ޓެކްނޮލޮޖީގެ ބޭނުމަކީ ރަނގަޅު ނިންމުންތައް ނިންމޭކަމުގެ އިތުބާރު ސަޕޯޓަރުންނަށް ހޯދައިދިނުމެވެ. ނަމަވެސް، މިހާރު ފެންނަމުންދަނީ މީގެ އިދިކޮޅެވެ.
ފީފާ ވޯލްޑް ކަޕް ފުޓުބޯޅަ މުބާރާތުގައި އާޖެންޓީނާ އާއި މިސްރު ބައްދަލުކުރި މެޗު ވެގެންދިޔައީ ޓެކްނޮލޮޖީގެ ސަބަބުން ރެފްރީގެ ނިންމުންތަކާމެދު އިތުރު ސުވާލުތަކެއް އުފެދިގެންދިޔަ މެޗަކަށެވެ.
މިސްރުން ޖެހި ލަނޑެއް ބާތިލްކުރީ، އެ ލަނޑު ޖެހުމުގެ 20 ސިކުންތު ކުރިން، ދަނޑުގެ އަނެއްކޮޅުގައި ހިނގި ކަމަކަށް ބަލާފައެވެ. އެއީ ރެފްރީ އޭރު ލޮލުން ދެކި، ފައުލެއް ނޫންކަމަށް ނިންމާފައިވާ ކަމެކެވެ. މިފަދަ ކަންކަމުގެ ސަބަބުން ދަނޑުމަތީގައި ކުޅުންތެރިން ކުރާ މަސައްކަތުގެ އަގު ގެއްލިގެންދެއެވެ.
ބާސްކެޓްބޯޅަ ނުވަތަ ހޮކީ ފަދަ ކުޅިވަރުތަކުގައި، ހަލުވި މިނުގައި ހިނގާ ކަންކަން ދެނެގަތުމަށް ރީޕްލޭ ބޭނުންކުރުމަކީ ބަލައިގަނެވޭ ކަމެކެވެ. ނަމަވެސް، ލަނޑެއް ޖެހުމުގެ އެތައް އިރެއް ކުރިން ހިނގާފައިވާ ކުދިކުދި ކަންތައްތައް ހޯދައި، ކައުންޓަރ އެޓޭކް ފެށުނު ގޮތާ ބެހޭގޮތުން ސުވާލު އުފެއްދުމަކީ، ވަކި ބަޔަކަށް ފައިދާވާ ގޮތަށް ނިންމުންތައް ނިންމުމަށް މަގުފަހިވާ ކަމެކެވެ.
މި ހާލަތު ދިމާވީ އާޖެންޓީނާއަށް ނަމަ، އެ ލަނޑު ބާތިލް ކުރާނެ ހެއްޔެވެ؟
މިއީ ހިތްހަމަޖެހޭ ސުވާލަކަށް ނުވިޔަސް، މިސްރުގެ ޓީމުން ތިބީ އެ އިހުސާސްގައެވެ. ސަބަބަކީ މެޗުގެ ފަހުކޮޅު ނިންމި ކޮންމެ ނިންމުމެއްވެސް ނިންމާފައިވަނީ އެމީހުންނާ ދެކޮޅަށް ކަމަށް ފެންނާތީއެވެ.
މިސްރުގެ ކޯޗު ހަސަން ބުނި ގޮތުގައި، ޒިކޯ ޖެހި ލަނޑު ބާތިލްކުރި އުސޫލުން ބަލާނަމަ، އާޖެންޓީނާގެ ތިންވަނަ ލަނޑުވެސް ބާތިލްކުރަން ޖެހޭނެއެވެ.
"އަހަރެން ރެފްރީ ގާތު ބުނިން މިއީ ބޭއިންސާފެކޭ،" ހަސަން ބުންޏެވެ. "ފަހަރުގައި އޭނާ ފޮރުވަން އުޅޭ ކަމެއް އޮތީ ކަމަށްވެސް ވެދާނެއެވެ. އަހަރެން މިސްރަށް އެނބުރި ދިޔުމަށްފަހު، ދެން މި މުބާރާތުގެ އެއްވެސް މެޗެއް ނުބަލާނަން. މިއީ އަހަރެންގެ އަމިއްލަ އިހުތިޖާޖު." މިސްރުގެ ކޯޗު ބުންޏެވެ.
ހަސަންގެ މި ޝުއޫރުތަކަކީ ފީފާއިން މެސީ ފަދަ ތަރިން މުބާރާތުގައި ގިނަ ދުވަހު ބައިތިއްބަން ބޭނުންވާ ކަމަށް ގަބޫލުކުރާ، ނުވަތަ އެފްރިކާގެ ޓީމުތަކާ މެދު ބޭއިންސާފުން ކަންތައް ކުރާ ކަމަށް ދެކޭ ސަޕޯޓަރުންގެ މެދުގައި ބޮޑު ތަރުހީބެއް ލިބޭނެ ވާހަކަތަކެކެވެ.
މެޗުގެ ތެރޭގައި ރީނދޫ ކާޑެއްވެސް ހޯދި މިސްރުގެ ކޯޗު ހަސަން ވަނީ ރެފްރީގެ ނިންމުންތަކަށް ވަރަށް ބޮޑަށް ފާޑުކިޔާފައެވެ.
"ކޮންމެ ނަތީޖާއަކާ ކުރިމަތިލާން ޖެހުނަސް އަހަރެންގެ ހިތުގައި އޮތް އެއްޗެއް ބުނާނަން. މިއީ ސާފުކޮށް ރޭވުންތެރިކަމެއްގެ ތެރެއިން ނަތީޖާ ނެރުނު މެޗެއް. މުޅި ދުނިޔެއަށް ވެސް އެ މަންޒަރު ފެނުނު،" ހަސަން ބުންޏެވެ.
މިސްރު ވޯލްޑް ކަޕުން ކެޓި މެޗަށް ފަހު ވާހަކަދައްކަމުން އޭނާ އިތުރަށް ބުނީ، ފީފާއިން ބޭނުންވަނީ މެސީއަށް ވޯލްޑް ކަޕް ތަށި ދޭންކަމަށެވެ.
"އާޖެންޓީނާ މޮޅުކޮށްދޭން އެހާ ބޮޑަށް ބޭނުންވާ ނަމަ، އެހެން އެންމެން މި މުބާރާތުގައި ބައިވެރިވާން މި ގެންނަނީ ކީއްކުރަން؟" ހަސަން ބުންޏެވެ.
ނަމަވެސް، މިސްރުގެ ޓީމަށް މިއަށްވުރެ ރަނގަޅަށް ކުޅެވުނީސް ކަމަކަށް ނުވަތަ ޑިފެންސް ކުރެވުނީސް ކަމަކަށް ހަސަން އެއްފަހަރުވެސް ފާހަގައެއް ނުކުރެއެވެ.
މިސްރު އަތުން މޮޅެއް ފޭރިގަތީ ހެއްޔެވެ؟ ފަހަރުގައި އެހެންވެސް ވެދާނެއެވެ. އެކަމަކު 2-0 އިން ކުރީގައި އޮވެ، މެޗުގެ ފަހު 15 މިނެޓު ތެރޭގައި ޓީމު އެއްކޮށް ރޫޅިގެން ދިޔުމުން، ފީފާ އާއި ރެފްރީން ކުއްވެރިކުރުމަކީ ހަމަ އެންމެ ރަނގަޅު ގޮތްބާ؟