ފީފާ ވޯލްޑް ކަޕް 2026ގެ ސެމީ ފައިނަލް، ތިންވަނަ ހޮވާ މެޗު އަދި ފައިނަލްގައި ބޭނުންކުރުމަށް ޚާއްޞަކޮށްފައިވާ ރަސްމީ މެޗު ބޯޅަ "ޓްރިއޮންޑާ ފައިނަލް" އެޑިޑާސް އިން ދައްކާލައިފިއެވެ.
މި ބޯޅައަކީ 2025 ވަނަ އަހަރު ނެރުނު "ޓްރިއޮންޑާ" ބޯޅައަށް ބިނާކޮށް، އޭގެ ފެންވަރު ހިފަހައްޓަމުން ފަރުމާއަށް ޒަމާނީ ބަދަލުތަކެއް ގެނެސްފައިވާ ބޯޅައެކެވެ.
ފީފާ ވޯލްޑް ކަޕްގެ ތާރީޚުގައި ވެސް ފުރަތަމަ ފަހަރަށް، އެޑިޑާސް އިން މިވަނީ ހަމައެކަނި ކުލައަށް ބަދަލެއް ގެނައުމުގެ ބަދަލުގައި، މުބާރާތުގެ ފަހު މެޗުތަކުގެ މުހިންމުކަމާއި ޝަރަފު ރަމްޒުކޮށްދޭނެ ފަދަ މުޅިން ޚާއްޞަ ފަރުމާއެއް ތައާރަފުކޮށްފައެވެ.
"ޓްރިއޮންޑާ ފައިނަލް" ފަރުމާކޮށްފައިވަނީ ފުޓްބޯޅައިގެ އެންމެ ޝަރަފުވެރި ތައްޓާ ހަމައަށް ކުޅުންތެރިން ކުރާ ދަތުރުން އިންސްޕިރޭޝަން ހޯދައިގެންނެވެ. ފީފާ ވޯލްޑް ކަޕްގެ ތަށީގެ ރަންކުލައާ ގުޅުވައިގެން ތައްޔާރުކޮށްފައިވާ މި ބޯޅައިގައި، ކަޅު ކުލައިގެ ބޭސްއެއް ބޭނުންކުރުމުން ބޯޅައަށް ވަނީ ޝާހީ އަދި ޖަޒުބާތީ ފުރިހަމަކަމެއް ގެނެސްދީފައެވެ.
މިއީ މުބާރާތުގެ އެންމެ ފަހު މަރުހަލާގެ ފޯރި އިތުރުކޮށްދޭނެ ފާހަގަކޮށްލެވޭ ފަރުމާއެކެވެ.
މި ބޯޅައިން ރަމްޒުކޮށްދެނީ މިހާތަނަށް ބާއްވާ އެންމެ ބޮޑު ވޯލްޑް ކަޕަށް މަރުހަބާ ކިޔާ 16 ސިޓީއެވެ. ސެމީ ފައިނަލާއި، ތިންވަނަ ހޮވާ މެޗު އަދި ފައިނަލް މެޗުތައް ބާއްވާ ޑަލަސް، އެޓްލާންޓާ، މަޔާމީ އަދި ނިއުޔޯކް ނިއު ޖާޒީގެ ނަންތައް ބޯޅައިގެ މައިގަނޑު ފަރުމާގައި ފާހަގަކޮށްފައިވެއެވެ.
މީގެ އިތުރުން ބޮސްޓަން، ގުއަޑަލަހާރާ، ހިއުސްޓަން، ކެންސަސް ސިޓީ، ލޮސް އެންޖެލިސް، މެކްސިކޯ ސިޓީ، މޮންޓެރޭ، ފިލަޑެލްފިއާ، ސެން ފްރެންސިސްކޯ ބޭ އޭރިއާ، ސިއެޓްލް، ޓޮރޮންޓޯ އަދި ވެންކޫވަރގެ ނަންތައް ތިނެސްކަން ކުރެހުންތަކުގެ ތެރޭގައި ހިމަނާފައިވަނީ، މުބާރާތް ކާމިޔާބުކަމާއެކު ކުރިއަށް ގެންދިއުމުގައި އެ ސިޓީތަކުން އަދާކުރި މުހިންމު ދައުރުގެ އަގުވަޒަންކުރުމުގެ ގޮތުންނެވެ.
"ޓްރިއޮންޑާ ފައިނަލް" ގައި އެޑިޑާސްގެ އެންމެ ފަހުގެ "ކަނެކްޓަޑް ބޯލް ޓެކްނޮލޮޖީ" ހިމަނާފައިވެއެވެ. މީގެ ސަބަބުން މެޗުގެ އޮފިޝަލުންނަށް އަވަސް ނިންމުންތައް ނިންމުމަށް ބޭނުންވާ މައުލޫމާތު ވަގުތުން ފޯރުކޮށްދީ، ކުޅިވަރުގެ ތަފްސީލުތައް އިތުރަށް ފުރިހަމަކޮށްދޭނެއެވެ.