަދު ޝިފާން ވިދާޅުވީ މި ހަރަކާތުގައި ރާއްޖޭގެ އެކި ކަންކޮޅުތަކުގައި ފުލުހުންގެ ޚިދުމަތުގައި ތިބި ހުރިހާ ފުލުހުންވެސް ބައިވެރިވެފައިވާކަމަށެވެ. އަދި ރައްޔިތުންގެ ޚިޔާލާ މަޝްވަރާގެ މަތިން ހައްލުކުރަންޖެހޭ ކަންކަން ހައްލުކުރުމުގެ މަސައްކަތް ކުރަމުންދާނެކަމަށް ޝިފާން ވިދާޅުވިއެވެ.
"މި ހަރަކާތުގެ ތެރެއިން އަޅުގަނޑުމެން ރައްޔިތުންނާ ގުޅިގެން ރައްޔިތުންގެ ކަންބޮޑުވުންތައް އޮޅުންފިލުވުމުގެ އިތުރަށް އެ ސަރަޙައްދެއްގައި، އެ ރަށެއްގައި ނުވަތަ ފުލުހުން އެ ޚިދުމަތްކުރާ ރަށެއްގައި، އަތޮޅެއްގައި އަޅުގަނޑުމެން ރަނގަޅުކުރަން ހުރި ކަންކަން ވަކިން ޚާއްސަކޮށް އަހައި، އަދި އަޅުގަނޑުމެންވެސް ރިކޯޑްކުރާނެ ވަކި މެކޭނިޒަމެއް ބޭނުންކޮށްގެން އެކަންކަން އަޅުގަނޑުމެން ހޯދުމަށްފަހު، ދުރު މުސްތަޤުބަލުގައިވެސް ހައްލުކުރަން ހުރި ކަންކަމާގުޅޭގޮތުން އަޅުގަނޑުމެން މަސައްކަތްކުރާނަން." ޝިފާން ވިދާޅުވިއެވެ.
މި ހަރަކާތަކީ ފުލުހުންނާއި ރައްޔިތުންނާ އޮންނަ ގުޅުން ބަދަހިކޮށް، ރައްޔިތުންގެ އިތުބާރު ހޯދުމަށް ކުރިއަށްގެންދާ ސިލްސިލާ މަސައްކަތްތަކުގެ ތެރެއިން ހިންގުނު މުހިންމު ހަރަކާތެއްކަމަށް ފުލުހުން ވިދާޅުވިއެވެ. މި ހަރަކާތުގެ ތެރެއިން ރާއްޖޭގެ އެކި ރަށްރަށުގައި ފުލުހުން ވަނީ ގޭގެއަށް ޒިޔާރަތްކޮށް އަދި މަގުމަތިން ރައްޔިތުންނާ ބައްދަލުކޮށް މައުލޫމާތު ބަދަލުކޮށްފައެވެ.
މިދިޔަ ފެބްރުއަރީ މަހުގެ 28 ވަނަދުވަހު ފުލުހުން ވަނީ މާލޭ ސަރަހައްދުގައިވެސް މިހަރަކާތް ކުރިއަށްގެންގޮސްފައެވެ. މިހަރަކާތުގެ ސަބަބުން ފުލުހުން ހިންގާ އޮޕަރޭޝަން ތަކާއި ތަހުގީގުތަކަށް ގިނަގުނަ ފައިދާތަކެއް ވާނެ ކަމަށް ފުލުހުން ވަނީ ހާމަކުރައްވާފައެވެ.