ރާއްޖޭގެ ވައިގެ ސަރަޙަައްދު ބެލެހެއްޓުމަށް ޒަމާނީ ފެންވަރުގެ ރާޑަރ ސިސްޓަމެއް އިބްރާހީމް ނާޞިރު އިންޓަރނޭޝަނަލް އެއަރޕޯޓުގައި ބެހެއްޓުމަށް ނިންމާފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީން ހާމަކޮށްފިއެވެ.
އާ ރަންވޭ އެޅުމަށްޓަކައި، މިހާރު ބޭނުން ކުރަމުން އަންނަ ރާޑާރ ސިސްޓަމް، ހުޅުލޭގެ އެހެން ދިމާލަކަށް ބަދަލު ކުރަން ޖެހޭ ކަމަށާއި، މިހާރު ހުރި ރާޑަރ ސިސްޓަމް އަކީ ވަރަށް ކުރީގެ މޮޑެލްއަކަށް ވުމުން އެ ސިސްޓަމް ރީ ލޮކޭޓް ކުރުމުގެ ބަދަލުގައި އާ ރާޑަރު ސިސްޓަމްއެއް ބެހެއްޓުމަށް ހަމަޖެހިފައިވާ ކަމަށް ވެސް އެއަރޕޯޓްސް ކޮމްޕެނީއިން ވިދާޅުވެއެވެ.
ރާއްޖޭގެ ވައިގެ ސަރަހައްދު ބެލެހެއްޓުމަށް މިހާރު ބޭނުންކުރާ ރާޑާރ ސިސްޓަމަށް ފަނަރަވަރަކަށް އަހަރު ވަނީ ވެފައެވެ. އެ ސިސްޓަމް ބެހެއްޓިފައި ހުރި ތަނަކީ އާ ރަންވޭ އެޅުމަށް ނިންމާފައިވާ ސަރަހައްދުކަމަށްވުމުން، ރާޑާރ ސިސްޓަމް އެހެން ދިމާލަކަށް ބަދަލު ކުރަން އެއަރޕޯޓްސް ކޮމްޕެނީއިން ވަނީ ހަމަޖައްސަވާފައެވެ. އާ ރާޑާ ސިސްޓަމް ބެހެއްޓުމަށް ހަމަޖެހިފައިވަނީ ހުޅުލޭ އިރު އުތުރު ސަރަހައްދެއްގައި ކަމަށް އެމްއޭސީއެލް މަޢުލޫމާތުދެއެވެ.
ޕީއެސްއެމްއާއި ވާހަކަދައްކަވަމުން މޯލްޑިވްސް އެއާޕޯޓްސް ކޮމްޕެނީގެ މެނޭޖިންގ ޑިރެކްޓަރ އާދިލް މޫސާ ވިދާޅުވީ މިހާރު ބޭނުންކުރާ ރާޑާ ސިސްޓަމް އެހެން ދިމާލަކަށް ބަދަލުކުރުމަކީ ބޮޑު ޚަރަދެއް ހިނގާނެ ކަމެއް ކަމަށެވެ. އެހެންކަމުން އެ ސިސްޓަމް ބަދަލުކުރުމުގެ ބަދަލުގައި ޒާމާނީ ފެންވަރުގެ އާ ރާޑާ ސިސްޓަމްއެއް ގަތުމަށް ހަމަޖެހިފައިވާ ކަމަށާއި، އެކަމާއި ގުޅޭ މަސައްކަތްތައް މިހާރު ކުރިއަށްދާ ކަމަށް ވެސް އާދިލް ވިދާޅުވިއެވެ. އަދި ކުރިއަށް އޮތް އަށާރަ މަސް ދުވަހުގެތެރޭ އާ ރާޑާ ސިސްޓަމެއް ބެހެއްޓިގެންދާނެ ކަން އޭނާ ފާހަގަކުރެއްވިއެވެ.
ރާއްޖޭގެ ވައިގެ ސަރަޙަައްދުގައި ޒަމާނީ ފެންވަރުގެ ރާޑަރ ސިސްޓަމެއް ބެހެއްޓުމުގެ މަޝްރޫޢުއަށް ގަތްގަޑަކަށް ހަތަރު މިލިއަނެއްހާ ޑޮަލަރު ހޭދަވާނެއެވެ.