އިބްރާހީމް ނާޞިރު އިންޓަރނޭޝަނަލް އެއަރޕޯޓުގެ ސީ ޕްލޭން ބޭސް އެހެން ދިމާލަކަށް ބަދަލުކުރުމުގެ މަސައްކަތް ކުރިއަށް އޮތް ދެތިން މަހެއްގެ ތެރޭގައި ބަޔަކާއި ޙަވާލުކުރައްވާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމް.އޭ.ސީ.އެލުން ވިދާޅުވެއްޖެއެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯޓު ތަރައްޤީކުރުމުގެ ބިޔަ މަޝްރޫޢުގެ ދަށުން، އެއަރޕޯޓުގައި އަލަށް އެޅުމަށް ހަމަޖެހިފައިވާ ރަންވޭގެ މަސައްކަތަށް ބޭނުންވާ ބިން ހިއްކުމުގެ މަސައްކަތް ކުރަމުންދަނީ ސީޕްލޭންގެ އޮޕަރޭޝަންތައް ކުރިއަށްދާ ސަރަޙައްދުގައި ކަމަށްވާތީ، ހުޅުލޭގައި ހުރި އެއަރ ޓްރެފިކް ކޮންޓްރޯލް ޓަވަރ، އޭ.ޓީ.ސީ ޓަވަރ ހިމެނޭ ސަރަޙައްދުން ބިން ހިއްކުމަށްފަހު، އެ ސަރަޙައްދަށް މިހާރު ބޭނުންކުރަމުންދާ ސީ-ޕްލޭން ބޭސް ބަދަލުކުރުމަށް އެމް.އޭ.ސީއެލުން ވަނީ ނިންމަވާފައެވެ. img:http://s1.psmnews.mv/images/660x400/14762634783208.jpg|ސީޕްލޭން ބޭސް - ފޮޓޯ: ޕީއެސްއެމް / އިސްމާޢީލް އަބްދުއްރަޙީމް
އެއަރޕޯޓް ތަރައްޤީކުރުމުގެ މަޝްރޫޢާއި ގުޅޭ އެންމެފަހުގެ މަޢުލޫމާތު ނޫސްވެރިންނާއި ހިއްސާކުރައްވަމުން އެމް.އޭ.ސީ.އެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، ސީ-ޕްލޭން ބޭސް ބަދަލުކުރުމަށް ބޭނުންވާ ކޮންސެޕްޓް ޑިޒައިން ކުރުމުގެ މަސައްކަތް މިހާރު ނިމިފައިވާ ކަމަށެވެ އަދި ޓެކްނިކަލް ގޮތުން ބަލަންޖެހޭ ބެލުންތައް މިހާރު ބަލަމުންދާ ކަމަށާއި، އެކަމަށް ބޭނުންވާ ޑީޓެއިލް ޑިޒައިން ނިމުނުހާ އަވަހަކަށް، ކުރިއަށް އޮތް ދެތިން މަހެއްގެ ތެރޭގައި ކޮންޓްރެކްޓަރަކަށް އެ މަސައްކަތް ޙަވާލުކުރައްވާނެ ކަމަށެވެ.
"ސީޕްލޭން ޓަރމިނަލްގެ މަސައްކަތް މިހާރު ގޮސްފައިވާ ހިސާބަކީ އަޅުގަނޑުމެން ކޮންސެޕްޓް ޑިޒައިން ކުރުން ވަނީ ނިމިފައި. އެއީ އާ ރަންވޭ އޮޕަރޭޝަނަށް ގެންނައިރު ސީޕްލޭން ޓަރމިނަލްވެސް މިޖެހެނީ ރީލޮކޭޓް ކުރަން. އެއީ އެކަށީގެންވާ ޖާގަ ނުލިބޭތީވެ. އެހެންވީމަ އެ މަސައްކަތް ހަމަ އެހެން މަސައްކަތްތަކެކޭ އެއްގޮތަށް ކުރިއަށް އެބަދޭ. އަޅުގަނޑުމެންގެ ކޮންސެޕްޓް ޑިޒައިން ނިންމާފައި، ޑީޓެއިލް ޑިޒައިން ހެދުމަށް ބަޔަކާ ހަވާލުކޮށްފައިވާނީ މިހާރު. އެކަން ނިމުނުހާ އަވަހަކަށް މި މަސައްކަތް ކުރުމަށް އަޅުގަނޑުމެން ކޮންޓްރެކްޓަރެއް ހަމަޖައްސާނަން" ޢާދިލް ވިދާޅުވިއެވެ.
އެއަރޕޯޓް ތަރައްޤީ ކުރުމުގެ މަޝްރޫޢުގެ ދަށުން އައު ރަންވޭއަށް ބޭނުންވާ ބިން ހިއްކުމުގެ މަސައްކަތް މެދުކެނޑުމެއް ނެތި ކުރިއަށްދާކަމަށް އެމް.އޭ.ސީއެލުން ވިދާޅުވެއެވެ. އެގޮތުން މި މަޝްރޫޢުގެ ދަށުން މިހާރުވެސް 19 ހެކްޓަރުގެ ބިން ހިއްކާ ނިންމާފައިވާ ކަމަށް އެކުންފުނިން ހާމަކުރައްވައެވެ. އަދި ބިން ހިއްކުމުގެ މަސައްކަތް ކުރަމުންދަނީ އެއަރޕޯޓްގައި ސީޕްލޭންގެ އޮޕަރޭޝަންތައް ހިންގާ ސަރަޙައްދުގައިކަމުން، މި މަސައްކަތް ކުރަމުންދަނީ ސީޕްލޭންގެ އޮޕަރޭޝަންތަކާއި، އެއަރޕޯޓްގެ އިތުރު އެއްވެސް އޮޕަރޭޝަނަކަށް މި މަޝްރޫޢުގެ ސަބަބުން، ދަތިނުވާނެހެން ދުރާލާ ރާވައިގެންކަމަށްވެސް އެމް.އޭ.ސީ.އެލުން ވިދާޅުވެއެވެ. img:http://s4.psmnews.mv/images/660x400/14762635102322.jpg|ސީޕްލޭން ބޭސް - ފޮޓޯ: ޕީއެސްއެމް / އިސްމާޢީލް އަބްދުއްރަޙީމް
ހަމައެހެންމެ ބިން ހިއްކަމުންދާ ސަރަޙައްދުގެ ފަޅުގެ ބޮޑު ބަޔަކީ ގިނަ ޢަދަދެއްގެ ޔޮޓްފަހަރު އަޅާފައި ހުންނަ ސަރަޙައްދެއްކަމުން، މަސައްކަތް ކުރިއަށްދާ މިންވަރަކުން، އެ ސަރަޙައްދުން ޖާގަ ހުސްކުރުމުގެ މަސައްކަތްވެސް އެކުންފުނިން އަންނަނީ ކުރައްވަމުންނެވެ. އަދި މި މަސައްކަތް ހަލުވި ކުރުމަށްޓަކައި އިތުރު 2 ޑްރެޖަރ މި ހަފްތާތެރޭ ގެނައުމަށް ހަމަޖެހިފައިވާ ކަމަށްވެސް އެމް.އޭ.ސީ.އެލުން މަޢުލޫމާތުދެއްވައެވެ.