އަންހެނުންގެ އޭޝިޔާ ކަޕް ފުޓްބޯޅަ މުބާރާތުގައި އިންޑިޔާ ކޮޅަށް ޖަޕާނުން 11 ގޯލު ޖަހައިފި އެވެ.
މި ނަތީޖާއާއެކު އިންޑިޔާގެ ކޯޗު އަމޭލިޔާ ވަލްވާޑޭ ބުނީ މިއީ ދެ ގައުމުގެ ފުޓްބޯޅައިގެ ތަފާތު ކަމަށެވެ.
"މި ނަތީޖާގެ ސަބަބުން އަހަރެން މާޔޫސް ވެއްޖެ. އެކަމަކު މިއީ މި މެޗުގެ މަތިން ހަނދާން ނައްތާލާފައި ކުރިއަށް ހުރި މެޗުތަކަށް ވިސްނަންވީ ވަގުތު. ހަގީގަތުގައި މި މެޗުން ފެނިގެން މިދިޔައީ މި ގައުމުގެ ތަފާތު،" ކޯޗު ބުންޏެވެ.
އޭނާ ބުނީ މިވަގުތު އިންޑިޔާގެ ކުޅުންތެރިންނަށް އެންމެ މުހިންމު ކަމަކީ ނަތީޖާއާ މެދު ނުވިސްނައި ކުރިއަށް އޮތް މެޗަށް ނަފްސާނީ ގޮތުން ތައްޔާރުވުން ކަމަށެވެ.
ޖަޕާނުގެ ކޯޗު ނިލްސް ނީލްސަން ހުރީ ނަތީޖާއާ މެދު ވަރަށް ބޮޑަށް ހިތްހަމަ ޖެހިފަ އެވެ.
"ވަރަށް އުފާވެފައި މިހުރީ މި ނަތީޖާގެ ސަބަބުން. ކުޅުންތެރިން ވަނީ އަހަރުމެންގެ ރޭވުމާ އެއްގޮތަށް މެޗުގައި ވަރަށް ރަނގަޅު ކުޅުމެއް ދައްކާފައި. ހާއްސަކޮށް މިއީ އެޓޭކިން ފުޓްބޯޅައިގައި ޖަޕާނުން ކުޅުނު ވަރަށް ރަނގަޅު ކުޅުމެއް އަދި ނެރުނު ވަރަށް ރަނގަޅު ނަތީޖާއެއް،" ކޯޗު ބުންޏެވެ.
މި ނަތީޖާއެކު ކުޅުނު ދެ މެޗުން ވެސް ބަލިވެ އިންޑިޔާ ވަނީ ޓޭބަލުގެ ފުލުގަ އެވެ. ބާކީ އޮތީ ޗައިނީސް ޓައިޕޭއާއެކު މާދަމާ ނޫން އަނެއް ދުވަހު ކުޅޭ މެޗެވެ. ވިއެޓްނާމް އަތުން އިންޑިޔާ ބަލިވީ 2-1އިންނެވެ. އޮސްޓްރޭލިޔާގައި މިހާރު ކުރިއަށްދާ މުބާރާތުގެ ގްރޫޕް ސީގައި ޖަޕާން އެއްވަނާގައިވަނީ ކުޅުނު ދެ މެޗުން ވެސް މޮޅުވެގެންނެވެ.