ގުޅީ ސްކޫލް ބަލިކޮށް، ޢިމާދުއްދީން ދެވަނަ ބުރަށް

ބޮޑު ތަފާތަކުން ގުޅީ ސްކޫލް ބަލިކޮށް، "ރާއްޖެ ޖޫނިއަރސް" 17 އަހަރުން ދަށުގެ ފުޓުބޯޅަ މުބާރާތުގެ ދެވަނަ ބުރުގެ ޖާގައެއް، ޢިމާދުއްދީން ސްކޫލުން ހޯދައިފިއެވެ.

ހުޅުމާލެ މިނީ ސްޕޯޓްސް ކޮންޕްލެކްސްގައި އިއްޔެ ކުޅުނު މިމެޗުން ޢިމާދުއްދީން ސްކޫލް މޮޅުވެފައި ވަނީ 0-5 ގެ ނަތީޖާއިންނެވެ.

ޢިމާދުއްދީން ސްކޫލުން، ގުޅީ ސްކޫލުގެ ގޯލު ހުޅުވާލީ މެޗުގެ 15 ވަނަ މިނެޓުގައެވެ. ޢިމާދުއްދީނުން ވަނީ މެޗުގެ 17 ވަނަ މިނެޓުގައި އެޓީމުގެ 2 ވަނަ ލަނޑު، އަދި 22 ވަނަ މިނެޓުގައި 3 ވަނަ ލަނޑު ކާމިޔާބުކޮށްފައެވެ. މިއާއެކު، މެޗުގެ ފުރަތަމަ ހާފު ނިމިފައިވަނީ 0-3 ގެ ނަތީޖާއިން ޢިމާދުއްދީން ސްކޫލް ކުރީގައި އޮވެގެންނެވެ.

ޢިމާދުއްދީން ސްކޫލުން ކާމިޔާބުކުރި ފަހު 2 ލަނޑުވެސް ފެނިގެންގޮސްފައިވަނީ މެޗުގެ ފަހުކޮޅުގައެވެ. އެގޮތުން 4 ވަނަ ލަނޑު، މެޗުގެ 57 ވަނަ މިނެޓުގައި ކާމިޔާބުކުރި އިރު، 5 ވަނަ ގޯލު ފެނިގެންގޮސްފައި ވަނީ މެޗުގެ 60 މިނެޓު ހަމަވެގެން ދެއްކި އިތުރު ވަގުތުގެ ތެރޭގައެވެ.

މި ނަތީޖާއާއެކު، ޢިމާދުއްދީން ސްކޫލް މިވަނީ ކުޅުނު 2 މެޗުން ލިބުނު 6 ޕޮއިންޓު އަދި ފައިދާ 8 ގޯލާއެކު މުބާރާތުގެ ދެވަނަ ބުރަށް ދަތުރުކޮށްފައެވެ. އެޓީމުގެ ފުރަތަމަ މެޗުގައި އަޙްމަދިއްޔާ އިންޓަރނޭޝަލަން ސްކޫލް ބަލިކޮށްފައިވަނީ 0-3 ގެ ނަތީޖާއިންނެވެ.